અર્થતંત્ર / દેશની અંદાજિત નાણાંકીય ખાધ સાત જ મહિનામાં ચોંકાવનારી ટકાવારીએ

• ભારતમાં નાણાકીય ખાધ આ નાણાકીય વર્ષના પ્રથમ 7 મહિનામાં જ એટલે કે ઓક્ટોબર સુધી 7.2 લાખ કરોડ રૂપિયા જેટલી રહી છે જે આ નાણાકીય વર્ષના અંદાજ કરતા 102% જેટલી છે.
•  ટેક્સ વડે સરકારને 6.83 લાખ કરોડ રૂપિયાની આવક થઇ છે જેની સામે 16.55 લાખ કરોડ રૂપિયાનો ખર્ચ નોંધાયો છે. 

Controller General of Accounts (CGA) ના ડેટા મુજબ આવક અને ખર્ચ વચ્ચે 31 ઓક્ટોબર 2019 સુધી રૂપિયા 7,20,445 કરોડની તોતિંગ ખીણ છે. નોંધનીય છે કે આ ખાધ 2018-19ના અંદાજપત્ર કરતા 103.9% છે.

સરકારે આ વર્ષે 7.03 લાખ કરોડની ખાધનો અંદાજ માંડ્યો હતો. સરકાર આ ખાધને દેશના કુલ GDPના 3.3% જેટલી રાખવા માંગતી હતી. 

સરકારે સપ્ટેમ્બર મહિનામાં કોર્પોરેટ ટેક્સને ઘટાડવાનો નિર્ણય લીધો. નીતિકારોની યોજના કોર્પોરેટ ટેક્સને ઘટાડીને ઇન્વેસ્ટમેન્ટ વધે અને દેશમાં 6 વર્ષના તળિયે જઈ બેઠેલો 5%નો GDP દર સુધરે તેવી હતી.

કમનસીબે GDPની પીછેહઠ જારી રહી છે અને હવે તે 4.5%ની સપાટીએ આવી ગયો છે. 

આટલી થઇ છે કુલ આવક

સરકારને ઓક્ટોબર સુધી ટેક્સ અને અન્ય સંસાધનો વડે કુલ 9.07 લાખ કરોડની આવક થઇ છે. આ આવક વર્ષ 2019-20માં કુલ 19.62 લાખ કરોડ રહેશે તેવો બજેટનો અંદાજ છે. 

આટલો થયો છે ખર્ચ

કુલ ખર્ચ એપ્રિલ થી ઓક્ટોબર સુધી 16.54 લાખ કરોડ રૂપિયા જેટલો રહ્યો છે જે બજેટના આખા વર્ષના કુલ ખર્ચના અંદાજના 59.4% છે. આ ખર્ચ વર્ષ 2019-20માં કુલ 27.86 લાખ કરોડ રહેશે તેવો બજેટનો અંદાજ છે. 

જો કે CGAએ એમ પણ જણાવ્યું છે કે હાલના આંકડા ઉપરથી આખા વર્ષનો અંદાજ ન કાઢી શકાય કારણ કે હાલના ખર્ચની સામે આવતા મહિનાઓમાં આવક પણ વધશે જે સરવૈયાને સંતુલિત કરશે.