રશિયાના પૂર્વ રાષ્ટ્રપતિ દિમિત્રી મેદવેદેવે યુક્રેનની મદદ કરી રહેલા ઈઝરાયેલને ચેતવણી આપી છે. પૂર્વ રાષ્ટ્રપતિ દિમિત્રીએ કહ્યું કે રશિયા સાથે યુદ્ધ કરી રહેલા યુક્રેનને જો ઈઝરાયેલ હથિયારોની સપ્લાય કરશે તો તેનાથી બંને દેશો વચ્ચેના રાજદ્વારી સંબંધો ખતમ થઈ જશે.
યુક્રેનની મદદ કરી રહેલા ઈઝરાયેલને ચેતવણી રશિયાએ આપી
બંને દેશો વચ્ચેના રાજદ્વારી સંબંધો ખતમ થઈ જશેઃ પૂર્વ રાષ્ટ્રપતિ
ઈઝરાયેલી કંપની કરી રહી હતી યુક્રેનની મદદ: રિપોર્ટ
રશિયાના પૂર્વ રાષ્ટ્રપતિ દિમિત્રી મેદવેદેવે ઈઝરાયેલને યુક્રેનની મદદ કરવાને લઈને ચેતવણી આપી છે. દિમિત્રીએ કહ્યું કે જો ઇઝરાયેલ યુક્રેનને હથિયારોની સપ્લાય કરશે તો રશિયા અને ઇઝરાયેલ વચ્ચેના રાજદ્વારી સંબંધો ખતમ થઇ જશે. આપને જણાવી દઈએ કે, દિમિત્રી મેદવેદેવ હાલમાં રશિયાની સિક્યોરિટી કાઉન્સિલના ડેપ્યુટી ચેરમેન છે અને તેમને રાષ્ટ્રપતિ વ્લાદિમીર પુતિનના મુખ્ય સહયોગી માનવામાં આવે છે.
તમામ રાજદ્વારી સંબંધો ખતમ થઈ જશે: પૂર્વ રાષ્ટ્રપતિ
રશિયાના પૂર્વ રાષ્ટ્રપતિ દિમિત્રી મેદવેદેવે સોશિયલ મીડિયામાં કહ્યું કે, 'એવું કહેવામાં આવી રહ્યું છે કે ઇઝરાયેલ તરફથી યુક્રેનને હથિયારો મોકલવામાં આવી રહ્યા છે. આ એક બેદરકારભરી ચાલ છે. આ પગલાથી રશિયા અને ઈઝરાયેલ વચ્ચેના તમામ રાજદ્વારી સંબંધો ખતમ થઈ જશે.'
સોમવારે રશિયાએ કીવમાં કહ્યો હતો હુમલો
પૂર્વ રાષ્ટ્રપતિ દિમિત્રીનું નિવેદન એવા સમયે આવ્યું છે, જ્યારે એક દિવસ પહેલા સોમવારે યુક્રેનની રાજધાની કીવમાં રશિયા દ્વારા ઈરાન દ્વારા નિર્મિત સુસાઈડ ડ્રોન 'શાહેદ'થી હુમલો કરવામાં આવ્યો હતો. આ હુમલામાં યુક્રેનના એક નાગરિકનું મોત થયું હતું. ગયા અઠવાડિયે જ યુક્રેનના રાષ્ટ્રપતિ ઝેલેન્સકીએ કહ્યું હતું કે રશિયા યુક્રેનિયન નાગરિકોને નિશાન બનાવવા માટે ઈરાન નિર્મિત ડ્રોનનો ઉપયોગ કરી રહ્યું છે.
ઈઝરાયેલી કંપની કરી રહી હતી યુક્રેનની મદદ: રિપોર્ટ
એક અંગ્રેજી અખબારમાં ગયા અઠવાડિયે છપાયેલા અહેવાલ મુજબ, ઈઝરાયેલની એક પ્રાઈવેટ સિક્યોરિટી કંપની યુક્રેનને યુદ્ધમાં મદદ કરી રહી હતી. સાથે જ યુદ્ધની શરૂઆતમાં વેસ્ટર્ન યુક્રેનમાં ફીલ્ડ હોસ્પિટલ બનાવવા માટે ઇઝરાયેલે સતત 6 અઠવાડિયા સુધી 100 ટન કરતા વધુની માનવીય મદદ પણ કરી હતી.
ઈઝરાયેલના મંત્રી બાદ આવ્યું દિમિત્રીનું નિવેદન
રશિયાના પૂર્વ રાષ્ટ્રપતિ દિમિત્રીનું નિવેદન ઇઝરાયેલના એક મંત્રી નાચમન શાઈ (Nachman Shai)ના એ નિવેદન બાદ આવ્યું, જેમાં તેઓએ યુક્રેનને સૈન્ય સહાય મોકલવાની વાત કરી હતી. ઈઝરાયેલના મંત્રી શાઈએ ટ્વિટર પર લખ્યું કે, આજે સવારે આ સમાચાર મળ્યા છે કે ઈરાન રશિયાને બેલેસ્ટિક મિસાઈલો મોકલી રહ્યું છે. હવે આમાં કોઈ શંકા નથી કે આ યુદ્ધમાં ઈઝરાયેલને કોની બાજુ હોવું જોઈએ. અમેરિકા અને નાટો દેશની જેમ યુક્રેનને સૈન્ય મદદ મોકલવાનો સમય હવે આવી ગયો છે.
ઈઝરાયેલ તરફથી નથી આવ્યું કોઈ સત્તાવાર નિવેદન
યુક્રેનને સૈન્ય સહાય અંગે ઈઝરાયેલ તરફથી હજુ સુધી કોઈ સત્તાવાર નિવેદન આવ્યું નથી. જોકે, રશિયા અને યુક્રેન વચ્ચે યુદ્ધ શરૂ થયું ત્યારથી યુક્રેનના રાષ્ટ્રપતિ ઝેલેન્સકી ઈઝરાયેલ પાસેથી મદદ મેળવવાનો પ્રયાસ કરી રહ્યા છે.
ઈઝરાયેલે સતત બચવાનો પ્રયાસ કર્યો
જોકે, યુદ્ધ દરમિયાન ઇઝરાયેલ દ્વારા ઘણી વખત યુક્રેનને માનવતાવાદી સહાય મોકલવામાં આવી, પરંતુ ડિફેન્સ સાધનો અને હથિયારોની મદદથી ઈઝરાયેલે સતત બચવાનો પ્રયાસ કર્યો. યુક્રેન ખાસ કરીને ઈઝરાયેલની મિસાઈલ ડિફેન્સ સિસ્ટમની મદદ ઈચ્છે છે, જેથી તે રશિયન એર સ્ટ્રાઈકને રોકી શકે. ગયા મહિને ઝેલેન્સકીએ કહ્યું હતું કે ઇઝરાયેલે યુક્રેનને પોતાનો બચાવ કરવા માટે કંઈ નથી આપ્યું.