થોડા દિવસ અગાઉ સુરતમાં આગની ચકચાર મચાવતી ઘટના બની હતી. જેમાં 20થી વધુ નિર્દોષ બાળકોનો ભોગ લેવાયો હતો. ત્યારે વડોદરામાં બે બિલ્ડિંગમાં શોર્ટ સર્કિટના કારણે આગ લાગવાની ઘટના સામે આવી છે. જ્યારે એક બસ અને એક ટેન્કરમાં પણ લાગી હતી આગ. આમ ચાર દિવસમાં વડોદરામાં ચાર આગના બનાવો સામે આવ્યા છે.
છાણી જકાતનાકા પાસે આગની ઘટના
વડોદરાના છાણી જકાતનાકા પાસે આગ લાગવાની ઘટના સામે આવી છે. ગેટ વે બિલ્ડીંગ પાસે આવેલી ક્વીન ફેશન બ્યુટીકની કપડાની દુકાનમાં આગ લાગી હતી. શોર્ટ સર્કિટના કારણે આગ લાગી હોવાનુ સામે આવ્યુ છે. દુકાનમાં આગ લાગત કપડા બળીને ખાખ થયા હતા. આ ઘટનાની જાણ થતા ફાયર વિભાગના અધિકારીઓ ઘટનાસ્થળે દોડી આવ્યા હતા. ફાયર વિભાગે ભારે જહેમત બાદ આગ પર કાબુ મેળવ્યો હતો.
બસમાં આગ લાગતા બળીને ખાખ
શુક્રવારે વડોદરામાં ઉંડેરા ગામે ગાંધી ટ્રાવેલ્સની બસમાં આગ લાગી હતી. આ આગમાં સંપૂર્ણ બસ બળીને ખાખ થઇ ગઇ હતી. શોટસર્કીટના કારણે આગ લાગી હોવાનું અનુમાન લગાવવામાં આવ્યું હતું. જોકે ફાયર બ્રિગેડે ઘટના સ્થળે પહોંચી આગ પર કાબૂ મેળવ્યો હતો. આ આગમાં કોઈ જાનહાની થઇ નથી.
મીટર પેટીમાં લાગી આગ
શુક્રવારે વડોદરામાં બીજી એક આગ ઘટના બની હતી. સયાજીગંજ વિસતારમાં આગ લાગવાની ઘટના બની હતી. જેમાં ફોનિક્સ કોમ્પલેક્ષની મીટર પેટીમાં આગ લાગી હતી. મળતી માહિતી મુજબ આગ લાગવાના સમયે કોમ્પલેક્ષમાં 1 હજાર જેટલા લોકો હતા. જો કે ફાયર બ્રિગેડે ઘટનાસ્થળે પહોંચીને આગ પર કાબુ મેળવ્યો હતો. મહત્વનું છે કે, કોમ્પલેક્ષમાં ફાયર સેફ્ટીના સાધનો બેકાર હાલતમાં હોવાનું સામે આવ્યું હતું. જો ફાયર બ્રિગેડ સમયસર પહોંચ્યુ ન હોત તો સુરત જેવી સ્થિતિ સર્જાવાની શક્યતા હતી.
સમા સાવલી રોડ પર ટેન્કરમાં આગ
બે દિવસ અગાઉ વડોદરાના સમા સાવલી રોડ પર પેટ્રોલ પંપ પાસે ટેન્કરમાં આગ લાગી હતી. આગના પગલે અફરાતફરીનો માહોલ સર્જાયો હતો. ફાયર બ્રિગેડની ચાર ગાડીઓ ઘટનાસ્થળે પહોચી હતી. ફાયરની ટીમે આગ પર કાબુ મેળવવામાં આવ્યો હતો.