પાકિસ્તાનના પૂર્વ પ્રધાનમંત્રી શાહિદ ખકાન અબ્બાસીની ધરપકડ કરાઈ છે. ગેસની આયાતના કૌભાંડ કેસમાં પાકિસ્તાનના પૂર્વ પ્રધાનમંત્રીની ધરપકડ કરવામાં આવી છે. ગેસની આયાતના કોન્ટ્રાક્ટ આપવામાં કૌભાંડ કર્યુ હોવાનો પૂર્વ પ્રધાનમંત્રી પર આરોપ છે. આથી પાકિસ્તાનની તપાસ એજન્સી NABએ અબ્બાસીની ધરપકડ કરી છે.
પૂર્વ પીએમ નવાઝ શરીફ અને પૂર્વ રાષ્ટ્રપતિ ઝરદારી બાદ પૂર્વ પીએમ અબ્બાસી સકંજામાં
શાહિદ ખકાન અબ્બાસી પૂર્વ પ્રધાનમંત્રી નવાઝ શરીફના પક્ષ PML-Nના નેતા છે. મળતી માહિતી મુજબ પૂર્વ પ્રધાનમંત્રી નવાઝ શરીફ અને પૂર્વ રાષ્ટ્રપતિ ઝરદારી પણ જેલમાં છે. પાકિસ્તાનમાં ઈમરાન ખાન સરકારે ભ્રષ્ટાચાર સામે નક્કર પ્લાન બનાવ્યો છે. જેના ભાગરૂપે પાકિસ્તાનમાં કૌભાંડોમાં સંડોવાયેલા મોટા નેતાઓની ધરપકડ કરવામાં આવી રહી છે.
નવાઝ શરીફના નેતૃત્વ વાળી સરકારમાં પેટ્રોલિયમ અને પ્રાકૃતિક ગેસ મંત્રી રહેલા અબ્બાસી પર દેશમાં એલપીજી પ્રોજેક્ટ લગાવવાના નામ પર અરબો રૂપિયાના કૌભાંડનો આરોપ છે.
અબ્બાસીને લાહોર ટોલ નાકા પરથી દબોચી લીધા
પાકિસ્તાન મુસ્લિમ લીગ-નવાઝ(પીએમએલ-એન)ના નેતા અબ્બાસીની તેવા સમયે ધરપકડ કરવામાં આવી, જ્યારે તેઓ પ્રેસ કોન્ફરન્સ કરવા માટે લાહોર જઇ રહ્યા હતા. એનએબીના અધિકારીઓએ તેમને લાહોર ટોલ નાકા પરથી દબોચી લીધા. એનએબીના ભ્રષ્ટાચાર કેસમાં તેમને સમન્સ પાઠવીને ગુરૂવારે રજૂ થવાના આદેશ આપવામાં આવ્યા હતા. પનામા પેપર મામલાનો પર્દાફાશ થયા બાદ 2017માં તત્કાલિન પ્રધાનમંત્રી નવાઝ શરીફે ખુરશી છોડ્યા બાદ અબ્બાસીએ પીએમ પદ સંભાળ્યું હતું. તેઓ ઓગસ્ટ, 2017થી મે, 2018 સુધી પ્રધાનમંત્રી રહ્યા.