ટીમ ઇન્ડિયાએ ICC વર્લ્ડ કપમાં અત્યાર સુધી બીજી ટીમ પર પોતાનો દબદબો જાળાવી રાખ્યો છે.
વિરાટ કોહલીની કેપ્ટન્સીમાં ટીમ ઇન્ડિયાએ સતત 5 મેચ જીતી લીધી છે. આવુ કરનાર તે એકમાત્ર કેપ્ટન બન્યો છે. 11 પૉઇન્ટની સાથે ટીમ ઇન્ડિયા પૉઇન્ટ ટેબલમાં બીજા સ્થાને છે. ન્યૂઝીલેન્ડના પણ 11 પૉઇન્ટ છે. જોકે રનરેટ સારી હોવાથી ટીમ ઇન્ડિયા આગળ છે.
વર્લ્ડ કપ 2019માં અત્યાર સુધી ટીમ ઇન્ડિયા સાઉથ આફ્રિકા, ઓસ્ટ્રેલિયા, પાકિસ્તાન, અફધાનિસ્તાન અને વેસ્ટ ઇન્ડિઝને હરાવી ચૂકી છે. ટૂર્નામેન્ટમાં ટીમ ઇન્ડિયાની સફર શાનદાર રહી છે, પરંતુ ટીમ ઇન્ડિયામાં 3 ખેલાડી એવા છે જેમનું ફોર્મ ઘણુ નિરાશાજનક રહ્યુ છે. વિરાટ કોહલીને સેમિફાઇનલ જેવી મહત્વની મેચ પહેલા તેમના વિકલ્પ અજમાવવાની જરૂર છે. જો આવુ નહી થાય તો નબળાઇ ભારે પડી શકે છે.
વિજય શંકર:
વર્લ્ડ કપમાં ટીમ ઇન્ડિયાના નંબર 4 પર બેટિંગ કરવા માટે ટીમમાં શામેલ થનારા વિજય શંકરનું ફોર્મ ખરાબ રહ્યુ છે. નંબર 4 પર વિજય શંકરની અસફળતા કારણે ટીમ ઇન્ડિયાનું મિડલ ઓર્ડર નબળુ પડી રહ્યુ છે. જેના કારણે ટીમ ઇન્ડિયાના નીચલા ક્રમ પર દબાણ પડી રહ્યુ છે. વિજય શંકરને તક મળી હોવા છતાં પણ જોઇએ તેવુ ફોર્મ કરવામાં સફળ રહ્યો નથી. શંકરે અત્યાર સુધી 3 મેચ રમી છે. જેમાં તેણે માત્ર 58 રન કર્યા છે. વિજયના નબળા ફોર્મને કારણે દિનેશ કાર્તિકને ટીમમાં નંબર 4 પર રમાડવા માટેની માંગ થઇ રહી છે.
કે.એલ. રાહુલ:
ઓપનિંગ બેટ્સમેન કે.એલ.રાહુલ પોતાની ઇનિંગના રન મોટા સ્કોરમાં ફેરવામાં નિષ્ફળ રહ્યો છે. ક્રિઝ પર સેટ થયા પછી તે પોતાની વિકેટ ગુમાવી દે છે. રાહુલને આ વર્લ્ડ કપમાં 5 મેચમાં તક મળી હોવા છતાં ક્રિઝ પર સેટ થયા પછી મોટો સ્કોર કરવામાં નિષ્ફળ રહ્યો છે. આટલુ જ નહી તેની બેટિંગમાં શિખર ધવન જેવી આક્રમકતા પણ નથી જોવા મળી રહી. હવે રાહુલની જગ્યાએ સ્ટેન્ડબાયમાં રાખેલા રિષભ પંતને ઓપનિંગમાં અજમાવી શકાય છે.
કેદાર જાધવ:
વર્લ્ડ કપમાં કેદાર જાધવએ નિરાશ કર્યા છે. મિડલ ઓર્ડરમાં કેદાર જાધવ પર ઇનિંગ્સ રમવામાં નિષ્ફળ રહ્યો છે. જેથી ટીમ ઇન્ડિયાને આવનારી સેમિફાઇનલ મેચમાં મુશ્કેલી ઉભી થઇ છે. વેસ્ટ ઇન્ડિઝ સામે જાધવ સામે રમવાની મોટી તક હતી તેમ છતાં તે માત્ર 10 બૉલમાં 7 રન કરી શક્યો. કેદાર જાધવની જગ્યાએ રવિન્દ્ર જાડેજાને ટીમમાં લેવાની ચર્ચા થઇ રહી છે. ટીમ ઇન્ડિયા સેમિફાઇનલ નજીક છે. મિડલ ઓર્ડર મજબૂત ન થયો તો ટીમને બહુ મોટી કિંમત ચૂકવવી પડી શકે છે. કોહલી પાસે રવિન્દ્ર જાડેજા જેવો શાનદાર ખિલાડી છે.