સુરતઃ ધોધમાર વરસાદના પગલે નદીઓમાં નવા નીરની આવક થઇ છે. બીજી બાજુ શહેરની અનેક ખાડીઓ પણ ઓવરફ્લો થઈ છે. ત્યારે હવે ભારે વરસાદના કારણે લિંબાયત વિસ્તારમાં આવેલી મીઠી ખાડી ઓવરફ્લો થઈ છે. ખાડી ઓવરફ્લો થતા આસપાસના વિસ્તારોમાં પાણી ભરાયા છે. રસ્તા પર પાણી ભરાતા સ્થાનિકો પરેશાન છે. રસ્તાઓ પાણી ભરાતા લોકો પાણીમાં ચાલવા માટે મજબૂર બન્યા છે.
કાકરાપાર ડેમ છલકાયો રમણીય દ્રશ્યો સર્જાયા
સુરત જિલ્લાનો મહત્વનો ગણાતો કાકરાપાર ડેમ છલકાયો છે. ઉપરવાસમાં પડેલા ભારે વરસાદના કારણે ડેમ ઓવરફલો થયો છે. ડેમ ઓવરફલો થતાં રમણીય દ્રશ્યો જોવા મળ્યા હતા. કાકરાપાર ડેમની સપાટી 160 ફૂટ પહોંચી છે.. હાલ ડેમનો આઉટફલો 4400 કયુસેક છે. ઉલ્લેખનીય છે કે ધોધમાર વરસાદના પગલે નદી નાળા છલકાયા છે.
બીજી વાર કીમ નદી બે કાંઠે
ત્યારે ભારે વરસાદથી કીમ નદી ફરીથી બે કાંઠે વહેતી થઇ છે. ઉપરવાસમાં પડેલા ભારે વરસાદના પગલે કીમ નદીમાં ઘોડાપૂર આવ્યું છે. ચાલુ સીઝનમાં બીજી વાર કીમ નદી બેકાંઠે વહી રહી છે. કીમ નદીનાં પાણીની આવક થતાં ગ્રામજનોમાં ખુશીનો માહોલ છવાયો હતો.અને નદીનો ધસમસતો પ્રવાહ જોવા સહેલાણીઓનો ભારે ધસારો જોવા મળ્યો હતો. બીજી તરફ ધોધમાર વરસતા વરસાદે વિરામ લેતાં લોકોએ રાહતનો શ્વાસ લીધો હતો.