CNG પમ્પની હડતાળનો પાંચમો દિવસ રીક્ષા અને સ્કૂલવેન ચાલકો પરેશાન

સુરત: CNG પંપના માલિકો દ્વારા પોતાની અલગ અલગ માગને પગલે હડતાળ કરવામાં આવી રહી છે. CNG પંપની હડતાળનો આજે પાંચમો દિવસ છે. 40થી વધુ CNG પંપ ધારકો હડતાળ પર ઉતરતા રીક્ષા અને કાર ચાલકો પરેશાન થયા છે. માગ પુરી ન થાય ત્યાં સુધી પંપના માલિકો દ્વારા હડતાળ યથાવત્ રાખવાની ચીમકી ઉચ્ચારવામાં આવી છે.

CNGનું વેચાણ કરતા PSU પંપ ધારકોને કિલો દીઠ 3 રૂપિયા 11 પૈસા અને ફ્રેન્ચાઈઝી CNG પંપ ધારકોને 2 રૂપિયા 60 પૈસા સર્વિસ ચાર્જ વધારાની માગને લઈને પંપના માલિકો દ્વારા હડતાળ કરવામાં આવી છે.

સુરત સહિત સમગ્ર ગુજરાતમાં ગુજરાત ગેસ સાથે સંકળાયેલા CNG ફ્રેન્ચાયઝી એસોસિએશન દ્વારા કમિશન માં વધારા સહિતની માંગ સાથે અચોક્કસ મુદ્તની હડતાલ ઉપર ઉતરી ગયા છે. જેના કારણે CNG રીક્ષા ચાલકો અને સ્કૂલ વેન ચાલકોને ભારે હલકી વેઠવી પડી રહી છે. દરરોજ ત્રણ કલાકથી લઈને પાંચ કલાક સુધી CNG પુરાવા માટે લાઈનમાં ઉભું રહેવું પડે છે. જેના કારણે દિવસ ની કમાણી પર સીધી અસર થઈ રહી છે.