ખૂંખાર આતંકી સંગઠન ઈસ્લામિક સ્ટેટના આકા અબુ બક્ર અલ બગદાદી પાંચ વર્ષમાં પહેલીવાર જોવા મળ્યો છે. આતંકવાદી સંગઠન ઈસ્લામિક સ્ટેટે એક વીડિયો જાહેર કર્યો છે અને તેમાં તે વાતચીત કરતો નજરે પડી રહ્યો છે.
જુલાઈ 2014 બાદ આ પહેલી એવી તક છે કે અબુ બકર અલ બગદાદીનો કોઈ વીડિયો સામે આવ્યો હોય. વીડિયોમાં ISનો આકા અલ બગદાદી કાળા રંગના કપડામાં બેસેલો છે અને તેની પાસે એક અત્યાધુનિક હથિયાર પણ નજરે પડી રહ્યું છે. વીડિયોમાં બગદાદી સિવાય અન્ય ત્રણ આતંકીઓ પણ નજરે પડી રહ્યા છે. આ ત્રણેય પણ કાળા રંગના કપડા પહેરેલા નજરે પડે છે.
વીડિયોમાં બગદાદી ત્રણેય આતંકીઓને સંબોધન કરી રહ્યો છે અને વાતચીત કરતો નજરે પડી રહ્યો છે. બગદાદી વીડિયોમાં કહી રહ્યો છે કે, બાગૂજની લડાઈ ખતમ થઈ ચૂકી છે. વીડિયો ક્યારનો છે તે અંગે હજુ સુધી સ્પષ્ટતા થઈ શકી નથી, પણ બગદાદી પૂર્વ સિરીયામાં ISના અંતિમ ગઢ બાગૂજ માટે મહિનાઓથી ચાલી રહેલી લડાઈનો ઉલ્લેખ કરે છે અને આ લડાઈ પાછલા મહિને જ ખતમ થઈ ચૂકી છે.
ઉલ્લેખનીય છે કે, આ પહેલા બગદાદી વર્ષો પહેલા મોસૂલ મસ્જિદમાં ઉપદેશ દેતો નજરે પડ્યો હતો. 2015માં બગદાદી એક હવાઈ હુમલામાં ઈજાગ્રસ્ત થયો હોવાનું પણ સામે આવ્યું હતુ. તે સમયે બગદાદી માર્યો ગયો હોય એવા સમાચાર પણ સામે આવ્યા હતા. વીડિયોમાં બગદાદી અરબી ભાષામાં વાતચીત કરી રહ્યો છે. આ વીડિયો હાલ સોશિયલ મીડિયામાં ખૂબ વાયરલ થયો છે. બગદાદી કહી રહ્યો છે કે, શ્રીલંકામાં થયેલા આતંકી હુમલો સિરીયાના બાગૂજમાં તેમની સેના પર થયેલા હુમલાનો જવાબ છે.