સમગ્ર વિશ્વની સામે એક બહુ મોટો અને ખતરનાક પડકાર આવી રહ્યો છે. આ પડકાર હવામાં ફેલાતો એક ખતરનાક વાઈરસ હશે, જે ફક્ત 36 કલાકમાં જ આખી દુનિયામાં ફેલાઈ જશે. આ વાઈરસના કારણે દુનિયાભરમાં આઠ કરોડ લોકોના મોત થવાની આશંકા છે. વર્લ્ડ હેલ્થ ઓર્ગેનાઇઝેશન (WHO)ના પૂર્વ વડાએ આ ચેતવણી જારી કરી છે. તેમણે આ વાઈરસને અત્યાર સુધીનો સૌથી ખતરનાક ફ્લૂ (વાઈરસ) ગણાવ્યો છે. ડબ્લ્યુએચઓએ પણ આ ખતરા સામે તૈયાર રહેવા જણાવ્યું છે.
ખૂબ જ ઝડપથી ફેલાતા આ ફ્લૂ વાયરસમાં 10 કરોડ લોકોને મારવાની ક્ષમતા
સ્પેનિશ ફ્લૂ કરતા પણ અનેકગણો વધુ જોખમી અને ખતરનાક
આ ખતરા સામે રહો તૈયારઃ વર્લ્ડ હેલ્થ ઓર્ગેનાઇઝેશન (WHO)
વિશેષજ્ઞોના મતે લગભગ એક સદી પહેલાં 1918માં સ્પેનિશ ફ્લૂ રોગચાળાએ વિશ્વની એક તૃતીયાંશ વસ્તીને ચેપગ્રસ્ત કરી દીધી હતી. આ ફ્લૂને કારણે પાંચ કરોડ લોકોનાં મોત થયાં. હવે જે ફ્લૂ ત્રાટકવાનો છે તે આ સ્પેનિશ ફ્લૂ કરતા પણ અનેકગણો વધુ જોખમી અને ખતરનાક છે.
નિષ્ણાંતોનાં મતે, આ ફલૂ પણ વધુ ખતરનાક સાબિત થશે કેમ કે સ્પેનિશ ફ્લૂની સરખામણીએ આજના સમયમાં સમગ્ર દુનિયામાં વધુને વધુ લોકો એક દેશથી બીજા દેશનો પ્રવાસ કરી રહ્યાં છે. આ કારણે ફ્લૂ પહેલા કરતા વધુ જોખમી સાબિત થશે અને ફક્ત 36 કલાકમાં જ આખી દુનિયામાં ફેલાઈ જશે.
વર્લ્ડ હેલ્થ ઓર્ગેનાઇઝેશન (World Health Organization) ના પૂર્વ ચીફના નેતૃત્વ હેઠળની 'ધ ગ્લોબલ પ્રીપેર્ડનેસ મોનિટરિંગ બોર્ડ' ના આરોગ્ય નિષ્ણાંતોની ટીમે તેમનો આ ચોંકાવનારો અહેવાલ તમામ દેશોનાં નેતાઓને બચાવ કામગીરી માટે યોગ્ય અને જરૂરી પગલાં ભરવાની સલાહ સાથે મોકલી આપ્યો છે. બોર્ડ દ્વારા જારી કરાયેલા અહેવાલમાં સાફ જણાવવામાં આવ્યું છે કે, સમગ્ર દુનિયામાં ફેલાનારા આ ખતરનાક રોગચાળાની ચેતવણી ગંભીરતાથી લેવાની જરૂર છે.
વૈજ્ઞાનિકોનાં જણાવ્યાં અનુસાર, ખૂબ જ ઝડપથી ફેલાતો આ ફ્લૂ ખૂબ જોખમી છે. તેમાં 10 કરોડ લોકોને મારવાની ક્ષમતા છે. આ ઉપરાંત તેના કારણે ઘણા દેશોના અર્થતંત્ર કથળવાનું અને તેમની રાષ્ટ્રીય સુરક્ષાને અસ્થિર થવાનો મોટો ખતરો પણ તોળાઈ રહ્યો છે. નિષ્ણાંતોએ આ અહેવાલનું નામ 'અ વર્લ્ડ એટ રિસ્ક' રાખ્યું છે, જેમાં જણાવવામાં આવ્યું છે કે આ વાઈરસ (Virus) ઇબોલા જેટલો જ ખતરનાક સાબિત થઈ શકે છે. ઇબોલા જેવા જીવલેણ વાઈરસના જોખમને ધ્યાનમાં રાખીને હાલમાં કરવામાં આવી રહેલા પ્રયત્નો અપૂરતા સાબિત થયા છે.
લગભગ એક સદી પહેલા વર્ષ 1918માં ફેલાયેલા જીવલેણ વાઈરસનો ભોગ દ્વારા વિશ્વની ત્રીજા ભાગની વસ્તી બની હતી. આને કારણે ફક્ત એક મહિનાની અંદર વિશ્વભરમાં પાંચ કરોડ લોકો મૃત્યુ પામ્યા હતા. આ આંકડો પ્રથમ વિશ્વ યુદ્ધમાં થયેલા કુલ મૃત્યુ કરતાં પણ ત્રણ ગણો વધારે હતો.
આ ઇતિહાસમાં સૌથી ઝડપથી ફેલાતો અને સૌથી ઝડપથી મોત આપતો વાઈરસ હતો. મોટાભાગના વાઈરસ બાળકો, વૃદ્ધો અથવા શારીરિક રીતે અક્ષમ લોકોને અસર કરતા હોય છે. તેનાથી વિપરિત 1918નાં આ ફ્લૂનો ભોગ બનનારા સૌથી વધુ લોકો તંદુરસ્ત અને યુવાન હતાં. જર્મની, બ્રિટન, ફ્રાન્સ, સ્પેન અને અમેરિકામાં આ ફ્લૂની સૌથી વધુ અસર જોવા મળી હતી.