UGC એ ઉચ્ચ શિક્ષણ માટે ભારતમાં વિદેશી યુનિવર્સિટીઓના કેમ્પસ ખોલવા માટે સંપૂર્ણ તૈયારી કરી લીધી છે.
ભારતમાં વિદેશી યુનિવર્સિટીઓના કેમ્પસ ખુલશે
નવી શિક્ષણ નીતિને વૈશ્વિક પ્લેટફોર્મ પર લાવશે
ભારતમાં કેમ્પસ સ્થાપવા માટે યુજીસીની મંજુરી
નવી શિક્ષણ નીતિ 2020 (NEP)માં ભારતના ઉચ્ચ શિક્ષણને વૈશ્વિક પ્લેટફોર્મ પર લાવવાનું કહેવામાં આવ્યું છે. NEP અનુસાર, હવે યુનિવર્સિટી ગ્રાન્ટ્સ કમિશન (UGC) એ ઉચ્ચ શિક્ષણ માટે ભારતમાં વિદેશી યુનિવર્સિટીઓના કેમ્પસ ખોલવા માટે સંપૂર્ણ તૈયારી કરી લીધી છે. ગુરુવારે યુજીસીના ચેરમેન પ્રો. એમ જગદીશ કુમારે આ માટે તૈયાર કરેલી માર્ગદર્શિકાનો ડ્રાફ્ટ મીડિયા સાથે શેર કર્યો હતો. આ માર્ગદર્શિકામાં, વિદેશી યુનિવર્સિટીઓએ ભારતમાં તેમના કેમ્પસ સ્થાપવા માટે કયા નિયમોનું પાલન કરવું પડશે તેની સંપૂર્ણ માહિતી આપવામાં આવી છે.
ભારતના નીતિ નીયામોનું પાલન કરવું પડશે
પ્રો. એમ. જગદીશ કુમારે જણાવ્યું હતું કે અહીં કેમ્પસ સ્થાપવા માટે સૌ પ્રથમ વિદેશી યુનિવર્સિટીઓએ યુજીસીની મંજૂરી લેવી પડશે. આ મંજૂરી માટે, તેઓએ યુજીસીના તમામ નિયત નિયમોનું પાલન કરવું પડશે. ભારતીય વિદ્યાર્થીઓની સાથે વિદેશી વિદ્યાર્થીઓ પણ તે કેમ્પસમાં અભ્યાસ કરી શકશે, પરંતુ પ્રવેશ નિયમો અંગે તેમણે કહ્યું કે આ માટે તેઓ પોતાની પ્રક્રિયા અપનાવી શકે છે.
ટોચની 500 યુનિવર્સીટીને મળશે મંજુરી
તેમણે કહ્યું કે વિશ્વની ટોચની 500 વિદેશી યુનિવર્સિટીઓની રેન્કિંગમાં આવનારી સંસ્થાઓને જ અહીં કેમ્પસ ખોલવાની મંજૂરી આપવામાં આવશે. અહીં તેઓ નિયમિત અભ્યાસક્રમો કરશે, તેથી તેમની ફેકલ્ટી પણ નિયમિત રહેશે. તે મધ્ય સેમેસ્ટરમાં છોડી શકશે નહીં. આ સિવાય કેમ્પસમાં મહિલાઓની સુરક્ષા અને રેગિંગને લઈને રાજ્ય અને UGCની ગાઈડલાઈનનું પાલન કરવાનું રહેશે. તેઓએ માત્ર ભારતીય કાયદાનો અમલ કરવાનો છે.
માર્ગદર્શિકા વેબસાઈટ પર મુકવામાં આવશે
એટલું જ નહીં, તમામ ટોચની વિદેશી યુનિવર્સિટીઓ કે જેઓ અહીં ભારતના કેમ્પસમાં શિક્ષણ આપશે, તેઓએ ખાતરી કરવી પડશે કે તેમના શિક્ષણની ગુણવત્તા તેમના મુખ્ય કેમ્પસ જેવી જ છે. પ્રો. એમ. જગદીશ કુમારે જણાવ્યું હતું કે ભારતમાં વિદેશી યુનિવર્સિટીઓના કેમ્પસ શરૂ થયા બાદ ઉચ્ચ શિક્ષણનું સ્વરૂપ બદલાશે. તેનાથી વિદ્યાર્થીઓને ઘણો ફાયદો થશે. તેમણે કહ્યું કે વિદેશી યુનિવર્સિટીના કેમ્પસ ખોલવા માટે તૈયાર કરાયેલ ડ્રાફ્ટ માર્ગદર્શિકા આજે 5 જાન્યુઆરીએ બપોરે 1 વાગ્યે UGCની વેબસાઇટ પર અપલોડ કરવામાં આવશે.