સોમવારે નવી દિલ્હીના નેશનલ સ્ટેડિયમનો નજારો હોકી પ્રેમીઓ માટે ઘણો જ શરમજનક હતો. હોકી મેદાનમાં જ અલગ-અલગ ટીમના ખેલાડીઓ વચ્ચે ઝગડો થઈ ગયો હતો. ફાઈનલ મેચ દરમિયાન પંજાબ પોલીસ અને નેશનલ બેંકના ખેલાડીઓ વચ્ચે મારામારી થઈ ગઈ હતી. આ ઘટનાનો વીડિયો સોશિયલ મીડિયા પર વાયરલ થયો, જેમાં બંને ટીમના ખેલાડી એકબીજા પર હોકીથી હુમલો કરતાં જોવા મળ્યા હતા.
નહેરૂ કપના ફાઈનલમાં પંજાબ પોલીસ અને પીએનબીના ખેલાડીઓ સામસામે આવ્યા
હોકી સ્ટિકથી કરી એકબીજા પર તૂટી પડ્યા
બંને ટીમ વચ્ચે થયેલા ઝગડાનો વીડિયો થયો વાયરલ
પ્રાપ્ત માહિતી મુજબ પંજાબ પોલીસના ખેલાડીઓ આ ઝઘડામાં વધુ આક્રમક જોવા મળ્યા છે. તેઓ હાથમાં હોકી સ્ટિક લઈને પંજાબ નેશનલ બેંકના ખેલાડીઓનો પીછો કરતાં દેખાઈ રહ્યા છે. પીએનબીનો એક ખેલાડી જમીન પર પડેલો જોવા મળે છે અને તેને હોકીથી માર મારવામાં આવી રહ્યો છે.
#WATCH Delhi: Scuffle broke out between Punjab Police Hockey & Punjab National Bank Hockey teams during Nehru Cup finals. Elena Norman, Hockey India CEO says, "We're awaiting official report from Tournament officials, based on which Hockey India will take necessary action." pic.twitter.com/Yz3LAtGPl7
મારામારી બાદ પણ મેચ જારી રહી હતી. આ મેચમાં બંને ટીમના 8-8 ખેલાડીઓ મેદાન પર હાજર રહ્યા હતા. પંજાબ નેશનલ બેંકે મુકાબલો 6-3થી જીતી લીધો હતો. ખેલાડીઓના આવા વર્તનથી નારાજ ભારતીય ઓલિમ્પિક સંઘના અધ્યક્ષ નરિન્દર બત્રાએ બંને ટીમના મેનેજમેન્ટ અને ખેલાડીઓ સામે આકરા પગલા લેવાના આદેશ આપ્યા છે.
ખેલાડીઓને રેડ કાર્ડ દેખાડ્યો
મારામારી બાદ ઓન ફીલ્ડ એમ્પાયરોએ બંને ટીમના 3-3 ખેલાડીઓને રેડ કાર્ડ દેખાડ્યો. રેડ કાર્ડ દેખાડ્યા બાદ થોડીવાર માટે મેચ અટકી ગઈ. પંજાબ પોલીસ મેનેજરને પણ તેના ખેલાડીઓને ભડકાવવા માટે રેડ કાર્ડ બતાવવામાં આવ્યું હતું. હોકી ઈન્ડિયાની સીઈઓ એલિના નોર્મને કહ્યું છે કે, અમે ટુર્નામેન્ટના અધિકારીઓની ઓફિશિયલ રિપોર્ટની રાહ જોઈ રહ્યા છે. આ રિપોર્ટ આવ્યા બાદ તે અંગે યોગ્ય પગલા લેવામાં આવશે.