રાજનીતિ / બંગાળમાં ચૂંટણી પહેલા મમતા દીદીને ફટકો, જમણો હાથ ગણાતા આ નેતા જોડાયા ભાજપમાં

• મમતાના મહત્વના સાથી દિનેશ ત્રિવેદી જોડાયા ભાજપમાં
• TMCમાંથી આપ્યું હતું રાજીનામા 
• જેપી નડ્ડાએ કેસરિયા કરાવ્યા 

ઉલ્લેખનીય છે કે, દિનેશ ત્રિવેદીએ કેસરિયો ધારણ કરી વિધિવત ભાજપમાં જોડાઈ ગયા છે. ભાજપના મુખ્યાલય ખાતે રાષ્ટ્રીય અધ્યક્ષ જેપી નડ્ડા અને સંબિત પાત્રાની વિશેષ ઉપસ્થિતિમાં તેમણે કેસરિયા કર્યા હતા. 

ચૂંટણી પહેલા ભાજપમાં જોડાઇ રહ્યાં છે બંગાળના અનેક નેતા 

પશ્ચિમ બંગાળમાં વિધાનસભા ચૂંટણીના પડઘમ વાગી રહ્યા છે અને આ પહેલા ભાજપમાં અનેક દિગ્ગજો સામેલ થવાનો સિલસિલો ચાલુ છે ત્યારે આજે રાજ્યસભાના પૂર્વ સાંસદ દિનેશ ત્રિવેદી ભાજપમાં જોડાયા હતા. તો BCCIના અધ્યક્ષ ગાંગુલી પણ ભાજપમાં જોડાય તેવી અટકળો ચાલી રહી છે. 

રાજ્યસભામાં ધરી દીધું હતું રાજીનામું 

તૃણમૂલ કોંગ્રેસે રાજ્યસભા સાંસદ અને પૂર્વ કેન્દ્રીય મંત્રી દિનેશ ત્રિવેદીએ આજે રાજ્યસભામાં બજેટ પર ચર્ચા દરમિયાન પોતાનું રાજીનામું જાહેર કર્યું. રાજ્યસભામાં બજેટ ચર્ચા દરમિયાન દિનેશ ત્રિવેદીએ કહ્યું કે ખરેખર તો આપણે જન્મભૂમિ માટે છીએ અને મારાથી એ જોઇ શકાતું નથી કે આપણે કરીએ તો શું કરીએ, એક પાર્ટીમાં છીએ તો સીમિત છે, પરંતુ હવે મને ગભરામણ જેવું લાગી રહ્યું છે, આપણે કાંઇ કરી શકતા નથી, બીજી તરફ અત્યાચાર થઇ રહ્યો છે, આજે મારી આત્મા કહી રહી છે કે રાજીનામું આપી દે અને બંગાળની જનતાની વચ્ચે જઇ રહો.

મને આ કામ કરતાં કોઈપણ રોકી શકે તેમ નથી

વધુમાં દિનેશ ત્રિવેદી જણાવ્યું હતું કે જો હું ભાજપ સાથે જોડાઉ છું, તો મને આમ કરતા કોઈ પણ રોકી શકે તેમ નથી, ભાજપ સાથે જોડાવું કોઈ ખોટી વાત નથી. આ મુદ્દે તેમણે વધુમાં કહ્યું હતું કે સંસદમાં મેં જે પણ કહ્યું હતું તે દિલથી કહ્યું હતું, રાજીનામું આપ્યા પહેલા મેં મારા ગુરુને પૂછ્યું હતું અને તેમણે કહ્યું કે કરી નાખો, અને મેં રાજીનામું આપી દીધું હતું.

ગુજરાત સાથે કનેક્શન ધરાવે છે દિનેશ ત્રિવેદી ?

દિનેશ ત્રિવેદી 2012માં UPA સરકારમાં કેન્દ્રીય રેલવે મંત્રી રહી ચૂક્યા છે અને 2016-17નો આઉટસ્ટેન્ડિંગ પાર્લામેન્ટરિયનનો એવોર્ડ જીતી ચૂક્યા છે. દિનેશ ત્રિવેદીનું ગુજરાત કનેક્શન પણ રહ્યું છે કારણ કે તેમના માતા-પિતા ગુજરાતી હતા. પિતા કન્ટ્રક્શન કંપનીમાં કામ કરવા માટે કોલકાતા રહ્યા અને દિનેશ ત્રિવેદીનું બાળપણ અને યુવાની કોલકાતામાં જ પસાર થયું છે.