પાટણના હારીજના કાઠી ગામમાં લીંબુને લઈને એક પરિવાર વચ્ચે બબાલ સર્જાઇ હતી.જેમાં એક મહિલા પર લીંબુ લઈ જવાના આરોપ સાથે અન્ય મહિલાએ માર માર્યો હોવાનું સામે આવ્યું છે.
પાટણમાં લીંબુ બન્યું લડાઈનું કારણ
લીંબુ લઈ જવાના આરોપ સાથે મહિલાને માર મરાયો
પોલીસ દ્વારા ગુન્હો નોંધી તપાસ હાથ ધરાઇ
છેલ્લા કેટલાય સમયથી લીંબુ એ રાજ્યભરમાં ગાજતો મુદ્દો બની ગયો છે. ઉનાળામાં લીંબુની માંગમાં ઉછાળો આવતો હોય છે. ત્યારે હાલ લીંબુના ભાવ આસમાનને આંબી જતાં લીંબુએ ગરીબોમાં પોતાની છાપ દાગીના સમકક્ષ બનાવી છે. તેવા સંજોગો વચ્ચે પાટણમાં લીંબુ લડાઈનું કારણ બન્યું હોવાનું સામે આવ્યું છે. જેમાં લીંબુ લઈ જવાના આરોપ સાથે મહિલાને માર મારવામાં આવ્યો હોવાના આરોપ સાથે મામલો પોલીસ મથકે પહોંચ્યો હતો.
મહિલાને માર મરાતા મામલો પોલીસ મથકે પહોંચ્યો
લીંબુના ભાવ છેલ્લા કેટલાય સમયથી ઐતિહાસિક સપાટીએ પહોંચી ગયા છે. ગામડાઓમાં લીંબુ ખાવા તો દૂર દર્શન પણ દુર્લભ થઇ ગયા છે. તેવાંમાં મોંઘા લીંબુ ઝઘડાનું કારણ બન્યા હોવાનું પ્રથમ વખત સામે આવ્યું છે. પાટણ જિલ્લાના હારીજના કાઠી ગામમાં લીંબુને લઈને એક પરિવાર વચ્ચે બબાલ સર્જાઇ હતી.એક મહિલા પર લીંબુ લઈ જવાના આરોપ સાથે અન્ય મહિલાએ માથાકુટ કરી હતી. જે દરમિયાન મામલો બીચકાઈ જતાં મહિલા પર તૂટી પડી છૂટાહાથે માર મારવાના આરોપો પણ લગાવાયા છે. મારામારીનો ભોગ બનેલ મહિલાએ સ્થાનિક પોલીસ મથકે દોડી જઈ આ સમગ્ર મામલે અન્ય મહિલા વિરુદ્ધ ફરિયાદ નોંધાવવામાં આવી હતી. જે ને પગલે કસૂરવારો સામે પોલીસે ગુન્હો નોંધી તપાસ હાથ ધરી છે.
લીંબુના ભાવ 200 રૂપિયાથી પણ વધુ
હાલ ઉનાળાના ધોમધખતા તાપમાં લીંબુના ભાવ પણ ભડકે બળી રહ્યા છે. તાજેતરમાં જ 400 રૂપિયા સુધીના ભાવ હતા જેમાં થોડા ઘણા અંશે ઘટાડો નોંધાતા હાલ ભાવ 200 રૂપિયા પર સ્થિર થયા છે છતાં પણ સામાન્ય માણસ માટે તો લીંબુ હજુ સપના સમાન જ છે. લીંબુના ભાવમાં આગ ઝરતી તેજી જોવા મળતાં 5 મહિના પૂર્વે 25 રૂપિયા કિલો વેચાતા લીંબુ હવે 200 રૂપિયાના ભાવે બજારમાં વેચાઈ રહ્યાં છે.
સુરતમાં થઇ હતી લીંબુની ચોરી
ઉનાળાના આગમનની સાથે જ લીંબુના ભાવમાં બેફામ વધારો જીંકાતા ઇતિહાસમાં ક્યારેય ન બન્યું હોય તેવો લીંબુ ચોરીનો પણ બનાવ સામે આવ્યો હતો. થોડા દિવસ અગાઉ જ સુરતમાં તસ્કરોએ ખાતર પડી ખેતરમાંથી લીંબુંની ચોરી કરી લઈ ગયા હતા. કામરેજ તાલુકાના કોઠાર ગામના ફાર્મમાંથી લીંબુની ચોરી થઇ હોવાનો મામલો સામે આવ્યો હતો. મોડી રાત્રે ફાર્મમાં ત્રાટકેલા તસ્કરો 140 કીલો લીંબુ ઉસેડી ગયા હતા. એટલું જ નહિ ત્યારબાદ લીંબુ ચોરી ન થાય તે માટે ખેડૂતે સિક્યુરીટી ગાર્ડ પણ રાખી દીધા હતા.
રાજકોટમાં લગ્નમાં લીંબુની ગિફ્ટ
હવે મોંઘવારી સામે વિરોધનો નવો ટ્રેન્ડ શરૂ થયો હોય તેમ પ્રસંગોમાં ભેટ આભૂષણો, ફોટો ફ્રેમ કે અન્ય મોંઘી વસ્તુઓ નહીં પરંતુ લીંબુ અને કરિયાણું આપવામા આવી રહ્યું છે. તાજેતરમાં આવા જ લગ્ન રાજકોટમાં યોજાયા હતા. રાજકોટમાં સોરઠીયા પ્રજાપતિ સમાજ ખાતે અનોખા લગ્ન યોજાયા હતા. જાનૈયાઓએ લગ્ન મંડપમાં વર અને વરવધુને લગ્નભેટ તરીકે મોંઘવારીના વિરોધના પ્રતિકરૂપે પેટ્રોલ, લિંબુનો સેટ અને તેલનો ડબ્બો આપીને વધતી જતી મોંઘવારી સામે વિરોધ નોંધાવ્યો હતો.જાનૈયાઓએ કહ્યું હતુ કે સામાન્ય લોકો માટે મોંઘવારી પેચીદો પ્રશ્ન બનતો જઈ રહ્યો છે ત્યારે આનાથી લોકોને રાહત મળે તે જરૂરી છે.