સાવધાન! / ઓમિક્રોનના નવા સબ વેરિઅન્ટ BA.4ની ભારતમાં એન્ટ્રી, આ રાજ્યમાં નોંધાયો પ્રથમ કેસ, જાણો કેટલો છે ખતરનાક

• ઓમિક્રોનના BA.4 સબ વેરિઅન્ટે ભારતમાં દસ્તક દઇ દીધી
• સબ વેરિઅન્ટ BA.4નો પ્રથમ કેસ હૈદરાબાદમાંથી મળી આવ્યો
• ઓછામાં ઓછાં 16 દેશોમાં BA.4 ના લગભગ 700 કેસ દાખલ કરવામાં આવ્યાં

એક તરફ દેશમાં સતત કોરોનાના કેસો વધી રહ્યાં છે. તો બીજી બાજુ દેશમાં કોરોનાના ઓમિક્રોનના BA.4 સબ વેરિઅન્ટ (Omicron Sub Variant BA.4) એ ભારતમાં દસ્તક દઇ દીધી છે. દેશમાં આ સબ વેરિઅન્ટનો પ્રથમ કેસ હૈદરાબાદમાંથી મળી આવ્યો છે. ગુરૂવારના રોજ કોરોના જિનોમિક સર્વિલાંસ પ્રોગ્રામ દ્વારા આ અંગેનો ખ્યાલ આવ્યો.

ભારતમાંથી BA.4 સબ વેરિઅન્ટનું વર્ણન GISAID પર 9 મેના રોજ કરવામાં આવ્યું

ભારતીય SARS-CoV-2 કંસોર્ટિયમ ઑન જીનોમિક્સ (INSACOG) સાથે જોડાયેલા વૈજ્ઞાનિકોએ કહ્યું કે, ભારતમાંથી BA.4 સબ વેરિઅન્ટનું વર્ણન GISAID પર 9 મેના રોજ કરવામાં આવ્યું હતું. તેની પુષ્ટિ કરતા ભારતીય ચિકિત્સા અનુસંધાન પરિષદના એક વૈજ્ઞાનિકે પણ જણાવ્યું કે, છેલ્લાં કેટલાંક દિવસોમાં દેશના અન્ય શહેરોમાં BA.4 ના રેન્ડમ કેસ મળ્યાનો ખ્યાલ આવ્યો છે.

SARS CoV 2 વાયરસનો આ સ્ટ્રેન દક્ષિણ આફ્રિકામાં નવા કોરોના વાયરસની એક મોટી લહેર માટે જવાબદાર રહ્યો છે અને સંક્રમણ અને રસીકરણ દ્વારા પ્રાપ્ત રોગપ્રતિકારક શક્તિને અસર કરવામાં સક્ષમ છે. જો કે, વૈજ્ઞાનિકોનું માનવું છે કે આ વર્ષે જાન્યુઆરીમાં ભારતમાં આવેલી ઓમિક્રોન વેરિઅન્ટની લહેરના કારણે ભારતીય વસ્તીમાં સારી અને વ્યાપક રોગપ્રતિકારક પ્રતિક્રિયા જોવા મળી હતી, જેના કારણે સંક્રમણની શક્યતા ઓછી છે.

વધારે ગભરાવવાની જરૂરિયાત નથી: સ્વાસ્થ્ય નિષ્ણાંત

નેશનલ સેન્ટર ફોર ડિસીઝ કંટ્રોલ સાથે જોડાયેલા અધિકારીએ જણાવ્યું કે, 'અમે આવનારા દિવસોમાં કોરોનાના કેસોમાં વધારે ઉછાળો આવવાની આશા નથી અને આ વાતની સંભાવના ખૂબ ઓછી છે કે ગંભીર કોરોનાના કારણે હોસ્પિટલમાં ભરતી થવાની સંખ્યામાં તેજીથી વૃદ્ધિ થશે.'

કોરોના પર WHOની ટેક્નિકલ લીડ, મારિયા વાન કેરખોવે જણાવ્યું કે, ઓછામાં ઓછાં 16 દેશોમાં BA.4 ના લગભગ 700 કેસ દાખલ કરવામાં આવ્યાં છે. જ્યારે BA.5 ના 300થી વધારે કેસ 17 દેશોમાં સામે આવ્યા છે. કોરોનાનો આ સબ વેરિઅન્ટ અતિ સંક્રમક જરૂર છે પરંતુ તેટલો ઘાતક સાબિત નથી થયો.