વોલમાર્ટની કંપની ફ્લિપકાર્ટે પોતાની પ્રાઇવેટ બ્રાંડના મેન્યુફેક્ચરિંગનો મોટો ભાગ ચીન અને મલેશિયાથી છેલ્લા એક વર્ષમાં ભારતમાં શિફ્ટ કરી દીધો છે.
આ પગલાથી કંપનીને ખર્ચ ઘટાડવામાં અને સરકારની 'મેક ઇન ઇન્ડિયા' પહેલને સમર્થન કરવામાં મદદ મળી છે. સ્થાનિક મેન્યુફેક્ચરિંગના કારણે કંપનીને 300થી વધુ કેટેગરીમાં પોતાના પ્લેટફોર્મ પર વેચવામાં આવતી પ્રોડક્ટ્સના ભાવ ઘટાડવામાં પણ મદદ મળી છે.
ફ્લિપકાર્ટમાં પ્રાઇવેટ લેબલ બિઝનેસ હેડે જણાવ્યું હતું કે, બે વર્ષ પૂર્વે અમે અમારી તમામ ઇલેક્ટ્રોનિક્સ ચીજવસ્તુઓ ચીનથી ખરીદી રહ્યા હતા. આજે તે ઘટીને 50% થઇ ગઇ છે, જ્યારે અમે અમારી ફર્નિચર બ્રાંડ લોન્ચ કરી ત્યારે તેના માટેનો તમામ સામાન મલેશિયાથી ખરીદતા હતા, તેમાં પણ હવે 50 % ઘટાડો થઇ ગયો છે.
કંપનીની પ્રાઇવેટ બ્રાંડમાં માર્ક ક્યુ, પરફેક્ટ હોમ્સ, બિલિયન અને સ્માર્ટ બાયનો સમાવેશ થાય છે. સૂત્રોએ જણાવ્યું હતું કે કંપનીના કુલ વેચાણમાં તેનો હિસ્સો લગભગ 8% નો છે. તેમણે જણાવ્યું હતું કે પ્રાઇવેટ લેબલ માટે ઇલેક્ટ્રોનિક્સ, કન્ઝ્યુમર ડ્યુરેબલ્સ, ટેક્સટાઇલ, એન્ડ્રોઇડ ટીવી, એસી, વોશિંગ મશીન અને નાનાં એપ્લાયન્સીઝ હવે ભારતમાંથી જ ખરીદવામાં આવે છે.
તો બીજી તરફ ભારત સરકાર ગ્લોબલ ઇલેક્ટ્રોનિક્સ કંપનીઓ દેશમા મેન્યુફેક્ચરિંગ શરૂ કરવા માટે મનાવવામાં સફળ રહી છે. સ્માર્ટફોન અને બીજા મોંઘા ઇલેક્ટ્રોનિક પ્રોડક્ટ્સ પર વધારે ટેરિફ લગાવીને ભારત એપલ જેવી કંપનીઓ ભારતમાં ફોક્સકૉન અને વિંસ્ટ્રોનની સાથે મળીને આઇફોન બનાવવા માટે સફળ રહી. ફ્લિપકાર્ટના બિઝનેસ હેડે કહ્યુ કે કંપની જે 150 કેટેગરીઓની સાથે કામ કરી રહી છે, તેમાંથી 100 ભારતમાં છે.