આજે અહીં શરૂ થયેલી પ્રવાસી દક્ષિણ આફ્રિકા અને ન્યૂઝીલેન્ડ વચ્ચેની પ્રથમ ટેસ્ટ મેચમાં આઠ મહિના પછી મેદાનમાં ઊતરેલા ન્યૂઝીલેન્ડના મેટ હેનરીએ પોતાની કરિયરનું શાનદાર પ્રદર્શન કરતાં દક્ષિણ આફ્રિકાની આખી ટીમ માત્ર ૯૫ રનમાં જ ધરાશાયી થઈ ગઈ હતી.
મેચના પ્રથમ દિવસે સાત વિકેટ લીધી
આજે મેચના પ્રથમ દિવસે હેનરીએ માત્ર ૨૩ રન આપીને સાત વિકેટ ઝડપી હતી. ટ્રેન્ટ બોલ્ટના પિતાનું અવસાન થયું હોવાથી મેટ હેનરીને પ્રથમ ટેસ્ટમાં તક મળી. આ ન્યૂઝીલેન્ડ તરફથી ટેસ્ટ ક્રિકેટમાં ત્રીજા નંબરનું સૌથી શાનદાર પ્રદર્શન છે. દક્ષિણ આફ્રિકાના ૯૫ રનના જવાબમાં આ લખાઈ રહ્યું છે ત્યાં સુધીમાં ન્યૂઝીલેન્ડે બે વિકેટે ૭૬ રન બનાવી લીધા છે. કોન્વે ૨૦ રને અને હેનરી નિકોલસ ૨૩ રને બેટિંગ કરી રહ્યા છે.
ન્યૂઝીલેન્ડનો કેપ્ટન ટોમ લાથમ ૧૫ રને થયો આઉટ
ન્યૂઝીલેન્ડનો કેપ્ટન ટોમ લાથમ ૧૫ રને ઓલિવરનો શિકાર બન્યો હતો. ત્યાર બાદ વિલ યંગ આઠ રન બનાવીને માર્કો યાનસેનની બોલિંગમાં આઉટ થયો હતો.
અગાઉ વિલિયમ્સનના સ્થાને કેપ્ટનશિપ સંભાળી રહેલા ન્યૂઝીલેન્ડના ટોમ લાથમે ટોસ જીતીને બેટિંગ કરવાનું પસંદ કર્યું હતું. બીજી જ ઓવરમાં મેટ હેનરીને દક્ષિણ આફ્રિકાને પ્રથમ ઝટકો આપતાં એલ્ગરને માત્ર એક રને ટિમ સાઉથીના હાથમાં ઝિલાવી દીધો હતો. દક્ષિણ આફ્રિકા ત્યાર બાદ એક પછી એક ઝટકા લાગવાના શરૂ થયા હતા અને એક સમયે ૫૨ રનના કુલ સ્કોર પર દક્ષિણ આફ્રિકાની અડધી ટીમ પેવેલિયનમાં પાછી ફરી હતી.
ન્યૂઝીલેન્ડના બોલર્સ મેટ હેનરી, ટિમ સાઉથી અને કાઇલી જેમસિને હવા અને પીચમાં રહેલી મદદનો ભરપૂર ફાયદો ઉઠાવી જબરદસ્ત સ્વિંગ બોલિંગનું પ્રદર્શન કર્યું હતું. શાનદાર લાઇન-લેન્થ સાથે બોલિંગ કરનારા કિવી બોલર્સને તેનો ભરપૂર ફાયદો પણ મળ્યો હતો. શરૂઆતની ચાર વિકેટ તો વિકેટકીપર અને સ્લિપમાં કેચઆઉટ દ્વારા પડી હતી. હેનરીએ સૌથી પહેલાં ડીન એલ્ગરને આઉટ કર્યા બાદ તેણે એડિન માર્કરમ (૧૫) અને રોસી વેન ડર ડુસેં (૮)ને પણ પેવેલિયનમાં મોકલી આપ્યા હતા. ત્યાર બાદ જેમસિને સેરલ એરવી (૧૦)ની વિકેટ ઝડપી હતી, જ્યારે સાઉથીએ તેમ્બા બાવુમા (૭)ને આઉટ કરી પોતાની એકમાત્ર વિકેટ ઝડપી હતી. ઝુબેર હમજાએ ૨૫ રન અને કાઇલ વેરીનેએ ૧૮ રન બનાવી થોડો ઘણો સંઘર્ષ કર્યો હતો, પરંતુ દક્ષિણ આફ્રિકાના અન્ય કોઈ બેટર મોટી ઇનિંગ્સ રમી શક્યા નહોતા.