મહામારી / હોંગકોંગમાં શરુ થઈ કોરોનાની પાંચમી લહેર, દરરોજ આવી રહ્યાં છે હજારો કેસ, હવે લોકડાઉનની તૈયારી

• માંડ શમ્યું ત્યાં પાછા કોરોનાએ ઉપાડો લીધો
• હોંગકોંગમાં શરુ થઈ કોરોનાની નવી લહેર
• દરરોજ નોંધાઈ રહ્યાં છે હજારો કેસ
• હવે લોકડાઉન લગાડવાની તૈયારી 

હોંગકોંગમાંથી કોરોનાની નવી અને પાંચમી લહેર શરુ થઈ હોવાની શક્યતા છે. દુનિયામાં હાલમાં કોરોના શાંત પડ્યો છે પરંતુ હવે હોંગકોંગમાં કોરોનાની પાંચમી લહેર શરુ થઈ છે. હોંગકોંગમાં સોમવારે કોરોનાના અત્યાર સુધીના સૌથી વધુ રેકોર્ડ 34,466 નવા કેસ નોંધાયા છે આટલા મોટી સંખ્યામાં કેસ કોરોનાની નવી લહેરનો સંકેત છે, આ ઘટનાને કારણે દુનિયાની ચિંતા વધી છે. હોંગકોંગમાં કોરોનાના કેસોમા સતત વધારો થઈ રહ્યો છે. 

શું હોંગકોંગમાંથી દુનિયામાં ફેલાશે કોરોનાની પાંચમી લહેર

હોંગકોંગમાં કોરોનાની પાંચમી લહેર શરુ થઈ હોવાથી હવે દુનિયા માટે સંકટના વાદળો મંડરાઈ રહ્યાં છે. હાલમાં હોંગકોંગ સિવાય બીજા એક પણ દેશમાં આટલી મોટી સંખ્યામાં કેસ નોંધાઈ રહ્યાં નથી એટલે હવે હોંગકોંગમાંથી દુનિયામાં ફેલાશે કોરોનાની પાંચમી લહેર તેવી શક્યતા જોવાઈ રહી છે. 

લોકડાઉન લાગુ પાડવાની સરકારની યોજના 
દરમિયાન, આરોગ્ય અધિકારીઓએ જણાવ્યું હતું કે હોંગકોંગમાં લોકડાઉનને નકારી શકાય નહીં. સરકારે લોકોને તકેદારી રાખવાની સલાહ આપી છે. 

ઓમિક્રોન વેરિયન્ટને કારણે દેશમાં આવી કોરોનાની પાંચમી લહેર 

હોંગકોંગ હાલમાં કોરોના વાયરસની પાંચમી લહેર સામે ઝઝૂમી રહ્યું છે, જે મુખ્યત્વે ઓમિક્રોન વેરિઅન્ટને કારણે આવ્યું છે. સોમવારના 34,000 થી વધુ કેસ એક અઠવાડિયા પહેલાની તુલનામાં ચાર ગણાથી વધુ છે. એક અઠવાડિયા પહેલા, શહેરમાં ચેપના 7,500 થી વધુ કેસ નોંધાયા હતા. શહેરના સેન્ટર ફોર હેલ્થ પ્રોટેક્શનના ચીફ મેડિકલ અને હેલ્થ ઓફિસર આલ્બર્ટ એયુએ દૈનિક વાયરસ બ્રીફિંગ દરમિયાન જણાવ્યું હતું કે, "દર ત્રણ દિવસે કેસની સંખ્યા બમણી થઈ જશે. અમને લાગે છે કે સંખ્યા વધતી જ રહેશે. સોમવારે શહેરમાં 87 લોકોના મોત થયા હતા. 87 મૃત્યુમાંથી 67 લોકોને રસી આપવામાં આવી ન હતી.

લોકો કામ સિવાય બહાર ન નીકળે-સરકારની તાકીદ 

 હોંગકોંગના આરોગ્ય પ્રધાન સોફિયા ચાને સોમવારે એક રેડિયો કાર્યક્રમ દરમિયાન જણાવ્યું હતું કે સરકાર લોકોની અવરજવર ઘટાડવા અને સામૂહિક પરીક્ષણની અસરને મહત્તમ બનાવવા માટે લોકડાઉનના મામલે "હજી પણ ચર્ચા" કરી રહી છે. આરોગ્ય અધિકારીઓએ જણાવ્યું હતું કે સરકાર દ્વારા પગલાં લેવામાં આવી શકે છે જેમાં "લોકોને ઘરે રહેવાનું કહી શકાય છે". જો કે હવે જોવાનું એ રહે છે કે કાયદા દ્વારા આવા પગલાં લેવામાં આવશે કે અન્ય માધ્યમથી.