આગ / ખેડાના પોલીસ મથકમાં આગ લાગતા અફરાતફરીનો માહોલ, જપ્ત કરાયેલા 25થી વધુ વાહનો બળીને ખાખ 

• ખેડા ટાઉન પોલીસ મથકમાં લાગી આગ 
• પોલીસ મથકમાં આગ લાગતા અફરાતફરી
• ભારે જહેમત બાદ આગ પર કાબૂ મેળવાયો

ખેડાના ટાઉન પોલીસ મથકમાં રાત્રિ દરમિયાન વિકરાળ આગ લાગતા અફરાતફરીનો માહોલ સર્જાયો હતો. આગ કયા કારણથી લાગી તે હજુ જાણી શકાયુ નથી પરતું પ્રાથમિક તપાસમાં આગ શોર્ટ સર્કિટના કારણે લાગી હોવાનું અનુમાન સેવાઈ રહ્યું છે. આ આગમાં કોઈ જાનહાનિ સર્જાઈ નથી પરતું આગના કારણે પોલીસ મથકમાં રહેલા 25 જેટલા વાહનો બળીને ખાખ થઈ ગયા છે. 

ખેડા ટાઉન પોલીસ મથકમાં લાગેલી આગ કાબુમાં

ઘટનાની જાણ થતા જ ફાયર બ્રિગેડનો કાફલો ઘટના સ્થળે દોડી આવ્યા હતો. જોત જોતામાં આગે વિકરાળ સ્વરૂપ ધારણ કરતા, ભારે જહેમત બાદ ફાયરના જવાનોએ આગ પર કાબૂ મેળવ્યો હતો, આગ લાગવાની ઘટનાથી લોકોના ટોળેટોળા સ્થળ પર ઉમટ્યા હતા. 

પોલીસ મથકમાં આગ લાગતા અફરાતફરી

મોડી રાત્રે આગ લાગવાની અફરા તફરીનો માહોસ સર્જાયો હતો અને લોકોમાં નાસભાગ મચી હતી આગમાં ગુનાના કામમાં વપરાયેલ વાહનોમાં એકાએક આગ લાગતાં આગે મોટુ સ્વરૂપ લીધું હતું. નડિયાદ, અસલાલી અને ઓએનજીસી નવાગામની ફાયરબ્રિગેડની મદદ મેળવાઈ હતી.

આગ લાગતા લોકોના ટોળા એકત્ર થયા

આશરે દોઢ કલાકની ભારે જહેમત બાદ આગ સંપૂર્ણ કાબૂમાં આવી હતી. જો કે સદનસિબે આ બનાવમાં જાનહાની થઈ નહોતી. આગ લાગવાનું કારણ અકબંધ રહેવા પામ્યું છે. વાહનોમાં આગ લાગતા તમામ વાહનો બળીને ખાખ થઈ ગયા છે.