ગુજરાતમાં ફાયરિંગની ઘટનાઑમાં ચિંતાજનક ઉછાળો આવી રહ્યો છે. જેમાં અમદાવાદ, રાજકોટ, સુરત, ખેડામાં ફાયરિંગની ઘટના સામે આવતા પોલીસની કામગીરી સામે સવાલો ઊભા થયા છે.
રાજ્યમાં છાસવારે બનતી ફાયરિંગની ઘટના
કાયદો અને વ્યવસ્થા સામે ઉઠ્યા સવાલો
આરોપીઓ રોફ જમાવવા કરે છે ફાયરિંગ
રાજ્યમાં છાસવારે વધતી ફાયરિંગની ઘટના ચિંતાનો વિષય બની છે. કાયદોનો કોઈ ડર જ ન હોય તે રીતે શખ્સો બેફામ રીતે જાહેર સ્થળ પર રોફ જમાવવા માટે ફાયરિંગ કરતાં હોવાના કિસ્સા પ્રકાસમાં આવી રહ્યા છે. તેવામાં અમદાવાદના ચારોડિયા પોલીસ ચોકી પાસે યુવકે ગન સાથે વીડિયો બનાવી પોલીસની આબરૂનું ધોવાણ કર્યું છે. પોલીસ ચોકી બહાર વીડિયો બનાવતા કાયદો અને વ્યવસ્થા સામે સવાલો ઊભા થયા છે. આરોપીએ કાયદાના અને પોલીસના ડર વગર પંજાબી સોંગના બેક ગ્રાઉન્ડમાં ગન સાથે વીડિયો બનાવ્યો હોવાથી પોલીસની બેદરકારી સામે આવી છે.
રાજકોટમાં જાહેરમાં ફાયરિંગ કરી રૌફ જમાવવો પડ્યો ભારે
બીજી તરફ રાજકોટમાં જન્માષ્ટમીની ઉજવણી દરમિયાન જાહેરમાં ફાયરિંગ કરી રૌફ જમાવવો એક શખ્સને ભારે પડ્યો હતો.રાજકોટમાં બી ડિવીઝન પોલીસ મથક વિસ્તારમાં ફાયરિંગ મામલે આરોપીની અટકાયત કરી પોલીસે કાર્યવાહી હાથ ધરી છે. જન્માષ્ટમીની ઉજવણી દરમિયાન બી ડિવીઝન પોલીસ મથક વિસ્તારમાં જાહેરમાં ફાયરિંગ કરવામાં આવ્યું હતું.
સુરતના ચોકબજારમાં ફાયરિંગ કરનાર સહિત વધુ 3 ઝડપાયા
વધુમાં સુરતના ચોકબજારમાં પણ ફાયરિંગની ઘટના સામે આવી હતી. જે મુદ્દે 3 આરોપીઑને પોલીસે દબોચી લીધા છે. સુરત ક્રાઈમબ્રાંચે દિપક કુટેકર, વિકાસ મગરે અને અમોલ તુકારામને ઓલપાડ-સાયણ રોડ ઉપરથી ઝડપી પડી આગળની કાર્યવાહી હાથ ધરી છે. જેની પૂછપરછમાં નવી ગેંગ ઉભી કરવાના વિવાદમાં ફાયરિંગ થયું હોવાનું સામે આવ્યું હતું. એટલું જ નહિ ફાયરિંગ કરનાર દીપક સૂર્યા મર્ડર કેસનો સાક્ષી હોવાનું અને જેના ઉપર ફાયરિંગ થયું તે સફીએ સૂર્યાની હત્યા કરાવી હતી પણ સામે આવ્યું છે.
ખેડાના વમાલી રોડ પર ફાયરિંગનો વીડિયો વાયરલ
બીજી તરફ ખેડાના વમાલી રોડ પર પણ એક કંપનીમાં બે રાઉન્ડ ફાયરિંગ થયું હતું. જેનો વીડિયો સોશિયલ મીડિયામાં વાયરલ થતાં પોલીસ હરકતમાં આવી હતી. જે વીડિયોમાં વરસોલા ગામના પૂર્વ સરપંચ નજરે પડતાં હતા અને આ વીડિયો સ્વતંત્રતા દિવસનો હોવાનું અનુમાન લગાવાયું હતું.