ફોર્બ્સ દ્વારા જાહેર કરાયેલી અબજોપતિઓની 2020ની સૂચિ મુજબ એમેઝોનના સ્થાપક અને સીઈઓ જેફ બેઝોસ સતત ત્રીજા વર્ષે વિશ્વના સૌથી ધનિક વ્યક્તિ રહ્યા છે. ગયા વર્ષે તેમની કુલ સંપત્તિ 113 અબજ ડોલર હતી. ઝૂમના સ્થાપક પણ આ સૂચિમાં સ્થાન બનાવવામાં સફળ રહ્યા છે. રિલાયન્સના ચેરમેન મુકેશ અંબાણી ભારતના સૌથી ધનિક વ્યક્તિ છે.
મુકેશ અંબાણી 21માં સ્થાને છે
લગભગ 36.8 અબજ ડોલરની કુલ સંપત્તિ સાથે મુકેશ અંબાણી ફોર્બ્સની વૈશ્વિક સૂચિમાં 21 ક્રમે છે, જો કે હવે તેમની સંપત્તિ 45 અબજ ડોલરની નજીક પહોંચી ગઈ છે. ભારતમાંથી આ યાદીમાં અન્ય ધનિકો શેરબજારના દિગ્ગજો છે. ડી માર્ટના સ્થાપક અને ઉદ્યોગપતિ રાધાકૃષ્ણ દમાણી 78માં ક્રમે છે. આ ઉપરાંત ભારતના એચસીએલના સ્થાપક શિવ નાદર 103માં, ઉદય કોટક 129માં અને સુનિલ ભારતી મિત્તલ આ વૈશ્વિક યાદીમાં 157માં સ્થાને છે.
આ ભારતમાં ટોચના 5 ધનિકો છે
ફોર્બ્સની યાદી મુજબ રિલાયન્સ ઇન્ડસ્ટ્રીઝ ના ચેરમેન મુકેશ અંબાણી ભારતના સૌથી ધનિક વ્યક્તિ છે. જો કે તેમની સંપત્તિ એક વર્ષ પહેલાની તુલનામાં 13.2 અબજ ડોલર ઘટી છે.
શેરબજારના દિગ્ગજ રાધાકૃષ્ણ દમાણીએ ભારતમાં બીજા ક્રમે સ્થાન મેળવ્યું છે, જેમની કુલ સંપત્તિ 13.8 અબજ ડોલર છે. એચસીએલના સ્થાપક શિવ નાદર 11.9 અબજ ડોલરની સંપત્તિ સાથે ત્રીજા ક્રમે છે, કોટક મહિન્દ્રા ગ્રુપના ઉદય કોટક 10.4 અબજ ડોલરની સંપત્તિ સાથે ચોથા અને ગુજરાતના ઉદ્યોગપતિ ગૌતમ અદાણી 8.9 અબજ ડોલરની સંપત્તિ સાથે પાંચમાં ક્રમે છે.
આ યુવા બિઝનેસમેનની એન્ટ્રી
આ વખતે ઘણા નવા ભારતીયોએ આ યાદીમાં સ્થાન બનાવીને પોતાની શક્તિ બતાવી છે. આમાં સૌથી વધુ ચર્ચા 39 વર્ષના બૈજુ રામચંદ્રનની છે. એક સમયે ગણિતના શિક્ષક રામચંદ્રનની એજ્યુટેક કંપની BYJUsએ કમાલ કરી દીધો છે. કંપનીનું વેલ્યુએશન લગભગ 8 અબજ ડોલર સુધી પહોંચી ગયું છે અને રામચંદ્રનની પોતાની સંપત્તિ લગભગ 1.8 અબજ ડોલર છે.
જેફ બેઝોસ ની પત્ની છૂટાછેડાના વળતરની રકમ મેળવીને અબજોપતિ બની
પત્નીથી છૂટાછેડા લીધા બાદ બેઝોસે 40 અબજ ડોલરનું વળતર ચૂકવવું પડ્યું હતું. ગયા વર્ષે તેમની કુલ સંપત્તિ 18 અબજ ડોલર ઘટીને 113 અબજ ડોલર થઈ ગઈ છે. આ છતાં તેઓ ટોચ પર છે. ગયા વર્ષે તેમની કંપનીના શેરમાં 15 ટકાનો વધારો થયો હતો, જેના કારણે તેમણે અ નુકસાનની રકમ વસૂલ કરી લીધી હતી.
આ વળતરને કારણે જ બેઝોસની છૂટાછેડા લીધેલી પત્ની, મેકેન્ઝી બેઝોસ, પ્રથમ વખત આ યાદીમાં સ્થાન બનાવવામાં સફળ થઈ છે. સમાધાન હેઠળ તેમને એમેઝોનના શેરનો મોટો હિસ્સો મળ્યો છે. ફોર્બ્સના અબજોપતિની યાદીમાં તે 22માં ક્રમે છે.
ઝૂમ એપ્લિકેશને મચાવી ધૂમ
કોરોના સંકટ સમયે પ્રખ્યાત બનેલા વીડિયો કોન્ફરન્સિંગના ઝૂમ સોફ્ટવેરના સ્થાપક અને સીઈઓ એરિક યુઆન આ સૂચિમાં પ્રથમ વખત જોડાયા છે. તેમની 5.5 અબજ ડોલરની સંપત્તિ સાથે તેઓ 293માં ક્રમે છે.
ફોર્બ્સ છેલ્લા 34 વર્ષથી આ સૂચિ બહાર પાડી રહ્યું છે. ફોર્બ્સના જણાવ્યા અનુસાર, આ વર્ષે માર્ચના પહેલા પખવાડિયામાં કોરોના વાયરસના આતંકને કારણે અબજોપતિઓની યાદીમાંથી 226 ધનિકો બહાર નીકળી ગયા હતા. ફોર્બ્સે કુલ 2,095 અબજોપતિઓની માહિતી આપી છે.
માઇક્રોસોફ્ટના સ્થાપક બિલ ગેટ્સ 98 અબજ ડોલરની સંપત્તિ સાથે આ યાદીમાં બીજા ક્રમે છે. તેમની કુલ સંપત્તિમાં 1.5 અબજ ડોલરનો વધારો થયો છે. પીઢ રોકાણકાર વોરેન બફેટ આ વખતે ત્રીજા સ્થાનેથી ચોથા સ્થાને આવી ગયા છે. ત્રીજા સ્થાને લક્ઝરી કંપની એલવીએમએચના ચેરમેન અને સીઈઓ બર્નાર્ડ આર્નોલ્ટ આવ્યા છે,
એલિસ વોલ્ટન વોલમાર્ટ પરિવાર સાથે સંકળાયેલી વિશ્વની સૌથી ધનિક મહિલા છે. તેમની કુલ સંપત્તિ 54.4 અબજ ડોલર છે, તે આ યાદીમાં નવમા સ્થાને છે.