ફિફા વર્લ્ડકપઃ વિમાનમાં આગ લાગતાં સાઉદી અરબની ટીમનો આબાદ બચાવ

મોસ્કોઃ ફિફા વર્લ્ડકપ ૨૦૧૮માં ભાગ લઈ રહેલી સાઉદી અરેબિયાની ફૂટબોલ ટીમનો એક વિમાન દુર્ઘટનામાં આબાદ બચાવ થયો હતો. સાઉદી અરેબિયાની ટીમને લઈને સેન્ટ પીટ્સબર્ગથી રોસ્ટોવ જઈ રહેલા વિમાનનાં એન્જિનમાં મધ્ય આકાશમાં એકાએક આગ લાગી હતી અને તેને સુરક્ષિત રીત ઉતરાણ કરાવવામાં આવતાં સમગ્ર ફૂટબોલ ટીમનો આબાદ બચાવ થયો હતો.

રશન એરલાઈન્સની એરબસ જેટે સુરક્ષિત લેન્ડિંગ કર્યું હતું અને કોઈ પણ ખેલાડીને કોઈ ઈજા કે નુકસાન થયાના અહેવાલ નથી. સાઉદી અરેબિયા ફૂટબોલ ફેડરેશનનું કહેવું છે કે તેમની ફૂટબોલ ટીમને લઈને જતાં વિમાનમાં ટેકનિકલ ખામી હોવા છતાં અને એકાએક આગ લાગવા છતાં ટીમ સુરક્ષિત રીતે રોસ્ટોવ-ઓન-ડોન પર સુરક્ષિત રીતે પહોંચી ગઈ હતી અહીં ટીમની વર્લ્ડકપની બીજી મેચ યોજાનાર છે. 



સોશિયલ મીડિયા પર વાઈરલ થયેલા વીડિયોમાં સ્પષ્ટ પણે દેખાઈ રહ્યું છે કે ટીમને લઈને જઈ રહેલા વિમાનના એક એન્જિનમાં આગ લાગી હતી અને વીડિયોમાં આગની જ્વાળાઓ સ્પષ્ટપણે જોઈ શકાય છે. એરલાઈન્સના જણાવ્યા અનુસાર વિમાનનાં એન્જિનમાં કદાચ કોઈ પક્ષી ફસાઈ ગયું હતું જેને કારણે ટેકનિકલ ખામી ઉભી થઈ હતી.

જોકે એરલાઈન્સે આગ લાગી હોવાના અહેવાલને રદિયો આપ્યો છે પરંતુ વીડિયોમાં આગની જ્વાળાઓ સ્પષ્ટપણે દેખાય છે. સરકાર દ્વારા ટ્વિટર પર જારી કરવામાં આવેલા એક નિવેદનમાં જણાવ્યું છે કે આ દુર્ઘટનામાં કોઈ ખુવારી થઈ નથી. સાઉદી રાષ્ટ્રીય ટીમે ટ્વિટર પર લખ્યું હતું કે સાઉદી અરેબિયા ફૂટબોલ ફેડરેશન તમામને ખાતરી આપવા ઈચ્છે છે કે સાઉદી અરેબિયાના તમામ રાષ્ટ્રીય ખેલાડીઓ સુરક્ષિત છે.

સાઉદી અરેબિયા ફૂટબોલ ફેડરેશનના જણાવ્યા અનુસાર ફૂટબોલના ખેલાડીઓને આ પ્લેન ઈન્ટરનેશનલ એર ટ્રાન્સપોર્ટ એસોસીએેશનની આયોજન સમિતિ દ્વારા ઉપલબ્ધ કરાવવામાં આવ્યું હતું. વર્લ્ડકપમાં ભાગ લેતી તમામ ટીમો માટે આ સમિતિ દ્વારા પ્લેન ઉપલબ્ધ કરાવવામાં આવે છે. સાઉદી અરેબિયાની ટીમને ફિફા વર્લ્ડકપ ૨૦૧૮માં પ્રથમ મેચમાં રશિયાના હાથે ૦-૫થી કારમી હારનો સામનો કરવો પડ્યો હતો. હવે સાઉદી અરેબિયાની ટીમ ઉરુગ્વે સામે બીજી મેચ રમશે.