હવામાન નિષ્ણાંત અંબાલાલ પટેલ દ્વારા વરસાદને લઈને આગાહી કરાઈ છે કે, આગામી 10 થી 15 જુલાઈ સુધી સમગ્ર રાજ્યમાં ભારેથી અતિભારે વરસાદ વરસે તેવી સંભાવના છે
હવામાન નિષ્ણાંત અંબાલાલ પટેલની વરસાદને લઈને કરી આગાહી
અરબ સાગર અને બંગાળની ખાડીમાં સક્રિય થઇ વરસાદી સિસ્ટમ
10થી 15 જુલાઇ સુધી સમગ્ર રાજ્યમાં ભારે વરસાદ આગાહી
દ.ગુજરાત અને સૌરાષ્ટ્રમાં પૂર જેવી સ્થિતિ ઉભી થશે
છેલ્લા ત્રણ દિવસોથી સમગ્ર રાજ્યભરમાં મેઘરાજા મન મૂકીને વરસી રહ્યાં છે. જેને લઈને રાજ્યના 228 તાલુકાઓમાં મેઘમહેર થઈ છે. ત્યારે હવામાન નિષ્ણાંત અંબાલાલ પટેલ દ્વારા ચોમાસા અંગે વધુ એક મોટી આગાહી કરવામાં આવી છે. હવામાન નિષ્ણાંત અંબાલાલ પટેલે જણાવ્યું હતું કે, અરબ સાગર અને બંગાળની ખાડીમાં વરસાદી સિસ્ટમ સક્રિય થતાં સમગ્ર રાજ્યમાં વરસાદી માહોલ સતત છવાયેલો રહેશે.જેને લઈને સમગ્ર રાજ્યમાં આગામી 10 થી 15 જુલાઈ સુધી ભારે વરસાદની સંભાવના છે.
મહેસાણા અને પાટણમાં થશે હળવાથી મધ્યમ વરસાદ
જેમાં દક્ષિણ ગુજરાત અને સૌરાષ્ટ્રમાં ભારેથી અતિભારે વરસાદના કારણે પૂર જેવી સ્થિતી ઉભી થઈ શકે છે.જ્યારે ઉત્તર ગુજરાતના બનાસકાંઠા, સાબરકાંઠામાં ભારે વરસાદ વકી છે. તેમજ મહેસાણા અને પાટણમાં હળવાથી મધ્યમ વરસાદની સંભાવના રહેલી છે
તિથલનો દરિયો બન્યો તોફાની
આમ આગાહીના પગલે આજે વહેલી સવારથી જ વલસાડ જિલ્લાના તિથલના દરિયામાં ભારે જોવા કરંટ મળ્યો છે. દરિયામાં કરંટને લઇ ઊંચા મોજા ઉછળ્યા છે. ઉલ્લેખનીય છે કે, છેલ્લા 24 વલસાડમાં 1.36 ઇંચ વરસાદ , પારડીમાં 3.12 ઇંચ,વાપીમાં 3.6 ઇંચ વરસાદ, ધરમપુરમાં 7.72 ઇંચ અને કપરાડામાં 8.72 ઇંચ વરસાદ પડયો છે.
કચ્છ જિલ્લામાં ભારે વરસાદના પગલે ગામડાઓમાં પાણી ઘુસ્યા
બીજી તરફ હવામાન વિભાગની ભારે વરસાદની આગાહી વચ્ચે રાજ્યભરમાં મેઘરાજા મન મૂકીને વરસી રહ્યાં છે. ત્યારે છેલ્લા 24 કલાકમાં કચ્છ જિલ્લાના નખત્રાણા, અબડાસા, લખપત તાલુકામાં ભારે વરસાદ થતાં સામાન્ય જનજીવન અસ્તવ્યસ્ત થઈ જવા પામ્યું છે. ભારે વરસાદના પગલે ગામડાઓમાં વરસાદી પાણી ઘુસ્યા છે. વાત કરીએ કચ્છના નખત્રાણા તો ધોધમાર વરસાદથી જળબંબાકાર થઈ જવા પામ્યો હતો.ભારે વરસાદના કારણે રસ્તાઓ નદીમાં ફેરવાયા, હોટલનો સામાન પાણીમાં તણાયો હતો.આમ નખત્રાણામાં છેલ્લા 24 કલાકમાં 9 ઇંચ વરસાદ ખાબક્યો.
રાજકોટના ડેમમાં આવ્યા નવા નીર
રાજકોટમાં છેલ્લા ત્રણ દિવસથી વરસી રહેલા ભારે વરસાદના કારણે આજી, ન્યારી અને ભાદરમાં નવ નીરની આવક થઈ છે. આ સાથે રાજકોટ શહેર અને ગ્રામ્યમાં સારા વરસાદથી પાણીના જળ સ્તરો ઉંચા આવ્યા છે. ઉલ્લેખનીય છે કે, રાજકોટ શહેર સહિત જિલ્લામાં સિઝનનો 10 ઈંચ જેટલો વરસાદ વરસ્યો છે.
રાજકોટની વાસાવડી નદી બે કાંઠે
રાજકોટમાં છેલ્લા 2-3 દિવસથી ભારે વરસાદ વરસી રહ્યો છે. જેને કારણે જિલ્લાના અનેક ગામમાં પૂરની સ્થિતિ સર્જાઈ છે, ત્યારે રાજકોટના વાસાવડ ગામે આવેલી વાસાવડી નદી બે કાંઠે થઇ છે. ઉપરવાસમાં પડેલા ભારે વરસાદને કારણે વાસાવડી નદી બે કાંઠે થઇ છે. જેને લઇ ગ્રામલોકોમાં ખુશીનો માહોલ જોવા મળી રહ્યો છે
નવસારીમાં પૂર્ણા નદીના જળસ્તરમાં થયો વધારો
બજી તરફ દક્ષિણ ગુજરાતમાં પણ મેઘરાજાએ મન મુકીને મેઘ મહેર વરસાવતાં પૂર્ણા નદીના જળસ્તરમાં વધારો થયો છે. જેને લઈને વહીવટી તંત્ર પણ સાબદુ થયું છે. ભારે વરસાદના કારણે નવસારીના સુપા ગુરૂકૂળ પાસે આવેલા લો લાઈન બ્રીજ પાણીમાં ગરકાવ થઈ જવા પામ્યો છે. આ સાથે કુરેલ અને સુપા ગામનો સંપર્ક તૂટ્યો છે.
પોરબંદરમાં બીજા દિવસે પણ દરિયામાં કરંટ યથાવત
સૌરાષ્ટ્રમાં પૂરની સંભવના વચ્ચે આજે વહેલી સવારથી જ દરિયામાં કરંટના કારણે ઉંચા મોજા ઉછળતાં જોવા મળ્યાં છે. જેને લઈને વહીવટી તંત્ર સાબદુ થઈ જવા પામ્યું છે. ભારે પવનના કારણે માછીમારોને દરિયો ન ખેડવા સૂચના અપાઇ છે. આ સાથે પોલીસ દ્વારા કિનારાના વિસ્તારમાં પેટ્રોલિંગ વધારી દેવામાં આવ્યું છે