PIL / ગુજરાતના 4 મહાનગરોમાં આટલા અગ્નિશામકોની જગ્યા ખાલી! અગ્નિકાંડ બાદ પણ સરકાર નિષ્ક્રિય?

આ મુદ્દે થયેલી એક PILના જવાબમાં સરકારે આપેલા અહેવાલમાં સરકારની જ પોલ ખૂલી ગઈ છે. અમદાવાદ મ્યુનિસિપલ કોર્પોરેશન AMCમાં 99 જેટલી ફાયરમેનની જગ્યાઓ ખાલી પડેલી છે. 

અમિત પંચાલે શ્રેય હોસ્પિટલમાં થયેલા અગ્નિકાંડ બાદ PIL કરી હતી

ગુજરાત હાઈકોર્ટના વકીલ અમિત પંચાલે શ્રેય હોસ્પિટલમાં થયેલા અગ્નિકાંડ બાદ PIL કરી હતી અને તેની વિગતો સામે આવતા સરકારના પોતાના દાવા પોકળ સાબિત થયા હતા. 

કયા મહાનગરમાં કેટલી જગ્યાઓ ખાલી?

આ એફિડેવિટની વિગતો પ્રમાણે AMCમાં 670 સરકારી માન્ય પોસ્ટમાંથી 182 જગ્યાઓ ખાલી છે જેમાં ડેપ્યુટી ચીફ ફાયર ઓફિસર, ડિવિઝનલ ફાયર ઓફિસર, સબ ઓફિસર, લિડિંગ ફાયરમેન, ડ્રાઈવર કમ પમ્પ ઓપરેટર અને ફાયરમેન  જેવા મહત્વના પદોનો સમાવેશ થાય છે.

બીજી બાજુ રાજકોટમાં  228 સરકારી માન્ય પોસ્ટમાંથી 71 જગ્યાઓ ખાલી છે જયારે વડોદરામાં 332 સરકારી માન્ય પોસ્ટમાંથી 98 જગ્યાઓ ખાલી છે. 

સુરતના તક્ષશિલા કોમ્પ્લેક્સમાં 22 વિદ્યાર્થીઓના મોતની ગોઝારી ઘટના પછી 1043 સરકારી માન્ય પોસ્ટ બનાવવામાં આવી હતી જેમાંથી 69 ખાલી છે. આ પદોમાં ડેપ્યુટી ચીફ, ડિવિઝનલ અને સ્ટેશન ફાયર ઓફિસરનો સમાવેશ થાય છે. 

સરકારી માન્ય પોસ્ટ્સની પાંચમા ભાગની જગ્યાઓ હજુ ખાલી

નોંધનીય છે કે 4 મ્યુનિસિપલ કોર્પોરેશનના વિસ્તારોમાંથી સરકારી માન્ય પોસ્ટ્સની પાંચમા ભાગની જગ્યાઓ હજુ ખાલી પડેલી છે.

એફિડેવિટમાં કહેવામાં આવ્યું છે કે અત્યારના ફાયર સેફ્ટીના નિયમો પ્રમાણે બિલ્ડીંગને NOC આપવા માટે અને તેના ઇન્સ્પેક્શન માટે પૂરતા પ્રમાણમાં સ્ટાફ હોવો જરૂરી છે. પ્રજા અને સરકાર બંનેના લાભ માટે આ જગ્યાઓને તાત્કાલિક રીતે ભરવામાં આવે તે જરૂરી છે.