લોકસભાની ચૂંટણીના પાંચમાં તબક્કામાં આજે 7 રાજ્યોની 51 બેઠકો પર મતદાન થયું હતું. આ તબક્કામાં યૂપીથી રાજનાથસિંહ, સોનિયા ગાંધી, રાહુલ ગાંધી અને સ્મૃતિ ઇરાની જેવા કદાવર નેતાઓનું ભાવી ઇવીએમમાં કેદ થયું છે. 51 બેઠકો પર 674 ઉમેદવારોના ભવિષ્યનો નિર્ણય નવ કરોડ મતદારો કરશે.
પાંચમાં તબક્કામાં યોજાયેલ મતદાનમાં રાજ્યવાર બેઠકની વાત કરવામાં આવે તો બિહારની 5, જમ્મૂ કાશ્મીરની 2, ઝારખંડની 4, મધ્યપ્રદેશની 7, ઉત્તરપ્રદેશની 14, પશ્વિમ બંગાળની 7 અને રાજસ્થાનની 12 બેઠકો પર મતદાન થયું હતું. ત્યારે સરેરાશ કુલ 62.56% ટકા મતદાન નોંધાયું છે.
પાંચમાં તબક્કાનું મતદાન
બિહાર - 57.76 ટકા
જમ્મૂ કાશ્મીર - 19.55 ટકા
મધ્યપ્રદેશ - 68.29 ટકા
રાજસ્થાન - 63.72 ટકા
ઉત્તરપ્રદેશ - 57.93 ટકા
પ.બંગાળ - 74.49 ટકા
ઝારખંડ - 65.12 ટકા
સચિન પાયલટે કર્યું મતદાન
રાજસ્થાનના નાયબ મુખ્યમંત્રી સચિન પાયલટે પણ મતાધિકારનો ઉપયોગ કર્યો અને મતદાન કર્યું. સાથે જ ભાજપ પર પ્રહાર કરતાં કહ્યું કે ભાજપે અત્યાર સુધી કોઈ જ વાયદાઓ પૂર્ણ કર્યા નથી. યુવાનોને નોકરી નથી મળી. ખેડૂતોને પોષણક્ષમ ભાવ નથી મળ્યા. દેશની જનતાને ગેરમાર્ગે જ દોરવામાં આવી છે. 2019માં કોંગ્રેસ અને તેના સાથી પક્ષો જ જીતવાના છે. 2019માં કોંગ્રેસ સરકાર રચશે તેવો દાવો પણ સચિન પાયલટે કર્યો છે.
બિહારના છપરામાં એક વ્યક્તિએ તોડ્યુ EVM
બંગાળ બાદ હવે પશ્ચિમ બંગાળમાં પણ હિંસાના દ્રશ્યો સામે આવ્યા છે. બિહારના છપરામાં ઈવીએમ તોડવાની એક ઘટના સામે આવી છે. બિહારના છપરામાં નયાગામ મતદાન કેન્દ્ર નંબર 131 પર એક વ્યક્તિએ ઈવીએમ તોડી નાખતા પોલીસે આરોપી રંજીત પાસવાનની પોલીસે ધરપકડ કરી છે. તો હાજીપુરમાં પણ હિંસાની ઘટના સામે આવી છે. હાજીપુરમાં ફરજી વોટિંગના મામલે પોલીસને લાઠીચાર્જ કરવાનો વારો આવ્યો. પોલીસે કોઈ પણ કારણ વગર જ લોકો પર લાકડીનો વરસાદ કર્યો. અહીં રામવિલાસ પાસવાનના ભાઈ પશુપતિ પારસનો મુકાબલો મહાગઠબંધનના ઉમેદવાર અને પૂર્વ મંત્રી શિવચંદ્ર રામ સામે છે.
પશ્ચિમ બંગાળના બૈરકપુરમાં વોટિંગ દરમિયાન હોબાળો
પશ્ચિમ બંગાળમાં ચોથા તબક્કાની જેમ ફરી એકવાર પાંચમાં તબક્કાની ચૂંટણી હિંસક બની છે. પશ્ચિમ બંગાળના બૈરકપુર અને હાવડામાં હિંસાની ઘટના સામે આવી છે. બૈરકપુરમાં ભાજપ અને ટીએમસીના કાર્યકર્તાઓ વચ્ચે હિંસા થઈ છે. તો આ હિંસામાં ભાજપના ઉમેદવાર અર્જુનસિંહને ઈજા પણ થઈ છે. ભાજપના ઉમેદવાર અર્જુનસિંહે ટીએમસીના કાર્યકર્તાઓ પર આરોપ લગાવ્યો છે. તો સુરક્ષા વ્યવસ્થાને લઈને પણ અર્જુનસિંહે સવાલ ઉઠાવ્યા છે.
