ભેદ ઉકેલાયો / સસ્તામાં સોનું ખરીદવાની કોઈ ઓફર કરે તો થઈ જજો સચૅત, કચ્છમાં જે બન્યું તે જાણીને થઈ જશો સ્તબ્ધ

• ક્ચ્છમાં કરોડોની છેતરપિંડી પ્રકરણના આરોપીઓ ઝડપાયા
• સસ્તા સોનાના બિસ્કિટ આપવાના બહાને કરી હતી છેતરપિંડી
• આરોપીઓ પાસેથી રૂપિયા 1.27 કરોડની રોકડ કબ્જે કરાઇ  

ગુજરાતમાં અસલી સોનાના નામે નકલી સોનું ધાબડી દઈ છેતરપિંડી કરવામાં આવતી હોવાના કિસ્સામાં છેલ્લા કેટલાય સમયથી વધારો નોંધાઈ રહ્યો છે. તેવા સંજોગો વચ્ચે ભાવનગરના વેપારીને ગાંધીધામ બોલાવી સસ્તા સોનાના નામે અધધ... કહી શકાય તેટલા રૂપિયા 2.15 કરોડનો ધુંબો મારવામાં આવ્યો હતો આ પ્રકરણમાં પૂર્વ ક્ચ્છ LCB ની ટીમે તપાસ હાથ ધરી ચાર આરોપીને દોઢ કરોડથી વધુની રકમ સાથે દબોચી લીધા હતા. જ્યારે હજુ આ મામલે આરોપીઓ પોલીસ પકડથી દૂર હોવાનું સામે આવ્યું છે. નોંધનીય છે કે, આરોપી ગેંગ કંડલા કસ્ટમે જપ્ત કરેલું સોનુ હરાજીમાં ખરીદી સસ્તામાં વહેંચતા હોવાનું જણાવી બાટલીમાં ઉતારતા હોવાનું સામે આવ્યું છે.

કંડલા કસ્ટમે જપ્ત કરેલું સોનુ સસ્તામાં વહેંચતા હોવાનું જણાવી ઉતારતા હતા બાટલીમાં
સસ્તા સોનાની લાલચ આપી ઠગાઈના કિસ્સાઓમાં વધારો નોંધાઈ રહ્યો છે ત્યારે આવો જ એક કિસ્સો ગાંધીધામમાં બન્યો છે. જેમાં ભાવનગરના વેપારી ઇમરાન ધોળીયાને ગાંધીધામમાં સસ્તું સોનું ખરીદવાની લાલચ આપી 2.15 કરોડ ધુતી લેવાયા છે. ઠગબાજોએ નવી મોડેસ ઓપરેન્ડી મુજબ ભોગબનનારનો વિશ્વાસ જીતવા સૌપ્રથમ 100 ગ્રામ સાચું સોનુ પાંચ લાખ રૂપિયામાં વહેચ્યુ હતું. ત્યારબાદ કંડલા કસ્ટમે જપ્ત કરેલું અન્ય સોનુ હરાજીમાં ખરીદી સસ્તામાં વહેંચતા હોવાનું જણાવી આરોપીઓએ ભોગબનનાર ઇમરાન ધોળીયાને ઓછામાં ઓછું 5 કિલો સોનુ ખરીદવું પડશે તેમ કહી ગાંધીધામ બોલાવ્યો હતો. 

ગાંધીધામ એ ડિવિઝન પોલીસ મથકે નોંધાઈ હતી ફરિયાદ
ગાંધીધામની માધવ ચેમ્બર્સ ઓફિસમાં આરોપીઓએ સોનાની ડિલિવરી પહેલા રૂપિયા જમા કરાવવા પડશે તેવું કહી ઇમરાન ધોળીયા પાસેથી 2.15 કરોડ રોકડા મેળવી લીધા હતા. ત્યારબાદ ઠગબાજ ગેંગના સભ્યો વધુ સોનુ લેવા કંડલા જવા નીકળ્યા હતા. આ દરમિયાન પૂર્વાયોજિત કાવતરા મુજબ ઠગબાજ ગેંગના અન્ય શખ્સોએ નકલી પોલીસના વેશમાં આવી ગાંધીધામ ઑફિસે દરોડા પડ્યા હતા અને ગેંગના અન્ય શખ્સોની ધરપકડ કરી લઈ ગયા હતા. સમગ્ર ઘટનામાં ઇમરાનને ઠગાઈનું ભાન થતાં તાત્કાલિક ગાંધીધામ એ ડિવિઝન પોલીસ મથકે ફરિયાદ નોંધાવી હતી. 

LCB એ ચાર શખ્સોને દબોચી લીધા
આ મામલે પૂર્વ ક્ચ્છ લોકલ ક્રાઈમ બ્રાન્ચે વર્ક આઉટ કરી હ્યુમન ટેક્નિકલ સોર્સના ઉપયોગ થકી જિલ્લામાં છેતરપિંડી કરતી ગેંગના સભ્યોની તપાસ હાથ ધરી હતી. આ દરમિયાન ષડયંત્રનો  મુખ્ય સૂત્રધાર તરીકે અમરેલીનો અર્જુન સોજીત્રા તેમજ ભાવનગરના રમેશ રેવરનું નામ ખૂલ્યા હતા. જેને પગલે અમરેલી તેમજ ભાવનગર પોલીસની મદદથી આરોપી અર્જુનભાઈ પ્રદિપભાઈ સોજીત્રા (ઉ.વ.૩૭ રહે.માણેડપરા ભગવતીચોક, અમરેલી) અને રમેશભાઇ દુદાભાઈ રેવર (ઉ.વ. ૫૩ રહે. મહાવીરનગર ગારીયાધર જી.ભાવનગર)ને ઝડપી લીધા હતા. ત્યારબાદ ગાંધીધામ માધવ ચેમ્બર્સના ઓફીસ માલિક અને આરોપી અબ્દુલ મામદભાઈ લંઘા (ઉ.વ. ૪૫ રહે. હિમતપુરા ભચાઉ) તેમજ આરોપી ઇસ્માઇલ લંઘાને LCB એ ઝડપી લીધા હતા. 

પોલીસે 1.39 કરોડનો મુદામાલ કર્યો જપ્ત
પોલીસે મુખ્ય આરોપી અર્જુન પાસેથી 1.27 કરોડની રોકડ રકમ ઉપરાંત ૨૦,૫૦૦ ની કિંમતના ચાર મોબાઇલ, આમ કુલ રોક્ડા રૂ. 1,32,50,000 તથા વાહન એસ.યુ.વી.-300 કાર કિ.રૂ. 6 લાખ તથા મોબાઇલ નંગ-૧૧ કિ.રૂ. 57,000 મળી કુલ રૂપિયા 1,39,09000 નો મુદ્દામાલ કબજે કર્યો હતો અને  ફરાર આરોપી સાહિલખાન નસીબખાન જત (રહે. ઈંગરોડી તા.લખતર જી.સુરેન્દ્રનગર) તથા તેની સાથે આવેલ એક ઈસમ અને સાદા ડ્રેસમાં નકલી પોલીસ તરીકેની ઓળખ આપનાર સુલેમાન શેખ તથા તેની સાથેનાં બે અજાણ્યા શખ્સોને પકડી પડવાં તપાસ તેજ  બનાવી છે.