ગાંધીનગરઃ રાજ્યભરમાં દૂધની ડેરીઓમાં પાડવામાં આવેલ દરોડાને લઇ ફૂડ એન્ડ ડ્રગ વિભાગનાં કમિશ્નર એચ.જી કોશિયાએ પોતાનું નિવેદન આપતા જણાવ્યું કે "છેલ્લાં 2 દિવસમાં 218 સેમ્પલ લેવાયાં છે. ભેળસેળ કરતાં તત્વોને તંત્ર છોડવા માંગતુ નથી.
ગોંડલનાં વસાવડ ગામથી નકલી દૂધ ઝડપાયું છે. કેમિકલ દૂધનો પાઉડર કેમિકલ અને વનસ્પતિ ઓઇલ પણ મળી આવ્યું છે. જો કે હવે આ મામલે જિલ્લા-રાજ્યકક્ષાની અલગ-અલગ સ્તર સુધી કમિટિઓ પણ બનાવાશે. કલેક્ટર-ચીફ સેક્રેટરી સ્તરની મોનીટરીંગ કમિટી પણ બનાવાશે.
ઉલ્લેખનીય છે કે રાજ્યનાં ફૂડ એન્ડ સેફ્ટી વિભાગ દ્વારા સતત બે-ત્રણ દિવસોથી રાજ્યભરમાં દૂધનાં સેમ્પલો લેવાનું અભિયાન હાથ ધરવામાં આવ્યું છે. જેનાં ભાગરૂપે અરવલ્લી પોરબંદર અમદાવાદ જામનગર અને ગીરસોમનાથ જેવાં અનેક જિલ્લાઓમાં આરોગ્ય વિભાગનો સપાટો જોવા મળી રહ્યો છે.
ત્યારે ગઇ કાલે અરવલ્લી જિલ્લામાં આરોગ્ય વિભાગે ખાનગી ડેરીમાં દરોડા પાડીને દૂધનાં અનેક નમૂનાઓ લીધાં હતાં. તેમજ પોરબંદરમાં પણ ફૂડ એન્ડ ડ્રગ વિભાગે જુદી-જુદી ડેરીઓ પર જઈને સર્ચ ઓપરેશન હાથ ધરીને દૂધનાં અનેક સેમ્પલ લેવામાં આવ્યાં હતાં.
આ ઉપરાંત અમદાવાદનાં જોધપુર વિસ્તારમાં પણ આરોગ્ય વિભાગે ચેકિંગ હાથ ધરીને દૂધનાં અનેક સેમ્પલ લીધાં હતાં. જામનગર જિલ્લામાં સતત બીજા દિવસે દૂધની ડેરી પર ફૂડ એન્ડ સેફ્ટી વિભાગે દરોડા પાડ્યાં હતાં.
ફૂડ એન્ડ સેફ્ટી વિભાગે ગીર સોમનાથમાં પણ અનેક ડેરીઓ સહિત વેરાવળ અને તાલાલાની દૂધની કેટલીક ડેરીઓ પર દરોડાં પાડયાં હતાં. જો એમાં કોઈ ગેરરીતિ સામે આવશે તો તંત્ર દ્વારા કડક કાયદેસરની કાર્યવાહી હાથ ધરાશે.