કોરોના વાયરસને કારણે થિયેટરો બંધ હોવાથી ફિલ્મમેકર્સને મોટું નુકસાન ભોગવવું પડ્યું છે. જેથી હવે પ્રોડ્યૂસર્સ ઓટીટી પ્લેટફોર્મ પર ફિલ્મ રિલીઝ કરવા તૈયાર થઈ ગયા છે. ત્યારે હવે અક્ષય કુમારની 'લક્ષ્મી બોમ્બ', સુશાંત સિંહ રાજપૂતની 'દિલ બેચારા', પૂજા ભટ્ટ, સંજય દત્તની 'સડક 2', અભિષેક બચ્ચનની 'બિગ બુલ', કુણાલ ખેમૂ અને રસિકા દુગ્ગલની 'લૂટકેસ', અજય દેવગનની 'ભુજ ધ પ્રાઈડ ઓફ ઈન્ડિયા' અને વિદ્યુત જામવાલની 'ખુદા હાફિઝ' ડાયરેક્ટ ઓટીટી પ્લેટફોર્મ પર રિલીઝ થશે.
કોરોના વાયરસને કારણે થિયેટરો બંધ હોવાથી ફિલ્મમેકર્સને થયું મોટું નુકસાન
બોલિવૂડની 7 મોટી ફિલ્મો હવે ઓટીટી પ્લેટફોર્મ પર રિલીઝ થશે
અક્ષય કુમાર, આલિયા ભટ્ટ, અજય દેવગન જેવા સ્ટાર્સની ફિલ્મો OTT રિલીઝ થશે
ક્રિટિક તરણ આદર્શે તમામ ફિલ્મોનો ફર્સ્ટ લુક પોસ્ટર જારી કરતાં આ ફિલ્મો હોટસ્ટાર ડિઝની પ્લસ પર રિલીઝ થવાની ઘોષણા કરી છે. તરણ આદર્શ મુજબ આગામી જુલાઈથી ઓક્ટોબર 2020 સુધી આ સાતેય ફિલ્મો ઓટીટી પ્લેટફોર્મ પર રિલીઝ કરવામાં આવશે. લોકડાઉનને કારણે જે ફિલ્મો તૈયાર છે તેને ઓટીટી પર રિલીઝ કરવી એ એક નવા યુગ સમાન છે. જોકે, ફિલ્મના કલાકારો પણ આ નિર્ણયથી ખુશ નહોતા.
જ્યારે લોકડાઉન પહેલાં સૂર્યવંશી અને 83 જેવી ફિલ્મો રિલીઝ માટે એકદમ તૈયાર હતી. પ્રમોશન્સ પણ કરવામાં આવ્યા હતા, પરંતુ ગુલાબો સિતાબોના ડિરેક્ટરે ફિલ્મ ઓટીટી પર રિલીઝ કર્યાં બાદ ફિલ્મ ઈન્ડસ્ટ્રીના લોકોનું સાહસ વધ્યું અને હવે મોટી ઘોષણા કરવામાં આવી છે.
તમને જણાવી દઈએ કે, દર્શકો આ સાતેય ફિલ્મોની રાહ જોઈ રહ્યા હતા. આ ફિલ્મોનો ક્રેઝ પહેલાંથી જ દર્શકોમાં હતો. ડિઝની હોટસ્ટાર પર પહેલી ફિલ્મ સુશાંત સિંહ રાજપૂતની રિલીઝ કરવામાં આવશે. આ ફિલ્મ 24 જુલાઈએ રિલીઝ થશે. દિવંગત એક્ટર સુશાંતની આ ફિલ્મ ડિઝની હોટસ્ટાર સ્ટ્રીમિંગ પ્લેટફોર્મ પર સબસ્ક્રાઈબ નહીં કર્યું હોય એવા દર્શકો પણ જોઈ શકશે. બાકીની ફિલ્મો જુલાઈથી ઓક્ટોબરની વચ્ચે રિલીઝ કરવામાં આવશે.