આશ્ચર્ય / MS યુનિ.માં સિન્ડિકેટની ચૂંટણીમાં સૌ પ્રથમ વખત બની ઐતિહાસિક ઘટના, ભાજપનું પ્લાનિંગ સફળ

• વડોદરાની MS યુનિવર્સિટીની સિન્ડિકેટની તમામ બેઠકો બિનહરીફ 
• ઇતિહાસમાં પ્રથમ વખત તમામ બેઠકો બિનહરીફ થઇ 
• ચૂંટણી વગર જ સિન્ડિકેટ સભ્યો જીત્યા 

વડોદરાની MS યુનિવર્સિટીની સિન્ડિકેટની તમામ બેઠકો બિનહરીફ થઈ છે. ઈતિહાસમાં સૌ પ્રથમ વખત તમામ બેઠકો બિનહરીફ થઈ હોવાની ચર્ચા છે. ચૂંટણી વગર જ સિન્ડિકેટના સભ્યોની જીત થઈ છે. વડોદરાની MS યુનિવર્સિટીની સિન્ડિકેટની તમામ બેઠકો બિનહરીફ થવી પહેલી અને આશ્ચર્યજનક ઘટના પણ કહી શકાય છે. જો કે, શહેર ભાજપ સંગઠને મહત્વની ભૂમિકા ભજવી છે. બિનહરીફ વિજય બાદ યુનિવર્સિટીની હેડ ઓફિસ પર ઢોલ-નગારા સાથે ઉજવણી કરાઈ હતી. 

મહત્વનું છે કે, MS યુનિવર્સિટીમાં સિન્ડિકેટની 14 બેઠક માટે ચૂંટણી યોજાવાની હતી. આગામી 25 તારીખે યોજાનારી ચૂંટણીમાં ઉમેદવારી માટે આજે છેલ્લો દિવસ હતો. અને સમય સમાપ્તી બાદ તમામ બેઠક બિનહરીફ જાહેર થઈ છે. જેને લઈ 25 ફેબ્રુઆરીની ચૂંટણી ટળી છે. એક તરફ વડોદરામાં મહાનગર પાલિકાની ચૂંટણીનો માહોલ જામ્યો છે. તો બીજી તરફ યુનિવર્સિટીમાં પણ સિન્ડિકેટની ચૂંટણીનો માહોલ સર્જાયો હતો. જો કે, સિન્ડિકેટની ગત ચૂંટણીમાં ભાજપના જ બે જૂથો સામ-સામે આવી ગયા હતા. જે બાદ આ વખતે પણ સમાધાનના પ્રયાસો કરાયા છે. ભાજપ સંગઠનના પ્રયાસો આ વખતે સફળ બન્યા છે. 

માહિતી પ્રમાણે ભાજપના કાર્યાલય ખાતે એક બેઠક પણ બોલાવવામાં આવી હતી. જેમાં ભાજપના ટોચના નેતા અને બંને જૂથના આગેવાનો હાજર રહ્યા હતા. જેમાં ABVP-RSS અને સત્તાધારી જૂથ વચ્ચે બેઠકોની ફાળવણીનો પ્રસ્તાવ કરાયો હતો. જેમાં સત્તાધારી જૂથને 10 અને ABVPને 4 બેઠકનો પ્રસ્તાવ થયો હતો.