રિપોર્ટ / અમેરિકાના ઈતિહાસમાં પહેલીવાર: સૌથી વધારે ઈન્ડિયન સ્ટુડન્ટ્સને મળ્યા વિઝા, આંકડો 82000ને પાર 

• અમેરિકાએ આ વર્ષે વિશ્વમાં સૌથી વધુ ભારતીય વિદ્યાર્થીઓને વિઝા આપ્યા
• વર્ષ 2022માં યુએસએ ભારતીય વિદ્યાર્થીઓને 82 હજાર યુએસ વિઝા આપ્યા
• વર્ષ 2020-21 દરમ્યાન ભારતથી US જનારા વિદ્યાર્થીઓની સંખ્યા 1,67,582 હતી

અમેરિકાએ આ વર્ષે વિશ્વમાં સૌથી વધુ ભારતીય વિદ્યાર્થીઓને વિઝા આપ્યા છે. અમેરિકામાં ભણવા માટે યુએસ સ્ટુડન્ટ વિઝા મેળવનારાઓમાં ભારતીય વિદ્યાર્થીઓએ ચીનને પણ પાછળ છોડી દીધું છે, જે અત્યાર સુધી આ મામલે નંબર 1 હતું.  જો સંખ્યાની વાત કરીએ તો વર્ષ 2022માં યુએસએ ભારતીય વિદ્યાર્થીઓને 82 હજાર યુએસ વિઝા આપ્યા છે. આ સંખ્યા ઇતિહાસમાં અત્યાર સુધીની સૌથી વધુ છે. 

ભારતમાં યુએસ એમ્બેસી દ્વારા જાહેર કરવામાં આવેલા નિવેદનમાં કહેવામાં આવ્યું છે કે નવી દિલ્હી, ચેન્નાઈ, હૈદરાબાદ, કોલકાતા અને મુંબઈમાં યુએસ એમ્બેસીની પ્રાથમિકતા ભારતીય વિદ્યાર્થીઓને વિઝા આપવાની હતી. આ દર્શાવે છે કે આજે પણ મોટાભાગના ભારતીય પરિવારો માટે ઉચ્ચ શિક્ષણની દ્રષ્ટિએ અમેરિકા નંબર 1 દેશ છે.

અમેરિકન રાજદ્વારીએ શું કહ્યું ? 

ભારતમાં સૌથી વરિષ્ઠ અમેરિકન રાજદ્વારી પેટ્રિશિયા લાસિનાએ કહ્યું કે, અમે આ ઉનાળામાં જ 82,000 ભારતીય વિદ્યાર્થીઓને યુએસના વિઝા આપ્યા છે. આ પહેલા ક્યારેય ભારતીય વિદ્યાર્થીઓને આટલી મોટી સંખ્યામાં યુએસ વિઝા આપવામાં આવ્યા નહોતા. આ દર્શાવે છે કે, આજે પણ મોટાભાગના ભારતીય પરિવારો માટે ઉચ્ચ શિક્ષણની દ્રષ્ટિએ અમેરિકા નંબર 1 દેશ છે.

આ સાથે તેમણે ઉમેર્યું હતું કે, આ બાબતો ભારતીય વિદ્યાર્થીઓના મહત્વપૂર્ણ યોગદાનને પણ પ્રકાશિત કરે છે. યોગદાન જે બંને દેશોને લાભ આપે છે, કારણ કે આ વિદ્યાર્થીઓ તેમના અમેરિકન ભાગીદારો સાથે આજીવન સંબંધો બાંધે છે. આ આંતરરાષ્ટ્રીય ભાગીદારીને જાળવવામાં અને સુધારવામાં મદદ કરે છે.  લાસિનાએ કહ્યું, “અમે એ જોઈને ખુશ છીએ કે આટલા બધા વિદ્યાર્થીઓને વિઝા મળ્યા અને બાળકો સમયસર પોતપોતાની યુનિવર્સિટીમાં પહોંચી શક્યા. પાછલા વર્ષોમાં, કોવિડ 19 રોગચાળાને કારણે ઘણો વિલંબ થયો છે.

વિશ્વમાં ભારતીય વિદ્યાર્થીઓનું સૌથી વધુ યોગદાન 

કોન્સ્યુલર અફેર્સ મિનિસ્ટર કાઉન્સેલર ડોન હેફલિને જણાવ્યું હતું કે 'આંતરરાષ્ટ્રીય વિદ્યાર્થીઓની હિલચાલ અમેરિકન મુત્સદ્દીગીરીમાં કેન્દ્રિય છે. આમાં ભારતીય વિદ્યાર્થીઓ જેટલું યોગદાન બીજા કોઈનું નથી. જે આંતરરાષ્ટ્રીય વિદ્યાર્થીઓ અમેરિકા આવે છે, તેમાંથી 20 ટકા ભારતીય વિદ્યાર્થીઓ જ છે. ગયા વર્ષે, ઓપન ડોર્સના એક અહેવાલમાં કહેવામાં આવ્યું હતું કે, શૈક્ષણિક વર્ષ 2020-21 દરમ્યાન ભારતથી યુએસ જનારા વિદ્યાર્થીઓની સંખ્યા 1,67,582 હતી.