તમારા કામનું / સ્ટાર્ટઅપ કંપની માટે સૌથી બેસ્ટ છે આ સરકારી સ્કીમ, ગેરેન્ટી વગર મળશે લોન અને બીજા પણ ઘણા ફાયદા

• સ્ટાર્ટઅપ કંપની માટે સૌથી બેસ્ટ સ્કીમ 
• ગેરેન્ટી વગર મળશે લોન 
• મળશે બીજા પણ ઘણા ફાયદા 

દેશમાં સ્ટાર્ટઅપ્સને પ્રોત્સાહન આપવા માટે, સરકારે ક્રેડિટ ગેરંટી સ્કીમ (CGSS)ને મંજૂરી આપી છે. આ સ્કીમ હેઠળ સ્ટાર્ટઅપ કંપનીઓને કોઈપણ ગેરંટી વિના 10 કરોડ રૂપિયા સુધીની લોન આપી શકાય છે. સરકારે આ યોજનાનું જાહેરનામું પણ બહાર પાડ્યું છે.

ડિપાર્ટમેન્ટ ફોર પ્રમોશન ઓફ ઈન્ડસ્ટ્રી એન્ડ ઈન્ટરનલ ટ્રેડ (DPIIT) એ એક નિવેદનમાં જણાવ્યું છે કે 6 ઓક્ટોબરે અથવા તે પછી મંજૂર કરાયેલી લોન આ યોજના માટે પાત્ર હશે. આ યોજના હેઠળ, સ્ટાર્ટઅપ કંપનીઓની નાણાકીય જરૂરિયાતોને પહોંચી વળવા માટે નિશ્ચિત સમયગાળા માટે લોન આપવામાં આવશે.

કોણ લઈ શકે આ યોજનાનો લાભ?
જણાવી દઈએ કે ક્રેડિટ ગેરંટી સ્કીમ હેઠળ ફક્ત તે જ સ્ટાર્ટઅપ કંપનીઓને લોન મળશે, જે ડીપીઆઈઆઈટીની સૂચના અનુસાર અથવા સમય સમય પર તેમાં થતા ફેરફારો અનુસાર સ્ટાર્ટઅપની વ્યાખ્યા હેઠળ આવશે. સરકારના આ પગલાથી દેશની સ્ટાર્ટઅપ કંપનીઓને પણ મૂડી એકત્ર કરવામાં મદદ મળશે. આ ક્રેડિટ સુવિધા અન્ય કોઈપણ ગેરંટી યોજના હેઠળ કવર નહીં કરી શકાય.

એક ટ્રસ્ટની સ્થાપના કરશે સરકાર
આ યોજના માટે ભારત સરકાર ટ્રસ્ટ અથવા ફંડની સ્થાપના કરશે. આ ટ્રસ્ટ લોન માટે ગેરંટી તરીકે કામ કરશે. તેનું સંચાલન નેશનલ ક્રેડિટ ગેરંટી ટ્રસ્ટી કંપનીના બોર્ડ દ્વારા કરવામાં આવશે.

ટ્રસ્ટની જવાબદારી સ્ટાર્ટઅપને આપવામાં આવેલી લોનના ડિફોલ્ટના કિસ્સામાં ધિરાણ આપનાર બેંકને ચુકવણીની ખાતરી આપવાની છે. તેનો હેતુ યોગ્ય ઉધાર લેનારાઓને આપવામાં આવેલી લોનમાં ડિફોલ્ટની સ્થિતિમાં ચુકવણીની ખાતરી આપવાનો છે. આ માટે તે સ્ટાર્ટઅપ્સ પાત્ર હશે જે સ્થિર આવક કમાઈ રહ્યા છે.

અત્યાર સુધીમાં 100 સ્ટાર્ટઅપ બની ચૂક્યા છે યુનિકોર્ન 
લોન મેળવવા માટે સ્ટાર્ટઅપના માસિક સ્ટેટમેન્ટનું છેલ્લા 12 મહિનાનું ઓડિટ કરવામાં આવશે. ઉપરાંત, આવા સ્ટાર્ટઅપ્સે કોઈપણ લોનમાં ડિફોલ્ટ ન હોવું જોઈએ. આ ઉપરાંત તે કંપનીને આરબીઆઈ દ્વારા એનપીએની સૂચિમાં મૂકવી જોઈએ નહીં. લોન માટે મેમ્બર ઈન્સ્ટીટ્યુશન (MI)ની રચના કરવામાં આવશે. જેમાં બેંકો અને નાણાકીય સંસ્થાઓનો સમાવેશ થશે. 

છેલ્લા કેટલાક વર્ષોમાં સ્ટાર્ટઅપ્સને સરકાર તરફથી ઘણી મદદ મળી રહી છે. જેના કારણે અત્યાર સુધીમાં 100 સ્ટાર્ટઅપ યુનિકોર્ન બની ગયા છે. જે સ્ટાર્ટઅપ્સનું મૂલ્ય એક અબજ ડોલર છે તેને યુનિકોર્ન કહેવામાં આવે છે. સ્ટાર્ટઅપ કલ્ચરને પ્રોત્સાહિત કરવા માટે, 5-6 વર્ષમાં જિનેસિસ પ્રોગ્રામ હેઠળ 10,000 થી વધુ સ્ટાર્ટઅપ્સને પ્રોત્સાહિત કરવાનો લક્ષ્યાંક નક્કી કરવામાં આવ્યો છે.