ધનિકો / દુનિયાના ટોપ-500 ધનકુબેરોને થોડા જ સમયમાં ભયંકર નુકસાન, 100 લાખ કરોડથી વધારે ડૂબ્યાં, જાણો કારણ

• મોંઘવારી અને વ્યાજદરના લીધે ઘનીકોની સંપતિ ઘટી 
• ગયા વર્ષે સંપતિમાં વધારો જોવા મળ્યો 
• રિયલ એસ્ટેટ માર્કેટમાં મંદીનો માહોલ 

સંપતિમાં ઘટાડો 
ચાલુ વર્ષમાં અત્યાર સુધીનો સમય દુનિયાભરના ધનિકો માટે ભારે રહ્યો છે. શેરબજારમાં ઘટાડાને કારણે તેમની સંપત્તિમાં મોટો ઘટાડો જોવા મળી રહ્યો છે. બ્લૂમબર્ગ બિલિયોનેર્સ ઇન્ડેક્સ અનુસાર આ વર્ષે વિશ્વના 500 સૌથી ધનિક લોકોની સંપત્તિમાં 109.27 લાખ કરોડ રૂપિયા (1.4 ટ્રિલિયન ડોલર)નો ઘટાડો થયો છે. એકલા સોમવારે જ 206 અબજ ડોલર ડૂબી ગયા હતા.

મોંઘવારી વધી 
ઊંચા વ્યાજદર અને મોંઘવારીને કારણે વિશ્વભરના શેરબજારમાં જે ભારે ઘટાડો થયો છે તેનું આ જ પરિણામ છે. મંગળવારે જાહેર કરવામાં આવેલા કેપજેમિની વર્લ્ડ વેલ્થ રિપોર્ટ અનુસાર આ ટ્રેન્ડ ગત વર્ષની સરખામણીએ ઊંધું છે. ગયા વર્ષે શેરબજારમાં આવેલી તેજીએ વિશ્વભરના ધનિકોને વધુ અમીર બનાવ્યા હતા. ગયા વર્ષની તેજીએ વિશ્વની અમીરોની વસ્તીમાં 8 ટકાનો વધારો કર્યો હતો. સાથે જ ઉત્તર અમેરિકામાં અમીરોની સંખ્યામાં 13 ટકાનો વધારો થયો છે. આંકડા મુજબ એશિયા-પ્રશાંતમાં અમીરોની સંખ્યામાં 4.2 ટકાનો વધારો થયો છે.

ટોપ-5 અમીરોએ કેટલા અબજ ડોલર ગુમાવ્યા
આ કડાકામાં વિશ્વના ટોચના પાંચ ધનિકોને 345 અબજ ડોલરથી વધુનું નુકસાન થયું છે. ચીનની ટેક કંપની  Binance ના સીઈઓ ચાંગપેંગને સૌથી વધુ નુકસાન થયું છે. ચાંગપેંગ ઝાઓને 85.6 અબજ ડોલરની સંપત્તિનું નુકસાન થયું છે. બીજા નંબર પર એલોન મસ્ક છે, જેને 73.2 અબજ ડોલરનું નુકસાન થયું છે. જેફબેજોસ 65.3 અબજ ડોલરની ખોટ સાથે ત્રીજા નંબરે છે. ફેસબુકના ઝુકરબર્ગ 64.4 અબજ ડોલરનું નુકસાન કરીને ચોથા સ્થાને છે. બર્નાર્ડ આર્નોલ્ટ 56.8 અબજ ડોલરના નુકસાન સાથે પાંચમા નંબરે છે.

ક્રિપ્ટોકરન્સીમાં પણ જોવા મળ્યો કડાકો 
ચીન દ્વારા ટેક કંપનીઓ પર કડક કાર્યવાહી અને રિયલ એસ્ટેટ માર્કેટની મંદી આ ઘટાડાના મુખ્ય કારણો હતા. સાથે જ અમેરિકી બજારોમાં તેજી અને ક્રિપ્ટોકરન્સીના ઘટવાના કારણ પણ આ માટે જવાબદાર છે. અગાઉ ક્રિપ્ટોકરન્સી અને શેર બજારે સંપત્તિમાં વધારો કર્યો હતો, ત્યારે હવે રિવર્સ ટ્રેન્ડ ચાલી રહ્યો છે. મોંઘવારીમાં તેજી આવી છે, જેથી એ વાત પર ચિંતા થઇ રહી છે કે ફેડરલ રિઝર્વ કેટલી ઝડપથી વ્યાજદરમાં વધારો કરશે.