West Bengal: Arjun Singh, BJP candidate from Barrackpore alleges that he was attacked by TMC workers, says,"I was attacked by TMC goons who have been brought from outside. Those people were scaring away our voters. I am injured." pic.twitter.com/lWXY3mbbZZ
કેન્દ્રીય મંત્રી સ્મૃતિ ઈરાનીએ લગાવ્યો બૂથ કેપ્ચરિંગનો આરોપ
કેન્દ્રીય મંત્રી સ્મૃતિ ઈરાનીએ અમેઠીમાં રાહુલ ગાંધી પર બૂથ કેપ્ચરિંગનો આરોપ લગાવ્યો છે. અમેઠીમાંથી એક વીડિયો ટ્વીટ કરીને શેર કરીને સ્મૃતિ ઈરાનીએ કહ્યું કે, રાહુલ ગાંધી બૂથ કેપ્ચરિંગ કરાવી રહ્યા છે. તો આ ઘટના બાદ સ્મૃતિ ઈરાનીએ ચૂંટણી પંચને પણ ફરિયાદ કરી છે અને યોગ્ય કાર્યવાહી કરવા માગ કરી છે.
બસપાના અધ્યક્ષ માયાવતીએ કર્યુ વોટિંગ
બસપાના અધ્યક્ષ માયાવતીએ પણ વોટિંગ કરીને લોકોને વધુમાં વધુ વોટિંગ માટે અપીલ કરી છે. માયાવતીએ સિટી મોન્ટેસરી ઈન્ટર કોલેજ મતદાન મથકે જઈને મતાધિકારનો ઉપયોગ કર્યો. તો માયાવતીએ લોકોને વધુમાં વધુ વોટિંગ કરવા માટે પણ અપીલ કરી. ઉલ્લેખનીય છે કે, યૂપીમાં આ વખતે જોરદાર ટક્કર જામી છે. સપા બસપા અને આરજેડી ગઠબંધન કરીને ચૂંટણી લડી રહ્યા છે.
ઉત્તરપ્રદેશના અમેઠીમાં અનેક બૂથો પર EVM ખરાબ
યૂપીના અમેઠીમાં અનેક મતદાન કેન્દ્રો પર ઈવીએમ ખોટવાતા મતદાન શરૂ થઈ શક્યુ ન હતું. આ બાદ અમેઠીના જ મુસાફીરખાના ક્ષેત્રના દાદરા ગ્રામ સભામાં બૂથ નંબર 28 પર ઈવીએમમાં ટેકનીકલ ખામી ઉભી થતા મતદાન અટવાયુ હતું. તંત્ર દ્વારા જલ્દી મતદાન શરૂ કરવા માટે આશ્વાસન પણ આપવામાં આવ્યું. અનેક વિસ્તારમાં ઈવીએમ ખોટવાતા મતદાન શરૂ થઈ શક્યુ ન હતું.
ભાજપના રાજ્યવર્ધનસિંહ રાઠોડે આપ્યો મત
લોકસભા ચૂંટણીનું પાંચમાં તબક્કાનું મતદાન ચાલી રહ્યું છે ત્યારે રાજસ્થાનની 12 સીટો પર પણ આજે મતદાન થઇ રહ્યું છે. ત્યારે રાજસ્થાનની હાઇપ્રોફાઇલ સીટ જયપુર ગ્રામ્ય પર પણ મતદાન યોજાયું. કેન્દ્રીય મંત્રી અને ભાજપ ઉમેદવાર રાજ્યવર્ધનસિંહ રાઠોડે મતદાન કર્યું. આ સીટ પરથી તેમની સામે કૃષ્ણા પુનિયા છે.
ખાસ કરીને ઉત્તરપ્રદેશની બે હાઇપ્રોફાઇલ રાયબરેલી અને અમેઠી બેઠક પર મતદાન યોજવા જઈ રહ્યુ છે. અમેઠી બેઠક પરથી રાહુલ ગાંધી અને સ્મૃતિ ઇરાની વચ્ચે ટક્કર છે.
તો રાયબરેલીથી કોંગ્રેસના દિગ્ગજ નેતા સોનિયા ગાંધી ચૂંટણી લડી રહ્યા છે. આ ઉપરાંત લખનઉથી કેન્દ્રીય ગૃહમંત્રી રાજનાથ સિંહ ચૂંટણીના મેદાને છે. તેમની સામે કોંગ્રેસમાંથી આચાર્યપ્રમોદ ક્રિષ્નન અને સમાજવાદી પાર્ટીમાંથી શત્રુઘ્ન સિંહાના પત્નિ પૂનમ સિંહા ચૂંટણી લડી રહ્યા છે.