રશિયા દ્વારા તૈયાર કરવામાં આવેલી કોરોના માટેની વેક્સીન 'સ્પૂતનિક વી'નું ઉત્પાદન શરૂ કરી દેવામાં આવ્યું છે. જેને લઇને રશિયામાં બે અઠવાડિયાની અંદર પહેલી બેંચનો જથ્થો આવી જશે. રશિયાના આરોગ્યપ્રધાન મિખાઇલ મુરાસ્ખોએ જણાવ્યું છે કે પહેલા તબક્કામાં વેક્સીની આરોગ્યકર્મીઓ અને ત્યાર બાદ શિક્ષકોને લગવામાં આવશે.
રશિયાની કંપની સિસ્ટેમાએ આ વેક્સીનનું ઉત્પાદન શરૂ કરી દીધું છે. સરકારની યોજના છે ઓક્ટોબરમાં વેક્સીનને પુરા રશિયામાં મોટા તબક્કે લોંચ કરી દેવામાં આવે. રશિયાના આરોગ્ય મંત્રાલયની વેબસાઇટ પર આપવામાં આવેલી જાણકારી મુજબ 1 જાન્યુઆરી 2021થી વેક્સીનનું સંપૂર્ણ રીતે વિતરણ શરૂ કરવાની તૈયારી કરવામાં આવી રહી છે.
એપ દ્વારા વેક્સીન પર રખાશે નજર
આરોગ્યપ્રધાનના જણાવ્યાં અનુસાર ટ્રેસિંગ એપ પણ તૈયાર કરવામાં આવી રહી છે, જે લોકોના આરોગ્ય પર ધ્યાન રાખશે. એપ દ્વારા એવા લોકો પર પણ નજર રાખવામાં આવશે જેઓને આ વેક્સીન લગાવામાં આવી છે.
જો તેઓને આ વેક્સીનના કારણે આરોગ્ય સંબંધી કોઇ તકલીફ પડે છે તો તેની સુચના ક્ષેત્રીય વિસ્તારમાં આવેલી આરોગ્ય સેવાને મળી જશે. વેક્સીનનું નામ દુનિયાના પહેલા સેટેલાઇટ સ્પૂતનિકના નામ પર રાખવામાં આવ્યું છે, જેને સોવિયત સંઘ દ્વારા લોંચ કરવામાં આવ્યું હતું.