વડોદરાના માંડવી વિસ્તારમાં આવેલી વિજય વલ્લભ હોસ્પિટલના ચોથા માળે આગ લાગતા અફરાતફરીનો માહોલ સર્જાયો હતો. ફાયર વિભાગ દ્વારા 17 જેટલા દર્દીઓને રેસ્ક્યૂ કરી બચાવી લેવામાં આવ્યા હતા.
વડોદરાની વિજય વલ્લભ હોસ્પિટલમાં લાગેલી આગ કાબૂમાં
હોસ્પિટલના ચોથા માળે લાગી હતી આગ
એકાઉન્ટ રૂમના કોમ્પ્યુટરમાં શોર્ટ સર્કિટથી આગ લાગી હતી
વડોદરાના માંડવી વિસ્તારમાં આવેલી વિજય વલ્લભ હોસ્પિટલના ચોથા માળે આગ લાગતા અફરાતફરીનો માહોલ સર્જાયો હતો. કોવિડ વોર્ડની બાજુમાં આવેલા એકાઉન્ટ રૂમના કોમ્પ્યુટરમાં શોર્ટ સર્કિટના કારણે આગ લાગી હતી. ફાયરની ટીમે તાત્કાલિક ધોરણે કામગીરી હાથ ધરી આગ પર કાબૂ મેળવ્યો હતો.
હોસ્પિટલના ચોથા માળ પર કુલ 23 દર્દીઓ દાખલ હતા
ફાયર વિભાગ દ્વારા 17 જેટલા દર્દીઓને રેસ્ક્યૂ કરી બચાવી લેવામાં આવ્યા હતા. હોસ્પિટલના ચોથા માળ પર કુલ 23 દર્દીઓ દાખલ હતા. જેમાંથી 17 કોરોના દર્દીઓ હતા. અને અન્ય સામાન્ય બીમારીના દર્દી હતા. આગની ઘટના બાદ કેટલાક દર્દીઓને સયાજી હોસ્પિટલમાં ખસેડવામાં આવ્યા હતા.
મેયર સહિતના રાજકીય આગેવાનો હોસ્પિટલ દોડી આવ્યા હતા
જોકે ત્યાં સુવિધાના અભાવના આક્ષેપ સાથે દર્દીઓના સ્વજનોએ હોબાળો મચાવ્યો હતો. તેમને કહ્યું કે સયાજી હોસ્પિટલમાં દર્દીઓને ખસેડવામાં આવ્યા ત્યારે ત્યાં એકપણ તબીબ ફરજ પર હાજર નહતા. સમગ્ર ઘટનાની જાણ થતા મેયર સહિતના રાજકીય આગેવાનો હોસ્પિટલ દોડી આવ્યા હતા. અને ભારે સમજાવટ બાદ મામલો થાળે પાડ્યો હતો.
નોંધનીય છે કે આગના લીધે ભારે ભીડ જમાં થઈ ગઈ છે અને હોસ્પિટલનો વીજ પુરવઠો બંધ કરી દેવાયો છે.