અમદાવાદ / ટ્રમ્પના સ્વાગતમાં જનમેદની ભેગી કરવા જુઓ ભાજપ નેતાઓને કેટલો ટાર્ગેટ અપાયો

• ટ્રમ્પના આગમનની તડામાર તૈયારી
• વિધાનસભા બેઠકદીઠ ચાર હજારથી વધુ લોકોને લાવવાની જવાબદારી અપાઈ
• મનપામાં મચી દોડધામ 

ડોનાલ્ડ ટ્રમ્પના નમસ્તે ટ્રમ્પ કાર્યક્રમને વધુ ભપકાદાર બનાવવા માટે તંત્ર રાત-દિવસ કામે લાગ્યું છે. બીજી તરફ ડોનાલ્ડ ટ્રમ્પના રોડ શો માટે લોકોની ભીડ એકત્ર કરવા શાસક ભાજપ પક્ષે કમર કસી છે. એક અંદાજ મુજબ રોડ શો માટે એક લાખથી વધુ જનમેદની એકઠી કરાશે. 

ભાજપના કર્તાધર્તાઓ ભારે જહેમત ઉઠાવી રહ્યા છે

મ્યુનિ. કોર્પોરેશનમાં ભાજપનું શાસન હોઇ નમસ્તે ટ્રમ્પ કાર્યક્રમને યાદગાર બનાવવા માટે શહેર ભાજપ તેમજ મ્યુનિ. ભાજપના કર્તાધર્તાઓ ભારે જહેમત ઉઠાવી રહ્યા છે. મ્યુનિ. કોર્પો.માં ભાજપના ૧૪ર કોર્પોરેટર છે અને આ તમામ કોર્પોરેટરોને રોડ શોના રૂટ પર શહેરભરમાંથી લોકોને એકઠા કરી રોડ શોને વધુ ભવ્ય બનાવવાની જવાબદારી સોંપાઇ છે. 

ચાર હજાર લોકોને રોડ શો માટે લાવવાની ફરજ

બીજી તરફ શહેર ભાજપ દ્વારા પણ અમદાવાદમાં પક્ષનું પ્રતિનિધિત્વ કરતા ૧ર ધારાસભ્ય સહિત અન્ય વોર્ડ પ્રમુખથી લઇ પક્ષના કાર્યકરોને રોડ શો દરમ્યાન વધુ ને વધુ લોકોને એકઠા કરવાની તાકીદ કરાઇ છે. એક વિધાનસભા બેઠક હેઠળ ઓછામાં ઓછા ચાર હજાર લોકોને રોડ શો માટે લાવવાની ફરજ સોંપાઇ છે.