હવામાન વિભાગની ભારે વરસાદની આગાહી વચ્ચે છેલ્લા 24 કલાકમાં રાજ્યના અનેક જિલ્લાઓમાં મેઘરાજાએ કહેર વરસાવતા અનેક નદીઓમાં ઘોડાપૂરની સ્થિતિ.
છેલ્લા 24 કલાકમાં રાજ્યના 221 તાલુકામાં મેઘરાજાની રમઝટ
રાજ્યમાં સૌથી વધુ પલસાણામાં 9 ઈંચ વરસાદ ખાબક્યો
બનાસકાંઠા અને સાબરકાંઠાના અનેક ગામોમાં ધોધમાર વરસાદ
ગુજરાતમાં હવામાન વિભાગે હજુ આગામી બે દિવસ અતિભારે વરસાદની આગાહી કરી છે. એવામાં છેલ્લા 24 કલાકમાં રાજ્યના 221 તાલુકામાં વરસાદે રમઝટ બોલાવી છે. જેમાં રાજ્યમાં સૌથી વધુ પલસાણામાં 9 ઈંચ વરસાદ ખાબક્યો છે. જ્યારે વ્યારામાં સવા 8 ઈંચ, ડોલવણમાં 7 ઈંચ, બારડોલીમાં 7 ઈંચ, સોનગઢમાં 6 ઈંચ, માંડવીમાં સવા 5 ઈંચ, મહુવામાં સવા 5 ઈંચ, વાલોદમાં 5 ઈંચ, નવસારીમાં 4.5 ઈંચ, ઉમરપાડામાં સવા 4 ઈંચ, મેઘરજમાં 4 ઈંચ, જલાલપોરમાં 4 ઈંચ, ધરમપુરમાં 4 ઈંચ, કપરાડામાં 3.5 ઈંચ, સુબિરમાં 3.5 ઈંચ, ચોર્યાસીમાં 3.5 ઈંચ અને કોડીનારમાં સવા 3 ઈંચ વરસાદ ખાબક્યો છે.
ગુજરાતના 8 જિલ્લામાં ઓરેન્જ અને 7 જિલ્લામાં યલો એલર્ટ
નોંધનીય છે કે, ગુજરાતમાં હવામાન વિભાગ દ્વારા આગામી બે દિવસ અતિભારે વરસાદની આગાહી કરવામાં આવી છે. હવામાન વિભાગે ગુજરાતના 8 જિલ્લામાં ઓરેન્જ અને 7 જિલ્લામાં યલો એલર્ટ આપ્યું છે. જેમાં દક્ષિણ ગુજરાતના ત્રણ જિલ્લામાં ઓરેન્જ એલર્ટ જાહેર કરવામાં આવ્યું છે. તારીખ 17 ઓગસ્ટના રોજ એટલે કે આવતીકાલે રાજ્યમાં બનાસકાંઠા, પાટણ, સાબરકાંઠા, મહેસાણા, કચ્છ, અમરેલી અને ગીર સોમનાથમાં અતિ ભારે વરસાદની આગાહી કરવામાં આવી છે. અરબી સમુદ્રમાં વેલ માર્ક લો પ્રેશર સક્રિય થતા ભારે વરસાદની હવામાન વિભાગે આગાહી કરી છે.
જુઓ આજે કયા-કયા વિસ્તારોમાં મેઘરાજાએ રમઝટ બોલાવી?
બનાસકાંઠા જિલ્લાના અનેક વિસ્તારોમાં ભારે વરસાદ
બનાસકાંઠા જિલ્લામાં ભારે વરસાદની શક્યતા વચ્ચે આજે જિલ્લાના વિવિધ વિસ્તારોમાં સારો એવો વરસાદ વરસ્યો. જેમાં અમીરગઢ, ડીસા, પાલનપુર, દાંતા અને વડગામમાં સારો એવો વરસાદ ખાબક્યો. મોટા ભાગના વિસ્તારમાં સરેરાશ દોઢ ઈંચ જેટલો વરસાદ વરસ્યો.
સાબરકાંઠાના ઉપરવાસમાં ભારે વરસાદના પગલે કરોલ નદીમાં ઘોડાપૂર આવ્યું છે. જેના લીધે નીચાણવાળા વિસ્તારોને એલર્ટ કરી દેવાયા છે. ગુહાઈ જળાશયમાં પાણીની નોંધપાત્ર આવક જોવા મળી.
અરવલ્લીમાં ભારે વરસાદના કારણે નદી કિનારાના 20થી વધુ ગામોને કરાયા એલર્ટ
અરવલ્લીના ભિલોડા અને શામળાજીમાં પણ ધોધમાર વરસાદના કારણે હાથમતી અને બુઢેલી નદીમાં ઘોડાપૂર આવ્યું. એ સિવાય લીલછા પાસેની ઇન્દ્રાસી નદીમાં પણ ઘોડાપૂર આવ્યું છે. ભારે વરસાદના કારણે સુનસર ધોધે રૌદ્ર સ્વરૂપ ધારણ કર્યું છે. આથી, નદી કિનારાના 20થી વધુ ગામોને એલર્ટ કરી દેવાયા છે.
સાબરકાંઠાની મોટા ભાગની નદીઓમાં ઘોડાપૂરની સ્થિતિ
સાબરકાંઠામાં ભારે વરસાદ વરસી રહ્યો છે. ઈડરમાં સાડા ત્રણ ઇંચ વરસાદ વરસ્યો છે. તો પ્રાંતિજમાં અડધો ઇંચ વરસાદ ખાબક્યો છે. અન્ય તમામ તાલુકાઓમાં બે ઇંચ જેટલો વરસાદ વરસ્યો છે. સાબરકાંઠાની મોટા ભાગની નદીઓમાં ઘોડાપૂર જોવા મળ્યું છે. અહીંયા વડીયાવિર અને કડીયાદરા વચ્ચેનો સંપર્ક પણ તૂટ્યો છે.
નવસારીમાં ભારે વરસાદના કારણે પૂર્ણા નદીની સપાટીમાં વધારો
નવસારી જિલ્લાના તમામ તાલુકાઓમાં વરસાદી માહોલ જામ્યો છે. નવસારી અને જલાલપોર તાલુકામાં 4.30 ઇંચ જેટલો વરસાદ વરસ્યો છે. જ્યારે અન્ય તાલુકામાં સરેરાશ 2થી અઢી ઇંચ વરસાદ નોંધાયો છે. નવસારી અને વેરાવળ ખાતે આવેલ પૂર્ણા નદીની સપાટીમાં વધારો થયો છે.
નદીની સપાટી 13 ફૂટથી વધીને હાલ 17 ફૂટે પહોંચી છે. ચીખલી સહીતના વિસ્તારોમાં વરસાદથી કાવેરી નદીમાં પાણીની આવકમાં વધારો જોવા મળ્યો છે. ચીખલી રિવરફ્રન્ટ પાસેના લો લાઈન બ્રિજ સુધી પાણી પહોંચી ગયા છે. આથી, લો લેવલનો બ્રિજ અવરજવર માટે બંધ કરી દેવાયો છે.