કાર્યવાહી / ગુજરાતની પહેલી ઘટનાઃ ગાંધીનગરમાં કોરોના વાયરસના 4 દર્દીઓ સામે આ કારણે નોંધાઇ ફરિયાદ

• પાટનગરમાં કોરોના પોઝિટીવ સામે પહેલી ફરિયાદ થઈ
• કોરોનાની માહિતી છૂપાવવા બદલ ફરિયાદ
• ગાંધીનગરના 4 કોરોના પોઝિટીવ દર્દી સામે ફરિયાદ

પાટનગર ગાંધીનગરમાં કોરોના વાયરસના પોઝિટિવ સામે પહેલી ફરિયાદ નોંધાઇ છે. કોરોના વાયરસના શંકાસ્પદ લક્ષણો હોવા છતાં ચાર લોકોએ માહિતી છુપાવી હતી. જેથી મેડિકલ ઓફિસરે કોરોના વાયરસના ચાર પોઝિટિવ દર્દીઓ સામે સેક્ટર 21માં ફરિયાદ નોંધાવી છે.

ફરિયાદમાં ઉલ્લેખ કરાયો છે કે આ ચારેય લોકોએ પોઝિટિવ કેસ હોવા છતાં માહિતી છુપાવતા ગાંધીનગરમાં કોરોના વાયરસના કેસમાં વધારો થયો છે. તો પોલીસે ફરિયાદને આધારે તપાસ શરૂ કરી છે અને દર્દીઓ સાજા થયા બાદ કાયદેસરની કાર્યવાહી કરવામાં આવશે તેવી પોલીસે ખાતરી આપી છે.

પોલીસ અધિકારીએ જણાવ્યું હતું કે, કોરોનાગ્રસ્ત આ વ્યક્તિઓ અને તેમના પરિવાર દ્વારા આ અંગે માહિતી આપવામાં આવી ન હતી. તેથી ફરિયાદમાં આ ચાર શખ્સોના નામ આવ્યા છે. આ ચારેય લોકો આ બિમારીથી પીડાય છે. આ સાજા થશે ત્યાર બાદ તેમના વિરૂદ્ધ કાર્યવાહી કરવામાં આવશે. વધુમાં તેમણે કહ્યું કે, આવા કોઇપણ સંક્રમિત વ્યક્તિએ સાચી માહતી આપવી જોઇએ.

ગુજરાતમાં કોરોનાના કુલ 35 કેસ

આજે અમદાવાદમાં કોરોનાનો એક પણ નવો કેસ નથી નોંધાયો. અમદાવાદમાં કુલ 13 પોઝિટિવ વ્યક્તિઓની સારવાર ચાલી રહી છે. અત્યાર સુધીમાં ગુજરાતમાં કોરોનાના કુલ 35 કેસ નોંધાયા છે. આજે સુરતમાં 2 અને વડોદરામાં 2 નવા કેસ સામે આવ્યા છે. સુરતમાં 2 નવા કેસ આવતા કુલ પોઝિટિવ કેસની સંખ્યા 6 પર પહોંચી છે. રાજકોટમાં પરાજકોટમાં વધુ 2 કોરોનાના પોઝિટિવ કેસ સામે આવ્યા છે. 75 વર્ષીય મહિલા અને 36 વર્ષિય પુરૂષનો રિપોર્ટ પોઝિટિવ આવ્યો છે. રાજકોટમાં હાલ 1 કોરોના પોઝિટિવ વ્યક્તિની સારવાર ચાલી રહી છે. વડોદરામાં 2 નવા કેસ મળતા કુલ પોઝિટિવ કેસ 6 થયા છે. ગાંધીનગરમાં પણ કોરોના પોઝિટિવ એક પણ નવો કેસ નથી મળ્યો. ગાંધીનગરમાં કુલ 6 કોરોના પોઝિટિવ વ્યક્તિઓ સારવાર હેઠળ છે. કચ્છમાં પણ નવો કેસ નોંધાયો નથી. 1 વ્યક્તિની સારવાર ચાલી રહી છે. આમ, અમદાવાદ-13, સુરત-6, વડોદરા-6, ગાંધીનગર-6, રાજકોટ-1, કચ્છ-1 કોરોનાનો દર્દી સારવાર હેઠળ છે.