રાજ્યમાં મહત્તમ તાપમાનનો પારો 32 ડિગ્રીએ પહોંચતા લોકોએ રાહત અનુભવી છે. હવામાન વિભાગના જણાવ્યા અનુસાર, નવું વેસ્ટર્ન ડિસ્ટર્બન્સ સક્રિય થતાં રાજ્યના મોટાભાગના શહેરોમાં રાતે ઠંડી અને દિવસે ગરમી અનુભવાશે.
રાજ્યના મહતમ તાપમાનમાં વધારો થતા ઠંડીમાં ઘટાડો
ગુજરાતમાં મહતમ તાપમાન 32 ડિગ્રી નોંધાયું
હિમાલય વિસ્તારમાં નવું વેસ્ટર્ન ડિસ્ટર્બન્સ સક્રિય
ગુજરાતમાં આ શિયાળામાં કાતિલ ઠંડીએ લોકોને રીતસરના ધ્રુજાવી દીધા હતા. ઉત્તર ભારતના પર્વતીય રાજ્યોમાં પડેલી હિમવર્ષા અને ઉત્તર દિશાના ઠંડાગાર શીત પવનોએ લોકોને હાડ થીજવતી ઠંડીનો અહેસાસ કરાવ્યો હતો. જોકે, હવે કાતિલ ઠંડીનો પ્રકોપ કંઈક અંશે ઘટ્યો છે. ત્યારે હવામાન વિભાગે જણાવ્યું છે કે, હિમાલય વિસ્તારમાં વધુ એક વેસ્ટર્ન ડિસ્ટર્બન્સ સક્રિય થઈ રહ્યું છે.
બેવડી ઋતુ અનુભવાશે
વેસ્ટર્ન ડિસ્ટર્બન્સની અસર અમદાવાદ સહિત અનેક જિલ્લામાં વર્તાશે. રાત્રે ઠંડી અને દિવસે ગરમી અનુભવાશે. રાજ્યમાં આગામી દિવસોમાં ગરમીમાં સાધારણ વૃદ્ધિ થવાની શક્યતા છે. નિષ્ણાતો અનુસાર, તાપમાનમાં થઇ રહેલા ફેરફારને લીધે રાત્રે ઠંડીનો ચમકારો જોવા મળશે, જ્યારે દિવસે ગરમીને લીધે બેવડી ઋતુ અનુભવાશે.
4 દિવસથી ગરમીમાં સાધારણ વધારો થશે
હવામાન વિભાગના જણાવ્યા મુજબ, આગામી ત્રણ દિવસ ગુજરાતમાં સરેરાશ લધુત્તમ તાપમાન 3 ડિગ્રી જેટલું વધતાં ઠંડીમાં ઘટાડો થશે. આગામી ચાર દિવસથી ગરમીમાં સાધારણ વધારો થવાની સંભાવના છે. ફેબ્રુઆરીના બીજા સપ્તાહમાં કાળઝાળ ગરમી પડવાની આગાહી કરવામાં આવી છે. એટલું જ નહીં, આ વખતે મહત્તમ તાપમાન 37 ડિગ્રી આસપાસ પહોંચશે. ફેબ્રુઆરીના અંતમાં હવામાનમાં પલટો આવશે. માર્ચ મહિનામાં હવામાનમાં ભારે પલટાની શક્યતા જોવાઈ રહી છે.
આ વર્ષે ઉનાળો આકરો રહેશેઃ અંબાલાલ પટેલ
હવામાન નિષ્ણાત અંબાલાલ પટેલનું અનુમાન છે કે, આ વર્ષે ઉનાળો આકરો રહેશે અને માર્ચ મહિનામાં આકરી ગરમી રહેશે. 4 માર્ચથી ગરમી વધશે. માર્ચ મહિનામાં 40 ડિગ્રી તાપમાન પહોંચી જશે. 25થી 26 માર્ચ દરમિયાન દરિયા કિનારે ભારે પવન ફૂંકાશે.
લઘુતમ તાપમાન 2 ડિગ્રી ગગડ્યું
શનિવારે અમદાવાદનું લઘુતમ તાપમાન 2 ડિગ્રી ગગડીને 10.7 ડિગ્રી નોંધાયું હતું, જે સામાન્ય તાપમાન કરતા બે ડિગ્રી જેટલું ઓછું હોવાથી લોકોએ ગુલાબી ઠંડી અનુભવી હતી. સમગ્ર રાજ્યમાં 7.0 ડિગ્રી સાથે નલિયામાં સૌથી વધુ ઠંડી તેમજ 34.0 ડિગ્રી સાથે ભુજમાં સૌથી વધુ ગરમી નોંધાઇ હતી.