બનાસકાંઠાના ધાનેરામાં ગુરુકૃપા CNG પેટ્રોલપંપ પર અસામાજિક તત્વોએ કરી મારામારી, પોલીસે ફક્ત અરજી લઈને જ સંતોષ માન્યો હતો
ધાનેરામાં અસામાજિક તત્વોનો આતંક
ગુરુકૃપા CNG પેટ્રોલપંપ પર બબાલ
પંપના કર્મચારીઓને 3 શખ્સોએ માર્યો માર
બનાસકાંઠાના ધાનેરામાં ગુરુકૃપા CNG પેટ્રોલપંપ પર અસામાજિક તત્વો બેફામ બન્યા હતા. લુખ્ખા તત્વોએ પંપના કર્મચારીને માર માર્યો હતો. આ ઘટના ઘટી ત્યારે મોટી સંખ્યામાં ત્યાં વાહનો ઈંધણ પૂરાવા પહોંચ્યા હતા. અસામાજિક તત્વોની જાહેરમાં મારામારી જોઈને ત્યાં હાજર લોકોમાં ભયનો માહોલ ફેલાઈ ગયો હતો. આ મારામારીના દ્રશ્યો CCTVમાં પણ કેદ થઈ ગયા હતા. ઉલ્લેખનીય છે કે મારામારીની આટલી મોટી ઘટના બાદ પણ પોલીસે ફક્ત અરજી લઈને જ સંતોષ માન્યો હતો.
ગુજરાતમાં છેલ્લા કેટલાક સમયથી લુખ્ખા અને ગુંડાતત્વોનું રાજ ચાલી રહ્યું હોઈ તેવું લાગી રહ્યું છે. હવે તો કેટલાક અસામાજિક તત્વને પોલીસનો પણ ડર રહ્યો નથી. ત્યારે જ ખુલ્લામાં છરી લઈને એક પોલીસકર્મી પર હુમલો કરવાની હિંમત ક્યાંથી આવી રહી છે. શું તેની પાછળ પોલીસની જ ઢીલી કામગીરી છે કે, પછી સત્તાના કેન્દ્રમાં બેસેલા લોકોને સમાજમાં સુરક્ષાની કોઈ ચિંતા નથી. જેના કારણે લોકો પોતાની રીતે અને સત્તા તેની રીતે મનફાવે તેમ ચાલી રહ્યા છે, પૂર્વ કચ્છમાં યુવકે ટ્રાફિક પોલીસ કર્મી પર હુમલો કર્યો. ટ્રાફિક પોલીસ કર્મી પર છરી વડે જીવલેણ હમલો કર્યાનો વીડિયો સામે આવ્યો છે. વીડિયોમાં શખ્સના હાથમાં છરી છે અને તે ટ્રાફિક પોલીસ પર છરીથી જીવલેણ હુમલો કરતો જોવા મળી રહ્યો છે. હાલ ગાંધીધામ પોલીસે આરોપીને ઝડપી વધુ કાર્યવાહી હાથ ધરી છે.
તો સુરતમાં અસામાજિક તત્વો બેફામ બન્યા છે. પાંડેસરા વિસ્તારના પ્રમુખ પાર્કમાં આખા દિવસની કાળી મજૂરી કરીને નીચે જમીન પર પથારી કરીને સુતા કારીગર જોડે ત્રણ જેટલા અસામાજિક તત્વો આવીને તેની ચાદર ખેંચીને તેને ચપ્પુ બતાવીને તેની પાસે રહેલા મોબાઈલની લૂંટ કરીને બિન્દાસ જતા રહે છે. બાદમાં કારીગર ગભરાઈને ભાગી જતો નજરે ચડે છે. અસામાજિક તત્વોના આંતકને પગલે પોલીસના રાત્રી પેટ્રોલિંગ સામે પણ અનેક સવાલો ઉભા થયા હતા.