દુઃખદ / IPLમાં કોમેન્ટરી કરવા આવેલા ઓસ્ટ્રેલિયાના પૂર્વ દિગ્ગજ ક્રિકેટરનું મોત

• IPLમાં પણ કમેન્ટ્રી ટીમનો હિસ્સો હતા ડીન જોન્સ 
• ડીન જોન્સે મુંબઈમાં જ અંતિમ શ્વાસ લીધા
• કમેન્ટ્રીને લઈને તેઓ ખૂબ જ પ્રસિદ્ધ હતા જોકે તેના કારણે જ ઘણા વિવાદો પણ રહ્યા 

ક્રિકેટના મહાન ખેલાડીની વિદાય 

પોતાની શાનદાર બલ્લેબાજી અને નિવૃત્તિ બાદ કમેન્ટ્રી માટે પ્રસિદ્ધ ઓસ્ટ્રેલીયાના પૂર્વ ક્રિકેટર ડીન જોન્સનું નિધન થઇ ગયું છે. ડીન જોન્સે મુંબઈમાં જ અંતિમ શ્વાસ લીધા. તેઓ સ્ટાર સ્પોર્ટ્સની કમેન્ટ્રી ટીમનો હિસ્સો હતા અને હાલમાં ટૂર્નામેન્ટ માટે કમેન્ટ્રી કરી રહ્યા હતા. તે માત્ર 59 વર્ષના હતા પરંતુ હાર્ટએટેકના કારણે તેમણે વસમી વિદાય લીધી છે. 

મુંબઈમાં લીધા અંતિમ શ્વાસ, સ્પોર્ટ્સ જગતમાં આઘાત 

નોંધનીય છે કે તેઓ પોતાની કમેન્ટ્રીને લઈને દુનિયાભરમાં ચર્ચિત છે. તેઓ હાલમાં પણ મુંબઈમાં રહીને જ આઈપીએલ માટે કમેન્ટ્રી કરી રહ્યા હતા અને તેમને પ્રોફેસર ડીનોના નામે ઓળખવામાં આવતા હતા. 

કેવો રહ્યો કરિયર 

ડીન જોન્સના કરિયરની વાત કરીએ તો તમનો જન્મ ઓસ્ટ્રેલીયાના મેલબર્નમાં થયો હતો અને તેમણે 52 ટેસ્ટ મેચ રમી જેમાં તેમણે 46.55ની એવરેજથી રન બનાવ્યા. ડીનનો શ્રેષ્ઠ સ્કોર 216 હતો, તેમણે 11 સદી ફટકારી હતી.  

આ સિવાય ડીન જોન્સે ૧૬૪ વનડે મેચ પણ રમી અને જેમાં તેમણે ધુઆંધાર 6068 રન ફટકાર્યા. જોન્સે તેમાં 7 સદી અને 46 અર્ધસદી ફટકારી. ઓસ્ટ્રેલીયામાં ડીનને પહેલા સૌથી સારા વનડે ક્રિકેટના બેટ્સમેન માનવામાં આવતા હતા. તેમણે જ ફાસ્ટ બોલરમાં પણ આગળ આવીને રમવાની શરૂઆત કરી. સાથે તેઓ રન ખૂબ જલ્દી ભાગતા હતા. 

ઘણા વિવાદો પણ રહ્યા 

ડીન જોન્સ પોતાની કમેન્ટ્રીના કારણે ખૂબ પ્રખ્યાત રહ્યા પરંતુ આ જ કમેન્ટ્રીના કારણે ઘણા વિવાદો પણ થયા. કમેન્ટ્રીમાં તેઓ ઘણી વાર એવી વાતો કહી જતા કે તે પછી વિવાદો શરુ થઇ જતા, તેમણે એક વાર સાઉથ આફ્રિકાના હાશિમ અમલાને આતંકી કહી દીધા હતા અને તે બાદ જોન્સ પર બેન લાગી ગયો હતો. જોકે તેમણે તે બદલ માફી પણ માંગી હતી.