વિવાદ / કેપ્ટન કૂલ સામે દાખલ થયો કેસ, જાણો કયા મામલામાં ફસાયા મહેન્દ્ર સિંહ ધોની

• મહેન્દ્ર સિંહ ધોની સામે બિહારના બેગુસરાયમાં નોંધાયો કેસ
• એક ખાતર વેચનારે નોંધાવ્યો કેસ, છેતરપિંડીનો આરોપ
• 30 લાખ રૂપિયાનો ચેક બાઉન્સ થયો

કંપની પર છેતરપિંડીનો આરોપ 

આ કેસમાં ધોની સિવાય અન્ય 7 લોકોને આરોપી બનાવવામાં આવ્યાં છે. આ કેસ એક ખાતર વેચનારે નોંધાવ્યો છે. આરોપ છે કે 30 લાખ રૂપિયાનો ચેક બાઉન્સ થયો તેથી કેસ કરવો પડ્યો. ખરેખર આ બે કંપનીઓ વચ્ચેનો વિવાદ છે. એસકે એન્ટરપ્રાઈઝ બેગુસરાય નામની એજન્સીની સાથે એક ખાતરની કંપનીએ પોતાના ઉત્પાદનના વેચાણ માટે કરાર કર્યો હતો. કંપની તરફથી એજન્સીને ખાતર તો મોકલવામાં આવ્યું પરંતુ ત્યાંથી માર્કેટિંગમાં સહયોગ ના આપવામાં આવ્યો. ત્યારબાદ એજન્સીના માલિક નીરજ કુમાર નિરાલાએ કંપની પર અસહયોગનો આક્ષેપ કરી કહ્યું કે જેના કારણે તેમને નુકસાન થયુ છે. 

બાઉન્સ થયો 30 લાખનો ચેક

એજન્સીએ પ્રોડક્ટ માટે કંપનીને 36.81 લાખની ચૂકવણી કરી. કેસમાં દાવો કરવામાં આવ્યો છે કે આ કારણે એજન્સીમાં માલ ફસાઈ ગયો. ત્યારબાદ ફરિયાદ કર્યા બાદ કંપનીએ એજન્સીમાં ફસાયેલુ ખાતર પાછુ લઇ લીધુ અને બદલામાં 30 લાખનો ચેક આપ્યો. માલિકે જ્યારે ચેક બેન્કને મોકલ્યો તો બાઉન્સ થયો. જેની સુચના વારંવાર આપ્યાં બાદ કંપનીના અધિકારી અથવા પ્રતિનિધિએ ધ્યાન ના આપ્યું. 

આ 7 લોકોની સામે નોંધાયો કેસ

આ કેસમાં નીરજ કુમાર નિરાલાની તરફથી પૂર્વ ક્રિકેટ કેપ્ટન મહેન્દ્ર સિંહ ધોનીની સાથે-સાથે કંપનીના સીઈઓ રાજેશ આર્ય, સ્ટેટ હેડ અજય કુમાર, માર્કેટિંગ હેડ અર્પિત દૂબે, એમડી ઈમરાન જફર, માર્કેટીંગ મેનેજર વંદના આનંદ અને નિર્દેશક મહેન્દ્ર સિંહ સહિત 7 લોકોને આરોપી બનાવવામાં આવ્યાં છે.