બેદરકારી / ભાવનગરમાં સુરત જેવી ઘટનાની રાહ? સરકારી શાળાઓમાં જ નથી ફાયર સેફ્ટીના સાધનો

સુરતમાં બનેલી અગ્નિકાંડની ઘટના બાદ હવે સરકાર રોજ સવાર પડે ને નવા નિયમો જાહેર કરે છે. પરંતુ તેના જ વિભાગો સરકરી આદેશનું પાલન કરતા નથી. ત્યારે સરકાર પોતે પહેલા નિયમો પાળે તે જરૂરી છે. ભાવનગર મહાનગરપાલિકા હસ્તક શહેરમાં કુલ સરકારી શાળાના 45 બિલ્ડીંગ આવેલા છે. જેમાં સવાર અને બપોરની પાળી તેમ કરીને કુલ 55 શાળાઓ ચાલે છે. આ શાળાઓમાં 22 હજારથી વધુ મધ્યમ વર્ગના વિદ્યાર્થીઓ અભ્યાસ કરે છે.

સરકારી શાળામાં જ અમલ થતો નથી
પરંતુ જાણે કે રામભરોસે અભ્યાસ કરતા હોય તેમ લાગે છે. એક પણ સરકારી શાળાઓમાં ફાયર સેફ્ટીની ડીસીપી અને સીઓ 2 નામની બોટલો છે જ નહીં. આ ઉપરાંત કેટલીક શાળાઓ એવી છે કે જ્યાં પહેલા માળે જવા માટે એક જ દાદર છે. ત્યારે જો કોઈ ઘટના બને તો વિદ્યાર્થીઓ ક્યાં જાય તે સવાલ છે. સામાન્ય રીતે શાળાઓમાં બે દાદર હોવા જોઈએ તેવો સરકારનો આદેશ છે. પરંતુ તેની શાળામાં જ તેનો અમલ થતો નથી. કેટલીક શાળાઓ એવી છે કે જાય છતના પોપડા આજે પણ પડેલી હાલતમાં છે અને વિદ્યાર્થીઓ મોતના ભય હેઠળ અભ્યાસ કરી રહ્યાં છે. ત્યારે કોંગ્રેસના સભ્યનું કહેવું છે કે જો નવા સત્ર પહેલા શાળાઓમાં જો ફાયર સેફટીના સાધનો નહીં લગાવાય તો તેઓ આંદોલન કરશે.

કેટલીક શાળાઓ રેસિડેન્શિયલ વિસ્તારમાં
ભાવનગર શિક્ષણ સમિતી દર વર્ષે બજેટમાં 4 લાખ જેવી રકમ આપત્તી ના સાધનો માટે ફાળવે છે. પરંતુ છેલ્લા 3 બજેટથી આ માટે કોઈ કામ થયું નથી. ભાવનગરની કેટલીક શાળાઓ રેસિડેન્શિયલ વિસ્તારમાં અને ગીચ વિસ્તારમાં છે. ત્યારે જો કોઈ ઘટના બને તો ફાયર કે એમ્બ્યુલન્સ મહોલ્લામાં જઈ શકે તેવી જગ્યા પણ હોતી નથી. ભાવનગરમાં સરકારી શાળાઓમાં ફાયર ઉપરાંત અત્યંત મહત્વનું કહી શકાય તેવી સિસ્કેમરાની પણ સુવિધા નથી. ત્યારે હવે ભાવનગરના મેયર આ મામલે ટેન્ડરો બહાર પાડવાની કામગીરી શરૂ હોવાનું જણાવી રહ્યા છે અને તાકીદે ફાયરના સાધનો વસાવીશું તેમ જણાવી રહ્યા છે.

સરકાર લોકો માટે કાયદો બનાવે છે પરંતુ પોતાના આંગણે તેનો અમલ કરતા નથી. ત્યારે હવે ભાવનગર મનપા નવા સત્ર પહેલા ફાયર સેફ્ટીના સાધનો લગાવશે કે પછી સુરત જેવી ઘટના બનાવની રાહમાં છે તેમ લોકો વિચારી રહ્યા છે.