આગાહી / મધ્ય ગુજરાત પર વરસાદનું સંકટ યથાવત, વડોદરા માટે 36 કલાક ભારે

આ વિસ્તારમાં વરસાદનું જોર રહેશે યથાવત

ઉલ્લેખનીય છે કે, હવામાન વિભાગ દ્વારા કરવામાં આવેલ આગાહી મુજબ મધ્ય અને દક્ષિણ ગુજરાતમાં અતિભારે વરસાદ વરસી શકે છે. તો સૌરાષ્ટ્રમાં પણ ધોધમાર વરસાદ પડી શકે છે. જ્યારે આણંદ,પંચમહાલ,છોટા ઉદેપુર અને દાહોદમાં ભારે વરસાદ વરસશે. તો નવસારી, સુરત, ભરૂચ, તાપી અને વલસાડમાં પણ વરસાદનું જોર યથાવત રહેશે. આમ,હજુ 2 દિવસ વરસાદી સિસ્ટમ યથાવત રહેશે તેવી આગાહી હવામાન વિભાગે કરી છે. 

સૌરાષ્ટ્રમાં ધોધમાર વરસાદની આગાહી

હવામાન ખાતાએ ભારે વરસાદની આગાહી કરતા જણાવ્યું હતું કે, મધ્ય ગુજરાતની સાથે સૌરાષ્ટ્રમાં પણ ધોધમાર વરસાદ પડવાની સંભાવના છે. જો કે, ગત સાંજે સુરેન્દ્રનગર જિલ્લાના લખતર તાલુકામાં ગણતરીના કલાકોમાં 2 ઇંચથી વધુ વરસાદ પડતા નીચાણવાળા વિસ્તારોમાં પાણી ભરાઇ ગયા હતા. 

વીજ પુરવઠા માટે હેલ્પલાઇન નંબર જાહેર કરાયો 
 
વડોદરામાં વીજ પુરવઠા માટે હેલ્પલાઇન નંબર જાહેર કરવામાં આવ્યો છે. વીજળીની મુશ્કેલી માટે હેલ્પલાઇન નંબર1800 233 2670  જાહેર કરાયો છે. જ્યારે વ્હોટ્સએપ નંબર 99252 18002 જાહેર કરવામાં આવ્યો છે. 

જો કે 8200 ટ્રાન્સફોર્મર્સમાંથી માત્ર 117 ટ્રાન્સફોર્મર્સ જ બંધ હોવાનો દાવો MGVCL કરી રહ્યું છે. ત્યારે વીજ ફરિયાદોના નિરાકરણ માટે MGVCLની 92 ટીમો તૈનાત કરી દેવાઇ છે.

ભારે વરસાદની આગાહી 

વડોદરાવાસીઓની મુશ્કેલીમાં ફરી વધારો થયો છે. શહેરમાં ફરી એક વખત વરસાદની શરૂઆત થતા શહેરીજનોમાં ચિતા જોવા મળી રહી છે. શહેરના અનેક વિસ્તારોમાં હજી સુધી પાણી સુકાયા નથી. ત્યારે હવે ફરી વરસાદ વરસી રહ્યો છે. હવામાન વિભાગે વડોદરામાં ભારે વરસાદની આગાહી કરી છે. ત્યારે હવે વરસાદ થતા વડોદરાવાસીઓ ચિંતિત થયા છે. 

સુરતમાં સાંબેલાધાર

હાલમાં ચોમાસાની ઋતુને લઇ સમગ્ર રાજ્યમાં વરસાદી (rain) માહોલ છવાઇ ગયો છે. ત્યારે મધ્ય ગુજરાત અને દક્ષિણ ગુજરાતમાં સતત વરસાદ પડી રહ્યો છે. સુરતના ઓલપાડમાં 8 કલાકમાં 12 ઇંચ વરસાદ પડ્યો છે. જ્યારે ઉમરપાડામાં 9 ઇંચ અને કામરેજમાં 5 ઇંચ વરસાદ પડ્યો છે. તો આણંદના ખંભાતમાં 9 કલાકમાં 13 ઇંચ વરસાદ ખાબક્યો છે. જ્યારે ધરમપુર, વઘઇ અને હાંસોટમાં 5 ઇંચ વરસાદ પડ્યો છે. તો વાપી, માંગરોળ અને સુરત શહેરમાં 5 ઇંચ વરસાદ પડ્યો છે. જ્યારે વાંસદા, કપડવંજ અને પારડીમાં 4 ઇંચ વરસાદ નોંધાયો છે.

ખંભાતમાં બારે મેઘ ખાંગા

ખંભાતની (khambhat) જો વાત કરીએ તો શહેરમાં સવારથી જ મેધરાજાએ ધમાકેદાર એન્ટ્રી મારી દીધી છે. સવારથી જ સતત વરસી રહેલા ધોધમાર વરસાદને પગલે શહેર જાણે કે નદીમાં ફેરવાયું હોય તેવું લાગી રહ્યું છે. બપોરના 12થી 3 સુધીમાં સવા નવ ઇંચ જેટલો વરસાદ ખાબક્યો હતો અને આખા દિવસ દરમિયાનની જો વાત કરીએ તો 13 ઇંચ જેટલો વરસાદ વરસ્યો છે. જેને ધ્યાનમાં રાખતા તંત્ર હાઇ એલર્ટ પર આવી ગયું છે.