એક 16 વર્ષના છોકરા ઉપર એક માછલી દ્વારા એવો હુમલો કરવામાં આવ્યો જેણે તેના ગળાને વીંધી નાખ્યું. માછલીનો હુમલો એટલો ખતરનાક હતો કે થોડીવારમાં જ છોકરો તેનો જીવ ગુમાવી દે તેવી સ્થિતિ હતી.
આ ઘટના ઇન્ડોનેશિયાની છે. ફ્લાઇંગ નીડલફિશએ મોહમ્મદ ઇદુલ પર હુમલો કર્યો ત્યારે તે સુલેવેસી પ્રાંતમાં તેના માતાપિતા સાથે માછલી પકડતો હતો.
અચાનક એક માછલી ઉડતી આવી અને ઇદુલના ગળા પર હુમલો કર્યો. ડેઇલી મેઇલના અહેવાલ મુજબ આ ઘટના શનિવારની છે.
અકસ્માત થતાં જ ઇદુલને હોસ્પિટલમાં દાખલ કરવામાં આવ્યો હતો. આ ઘટનાના બે દિવસ બાદ તેની ગળાની સર્જરી કરવામાં આવી.
આ ઘટનાની તસવીરો સોશિયલ મીડિયા પર વાયરલ થઈ છે. ફોટામાં સ્પષ્ટ દેખાય છે કે માછલી કેવી રીતે ઇદુલની ગળામાંથી આરપાર પસાર થઈ ગઈ.
ઇદુલની હાલત હવે સુધરી રહી છે, પરંતુ હમણાં તેણે હોસ્પિટલમાં જ રહેવું પડશે. ડોકટરોને આશા છે કે તેનો તાવ જલ્દીથી ઓછો થવા માંડશે.
સોમવારે ત્રણ તબીબોની ટીમે 2 કલાકના ઓપરેશન દરમિયાન ઇદુલના ગળાની સર્જરી કરી હતી.
સ્થાનિક તબીબ સયાફરી કે આરીફે જણાવ્યું કે માછલીને ગળામાંથી ખૂબ કાળજીપૂર્વક દૂર કરવી પડી હતી કારણ કે માછલીથી ગળામાં એક મોટું કાણું પડી ગયું હતું.