અમદાવાદ / બાવળા નજીક વિચિત્ર અકસ્માત, ચાલુ બાઇકમાં આગ લાગતાં બેનાં મોત

ઘાયલ મહિલાને ૧૦૮ની મદદથી સોલા હો‌સ્પિટલ ખસેડાઇ છે. બાઇકમાં આગ લાગવાનું કારણ હજુ અકબંધ છે. હાલમાં બાવળા પોલીસે આ ઘટના અંગે તપાસ શરૂ કરી છે. પ્રાપ્ત માહિતી મુજબ અમદાવાદ નજીકના બાવળામાં એક બાઈક પર બે પુરુષ અને મહિલા જઈ રહ્યાં હતાં તે સમયે અચાનક ચાલુ બાઈકે કોઈ કારણસર બાઈકમાં આગ લાગી ગઈ.

બાઈકસવાર કંઈ સમજે તે પહેલાં તો આગે વિકરાળ સ્વરૂપ ધારણ કરી લીધું અને બાઈકસવારોને આગની લપેટમાં લઈ લીધા બાદ ત્રણેય લોકો ચાલુ બાઈકે રસ્તા પર નીચે પટકાયા હતા. બાઇકની આગની લપેટમાં બે લોકો સંપૂર્ણ રીતે આવી જતાં રસ્તામાં જ બાઈકની સાથે સળગી ગયા, બે પુરુષનાં ઘટનાસ્થળ પર જ મોત નીપજ્યાં છે, જ્યારે અન્ય એક મહિલા ગંભીર રીતે ઘાયલ થતાં તેને સારવાર માટે હોસ્પિટલ ખસેડવામાં આવી છે.

બાવળા નજીક બાઈકના નીચેના ભાગે એકાએક આગ લાગ્યા બાદ આખું બાઇક લપેટમાં આવી ગયું હતું. રાત હોવાના કારણે નજીકમાં પાણીની વ્યવસ્થા ન હોવાથી આગ પર કાબૂ લઈ શકાયો ન હતો અને બાઈક ખાખ થઇ ગયું હતું. બાઇકમાં પેટ્રોલ પણ લીકેજ હોવાનું જાણવા મળી રહ્યું છે.

હાલમાં બાવળા પાસે બાઈકની સાથે બે પુરુષ સળગી જતાં તેમનાં ઘટનાસ્થળ પર જ મોત થયાં છે, જ્યારે એક મહિલા ગંભીર રીતે ઘાયલ થતાં તેને અમદાવાદની  હોસ્પિટલમાં સારવાર માટે ખસેડવામાં આવી છે. હાઇવે પર આ વિચિત્ર અકસ્માત થતાં લોકોનાં ટોળેટોળાં ઊમટી પડ્યાં, પરંતુ આગમાં સળગી રહેલા લોકોને બચાવવાની કોઈની હિંમત ન ચાલી. હાલમાં પોલીસ ઘટનાસ્થળ પહોંચી સમગ્ર ઘટના કેવી રીતે બની, બાઈક પર કોણ સવાર હતા તેમની ઓળખ કરવાની કોશિશ કરી રહી છે.