ગાંધીનગરમાં ઢબુડી માતા તરીકે ઓળખાતા ધનજી ઓડ ફરી એકવાર આવ્યા વિવાદમાં. પેથાપુર પોલીસ સ્ટેશનમાં લેન્ડગ્રેબિંગનો ગુનો નોંધાયો
ધનજી ઓડ ઉર્ફે ઢબુડી મા સામે ફરિયાદ
રાંધેજાના ખેડૂતે કરી ફરિયાદ
લેન્ડ ગ્રેબિંગ એક્ટ હેઠળ નોંધાયો ગુનો
ગાંધીનગરમાં ઢબુડી મા તરીકે ઓળખાતા ધનજી ઓડ સામે લેન્ડગ્રેબિંગનો ગુનો નોંધાયો છે. રાંધેજાના એક ખેડૂતો ફરિયાદ કરી છે કે તેઓએ જમીન પચાવી પાડીને તેની પર માતાજીનુ મંદિર બનાવી દીધુ છે. આ મામલે ધનજી ઓડ, પત્ની અને પુત્ર સહિત ચાર લોકો સામે પોલીસ ફરિયાદ નોંધાતા પોલીસે લેન્ડગ્રેબિંગનો ગુનો દાખલ કર્યો છે.
કેમ નોંધાયો ગુનો
ગાંધીનગરના પેથાપુર પોલીસ સ્ટેશનમાં રાંધેજાના એક ખેડૂત મિલનકુમાર પટેલે ફરિયાદ નોંધાવી છે . ફરિયાદમાં તેઓએ જણાવ્યુ છે કે રાંધેજા ગામમાં સર્વે નંબર 1934,1935 અને 1936થી જમીન આવેલી છે તેમાંથી 1935 સર્વે નંબરની જમીન ધનજી નારણ ઓડ ઉર્ફે ઢબુડી માના નામે છે. સર્વે નંબર 1934 અને 1936ની જમીન તેમણે 28.85 લાખ અને 13 લાખમાં ખરીદી હતી. બંને જમીન વચ્ચે વરંડો પણ છે તેમ છતાં ધનજી ઓડ ઉર્ફે ઢબુડી મા, તેની પત્નિ પવનબેન ધનજી ઓડ, પુત્ર વિપુલ ધનજી ઓડ અને સુરેશ રતિલાલ પટેલ દ્વારા જમીનમાં ગેરકાયદેસર ઓરડી બનાવી દેવામાં આવી તેમજ માતાજીનું મંદિર પણ બનાવી દીધું.
લેન્ડ ગ્રેબિંગ એક્ટ હેઠળ નોંધાયો ગુનો
ફરિયાદીએ વધુમાં એમ પણ જણાવ્યુ છે કે બંને સર્વે નંબરમાં સાદા કાગળ પર બાના ચિઠ્ઠી રજૂ કરીને કેસને વિવાદાસ્પદ અને તકરારી બનાવી દેવામા આવ્યો છે. તેના કારણે ખેડૂત દ્વારા ચારેય આરોપીઓ સામે પેથાપુર પોલીસ મથકમા લેન્ડ ગ્રેબ્રિંગ એક્ટ હેઠળ ગુનો નોંધાવામાં આવ્યો છે.
અગાઉ થયો હતો વિવાદ
ત્રણ વર્ષ અગાઉ ધનજી ઓડ ઉર્ફે ઢબુડીમાં વિવાદમાં આવ્યા હતા. રુપાલમાં ઢબુડી માતાના દર્શન કરવા લોકો મોટી સંખ્યામાં ઉમટી પડતા હતા. તેમાં પણ રવિવારે લોકોની ભારે ભીડ જોવા મળતી. પરંતુ આ તમામ વચ્ચે અંધશ્રદ્ધા અને લોકો સાથે છેતરપિંડી આચરતા હોવાની ફરિયાદ થતા ભારે વિવાદ થયો હતો.