જૂની અદાવતમાં મોરબીમાં ફાયરિંગ એકનું મોત એક વ્યક્તિ ઇજાગ્રસ્ત

મોરબીના કાલિકા પ્લોટ નજીક ફાયરિંગની ઘટના બની હતી. જૂની અદાવતમાં 2 અજાણ્યા  શખ્સોએ કરેલા ફાયરિંગમાં એકનું મોત થયું છે જ્યારે ત્રણ વ્યક્તિને ઈજા પહોંચી છે. ઘટનાની જાણ થતા LCB અને પોલીસ ઘટનાસ્થળે પહોંચી હતી. 

મહત્વનું છે કે ફાયરિંગ કરનાર એક શખ્સને સ્થાનિકોએ ઝડપી પાડ્યો હતો. આ શખ્સને સ્થાનિકોએ ઢોર મારમારતા ભારે ઈજા પહોંચી હતી. હાલ તમામ ઈજાગ્રસ્તોને સારવાર માટે હોસ્પિટલ ખસેડવામાં આવ્યા છે.

તો સમગ્ર મામલે ઉશ્કેરાયેલા લોકોના ટોળાએ પોલીસ સ્ટેશન નજીકના વિસ્તારમાં હોબાળો મચાવ્યો હતો અને તોડફોડ કરી હતી. ડજેને લઈને ટોળાને કાબુમાં લેવા માટે પોલીસ દ્વારા લાઠીચાર્જ કરવામાં આવ્યો હતો.

આપને જણાવી દઇએ કે ગંભીર ઇજાઓ થનાર લોકોને નજીકની સિવિલ હોસ્પિટલમાં ખસેડવામાં આવ્યા હતા. આ સાથે જ એક શખ્સને વધારે પ્રમાણમાં ગંભીર ઇજા થઇ હોવાથી તેને રાજકોટ ખાતે તાત્કાલિક અસરથી ખસેડવાની કામગીરી હાથ ધરવામાં આવી હતી. 

ફાયરિંગની આ ઘટનાની જાણ સ્થાનિક પોલીસ તંત્રને થતાં જ મોટો પોલીસ કાફલો ઘટના સ્થળે આવી પહોંચ્યો હતો અને કોઇ અઘટિત બનાવ ના બને તે માટે ચાંપતો બંદોબસ્ત ગોઠવાયો હતો. પોલીસે આ મામલાની પ્રાથમિક તપાસ કરતા ઘટના સ્થળેથી આશરે 25 જેટલા રાઉન્ડ ફાયર કરવામાં આવ્યા હોવાનું માલુમ પડ્યું હતું.