ઉપાધિ / મોરબીનાં સિરામિક ઉદ્યોગ સુધી પહોંચ્યો મંદીનો રેલો, આગામી એક મહિના માટે એસોસિએશનને લીધો કડક નિર્ણય

• મોરબી સિરામિક એસોસિએશનનો મહત્વનો નિર્ણય
• 1 મહિના સુધી સિરામિકની બનાવટના કારખાના બંધ રહેશે
• નાના-મોટા યુનિટના ઉત્પાદન સામે માંગ નહીંવત હોવાથી લેવાયો નિર્ણય

મોરબીની આસપાસમાં આવેલા સીરામીકના નાના મોટા યુનિટમાં માલનું ઉત્પાદન કરવામાં આવે છે તેની સામે માંગ નહિવત હોવાથી આ ઉદ્યોગને ટકાવી રાખવા માટે તા. 10 ઓગસ્ટથી એક મહિના સુધી તમામ કારખાના બંધ રાખવાનો નિર્ણય કરવામાં આવ્યો છે. આ નિર્ણય મોરબી સિરામિક એસો.ના સભ્યો સાથે મિટિંગો કરીને સર્વસંમતે લેવામાં આવ્યો છે આટલું જ નહીં આગામી તા. 15 ઓગષ્ટથી માલનુ પરિવહન પણ બંધ કરવામાં આવશે.

ડોમેસ્ટિક અને ઇન્ટરનેશનલ માર્કેટમાં માગમાં ઘટાડો

મોરબીના સિરામિક ઉદ્યોગકારો દ્વારા સંયુક્ત રીતે તા. 10 ઓગસ્ટ થી 10 સપ્ટેમ્બર સુધી એક મહિનો મોરબીના તમામ સિરામિક કારખાનાઓને બંધ રાખવા માટેનો નિર્ણય લેવાયો છે.  મોરબી સિરામિક એસો.ના હોદ્દેદારો દ્વારા સભ્યોની સાથે સંયુક્ત મિટિંગ કરવામાં આવી હતી. જે મિટિંગમાં કારખાનાઓને બંધ રાખવા માટેનો નિર્ણય લેવામાં આવ્યો છે. અત્રે ઉલેખનીય છે કે, કોઈપણ ધંધામાં બજારમાં માંગ હોય અને માલનું ઉત્પાદન કરવામાં આવે તો તેના પૂરતા ભાવ મળતા હોય છે.  જોકે, બજારમાં માંગ ન હોય અને જો ઉત્પાદન વધી જાય તો ઉત્પાદનનું પ્રમાણ વધવાના કારણે માલની કિંમતમાં ઘટાડો થતો જોવા મળતો હોય છે આવી જ રીતે હાલમાં મોરબી સિરામિક ઉદ્યોગની અંદર પણ ડોમેસ્ટિક અને ઇન્ટરનેશનલ માર્કેટમાં માલની માંગમાં તોતિંગ ઘટાડો જોવા મળી રહ્યો છે અને ખાસ કરીને ઇન્ટરનેશનલ માર્કેટમાં કન્ટેનરના ભાડા, ગેસના ભાવ સહિતના પ્રશ્નો છે તેની સાથોસાથ ડોમેસ્ટિક માર્કેટની દેશના જુદા જુદા રાજ્યની અંદર વરસાદ અને બાંધકામ ક્ષેત્રે મંદીના લીધે માલની ડિમાન્ડમાં ઘટાડો થતો જોવા મળી રહ્યો છે.

ઇન્ટરનેશનલ માર્કેટમાં કન્ટેરનરના ભાડા,ગેસના ભાવ સહિતના પ્રશ્નો

મોરબીના  સિરામિક ઉદ્યોગકારો ગુજરાત ગેસ કંપની સાથે કરાર કરીને ગેસ મેળવતા હોય છે અને તેના કારખાનામાં મલનું ઉત્પાદન કરે છે જો કે, તારીખ 10 થી એક મહિનો સિરામિક ઉદ્યોગને બંધ રાખવામા આવેલ છે ત્યારે તેને લઈને કોઈ પ્રશ્ન ઊભા ન થાય તે માટે ગેસ કંપનીને પણ એડવાન્સમાં આ અંગેની જાણ કરી દેવામાં આવી છે કે, એક મહિના સુધી મોરબીના સિરામિક ઉદ્યોગમાં વેકેશન છેઅને એક મહિના બાદ મોરબીનો સિરામિક ઉદ્યોગ ફરી કાર્યરત થશે.ત્યારે ડોમેસ્ટિક અને ઇન્ટરનેશનલ માર્કેટમાં સારી ડિમાન્ડ હશે તેવી આશા હાલમાં ઉદ્યોગકારો વ્યક્ત કરી રહ્યા છે. સામાન્ય રીતે ચોમાસામાં ખેતીની સિઝન હોય છે જેથી સિરામિકના મજૂરો પોતાના વતનમાં જતાં રહેતા હોય છે અને કારખાના ચલાવવા માટે ઓગસ્ટ માહિનામાં મજૂરોના પ્રશ્નો ઊભા થતાં હોય છે જો કે, આ વર્ષે વેકેશન રાખવામા આવ્યું છે જેથી કરીને મજૂરો પણ વતનમાં ખેતી કામ કરી શકશે તેમજ એક મહિનો કારખાનના મેન્ટેનન્સના કામ માટે પણ અનુકૂળતા  રહેશે.