વિદેશ જવાનો ક્રેઝ હજી પણ યથાવત જોવા મળી રહ્યો છે. એજન્ટો વિદેશ લઇ જવા માટે કરોડો રુપિયા પડાવતા ખચકાતા નથી. જો કે સામે લોકો પણ આટલા રુપિયા ખર્ચવા તૈયાર થઇ જાય છે. ત્યારે વિદેશ જવા માટે પૈસાની બાબતે ગાંધીનગરના કલોલમાં ફાયરિંગ થયુ હોવાનું સામે આવ્યુ છે. કલોલના મારુતિ બંગ્લોમાં વિદેશ મોકલતા એજન્ટના માણસો દ્વારા ફાયરિંગ કરવામાં આવ્યું.
મારુતિ બંગ્લોમાં ફાયરિંગ
ગાંધીનગર કલોલ પંચવટી વિસ્તારમાં મારુતિ બંગલોમાં રહેતા વિષ્ણુભાઈ માણેકલાલ પટેલે પોતાના ભત્રીજાને અમેરિકા મોકલવા માટે એજન્ટનો સંપર્ક કર્યો હતો. નારણપુરામાં રહેતા એજન્ટ ઋત્વિક પારેખ અને દેવમ બ્રહ્મભટ્ટ સાથે વિષ્ણુભાઇએ મીટિંગ કરી હતી. દિલ્હી થઇને અમેરિકા જવા માટે 1.10 કરોડમાં ડીલ નક્કી કરાઇ હતી.
અમેરિકા જવા 1.10 કરોડમાં ડીલ
બંને એજન્ટોએ દિલ્હીથી અમેરિકા મોકલી આપવાની વાત કરી હતી. અને એમ નક્કી કર્યુ હતું કે એક કપલના 1.10 કરોડ રુપિયા આપવાના રહેશે. બે દિવસ બાદ અડધુ પેમેન્ટ આપવાનું રહેશે. એજન્ટોએ 23મી જાન્યુઆરીએ ટિકિટ આવી જશે તેમ કહ્યું હતુ પરંતુ ભત્રીજા અને પત્નીની ટિકિટ આવી ન હતી. જો કે પાછળથી 27ને બદલે 4 ફેબ્રુઆરીની ટિકિટ આવી હતી. એજન્ટોએ એમ પણ કહ્યુ હતુ કે મારો માણસ આવશે ત્યારે પૈસા બતાવવા પડશે.
ત્રણેય ઇસમો પોણો કલાક રોકાયા
દેવમના ઇશારે ઋત્વિજ 3 ઇસમોને લઇને વિષ્ણુ પટેલના ઘરે ગયો. રાત્રે સવા 9 વાગે વિષ્ણુભાઇના ઘરે તેઓ પહોંચ્યા હતા. આ ચારેય લોકોએ પૈસાની માગણી કરતા વિષ્ણુપટેલે જણાવ્યુ કે અમેરિકા પહોંચ્યા પછી પૈસા આપવાની વાત થઇ હતી. એજન્ટના ઇસમોએ આ વાત માની નહી તો વિષ્ણુભાઇએ 80 લાખ રોકડા બતાવ્યા પણ ખરા પરંતુ પૈસા જોતા જ ઇસમોની દાનત બગડી. એક ઇસમે કોઇ પણ ભોગે રુપિયા પડાવા માટે વિષ્ણુભાઇ સામે રિવોલ્વર તાકી દીધી.હજી વિષ્ણુભાઈ કઈ સમજે એ પહેલાં જ તેણે ફાયરિંગ કરી દીધું હતું. જોકે વિષ્ણુભાઈ ખસી જતાં ગોળી સોફામાં ઘૂસી ગઈ હતી. આ દરમિયાન વિષ્ણુ ભાઈના પુત્રએ મોબાઇલ ફોન છૂટો મારતા તેના હાથમાંથી રિવોલ્વર પડી ગઈ હતી, ત્યારબાદ ત્રણેય ઇસમો ભાગી ગયા હતા.
પાડોશીઓ દોડી આવ્યા
વિષ્ણુભાઈ સહિતનાં પરિવારજનોએ બૂમાબૂમ કરતાં ઋત્વિક પટેલ સાથે આવેલા શખ્સો ભાગી ગયા. ગોળીબારનો અવાજ સાંભળીને પાડોશીઓ પણ દોડી આવ્યા. પાડોશીઓએ જીવની પરવાહ કર્યા વિના ઋત્વિકને રંગે હાથે ઝડપી પાડ્યો. સમગ્ર મામલે પોલીસે ઋત્વિક, તેનો ભાઇ અને તેના પિતાની અટકાયત કરી છે. તેમજ દિલ્હીથી અમેરિકા જવા રવાના થયેલા પેસેન્જર અને એજન્ટ દેવમને પરત લાવવા માટે મથામણ કરી રહી છે.