ગેંગવોર / સુરતમાં ધોળા દિવસે ફાયરિંગ, ભોગ બનનાર સફીની સૂર્યા મરાઠીની હત્યામાં હતી સંડોવણી!

• સુરતના ચોકબજાર વિસ્તારમાં ધોળા દિવસે ફાયરિંગ
• સફી નામના શખ્સ પર ફાયરિંગ કરાતા વ્યક્તિ ઇજાગ્રસ્ત
• સફીની સૂર્યા મરાઠીની હત્યામાં સંડોવણી હોવાનું ખુલ્યું હતું

સુરતના ચોકબજાર પોલીસ સ્ટેશન વિસ્તારમાં ધોળા દિવસે ફાયરિંગ થયું હોવાની ઘટના સામે આવી છે. શહેરની અખંડ આનંદ કોલેજ પાસે સફી નામના શખ્સ પર બે શખ્સોએ ફાયરિંગ કર્યું છે. જેના લીધે સમગ્ર વિસ્તારમાં ચર્ચાનો માહોલ જામ્યો છે.

ઇજાગ્રસ્ત સફીને વધુ સારવાર માટે મહાવીર હોસ્પિટલ ખસેડાયો

શહેરના ચોકબજાર વિસ્તારમાં મોપેડ ઉપર આવેલા બે શખ્સોએ સરેઆમ સફી નામના શખ્સ પર ફાયરિંગ કર્યું હતું. આથી તેને પેટના ભાગે ગોળી વાગતા ઇજાગ્રસ્ત સફીને પહેલા પ્રાથમિક સારવાર માટે પ્રાણનાથ હોસ્પિટલમાં ખસેડવામાં આવ્યો હતો. બાદમાં તેને વધુ સારવાર માટે મહાવીર હોસ્પિટલમાં ખસેડવામાં આવ્યો હતો. જોકે આ ઘટનાની જાણ થતા તુરંત પોલીસનો કાફલો ઘટનાસ્થળે દોડી આવ્યો હતો. ફાયરિંગને લઈ સમગ્ર વિસ્તારમાં હાલ ડરનો માહોલ પણ જોવા મળી રહ્યો છે. હાલમાં પોલીસ દ્વારા ઘટનાસ્થળે જઇને આ મામલે વધુ તપાસ હાથ ધરવામાં આવી રહી છે.

CCTV ફુટેજમાં ખુલ્લેઆમ ફાયરિંગની ઘટના જોવા મળી રહી છે

તમને જણાવી દઇએ કે, સૂર્યા મરાઠીની હત્યામાં સફીની સંડોવણી હોવાનું ખુલ્યું હતું. આ ઘટનામાં સફી સાથેના સાગરિતોએ ફાયરિંગ કર્યાની વિગત સામે આવી છે. મહત્વનું છે કે, સફી સૂર્યા મરાઠી ગેંગનો સભ્ય હતો. હાલમાં પોલીસ આ બાબતને લઇને વધુ તપાસ હાથ ધરી રહી છે કે, આખરે મોપેડ પર આવેલા બે શખ્સો કે જેઓએ સફી પર ફાયરિંગ કર્યું છે તેઓ કોણ હતા. જોકે, દિપક ઉટેગર નામના શખ્સ દ્વારા આ ફાયરિંગ કરાયું હોવાનું જાણવા મળી રહ્યું છે. આ મામલે પોલીસ દ્વારા CCTV ફુટેજ પણ મેળવવામાં આવ્યા છે. જેમાં જે-તે વ્યક્તિ ખુલ્લેઆમ ફાયરિંગ કરતી જોવા મળી રહી છે.

આ મામલે પોલીસનું એમ કહેવું છે કે, 'અગાઉ સૂર્યા મરાઠીની એક ગેંગ હતી કે જેમાં આજે ભોગ બનનાર જે સફી શેખ છે કે જે અગાઉ એક ગુનો દાખલ થયો હતો તેમાં તે આરોપી તરીકે હતો. ત્યારે આજે જે ઇસમોએ હુમલો કર્યો તેઓને અગાઉ કોઇ ગુનાકીય પ્રવૃત્તિમાં આ સફીએ મદદ નહોતી કરી. આથી, એ દાઝ રાખીને આ લોકોએ ફાયરિંગ કર્યું હોવાનું માનવામાં આવી રહ્યું છે. આ ઘટનામાં એક રાઉન્ડ ફાયરિંગ કરવામાં આવ્યું હતું. હાલમાં ઇજાગ્રસ્ત સફીને હોસ્પિટલમાં સારવાર હેઠળ દાખલ કરવામાં આવ્યો છે.