શું ભારતીય ફુટબોલ ટીમ 2026માં ફીફા વર્લ્ડકપ રમી શકશે...ફીફાનાં ચેરમેને ભારતીય ટીમની સંભાવનાઓને લઇને નિવેદન આપ્યું છે.
2026નાં ફીફા વર્લ્ડકપમાં ભારતની એન્ટ્રી સંભવ
ફીફાનાં ચેરમેને આપી મોટી માહિતી
2026માં 32ની જગ્યાએ 48 ટીમોનો થશે સમાવેશ
ફીફા વર્લ્ડકપ 2022 પૂર્ણ થઇ ગયું છે પરંતુ લોકોનાં મગજમાંથી હજી પણ આ મેચનું ભૂત નથી ઊતર્યું. લિયોનેલ મેસીની આગેવાનીમાં આર્જેન્ટીનાએ આ વર્લ્ડકપ જીત્યું છે જેની ઊજવણી ભારમાં પણ કરવામાં આવી હતી. પરંતુ ફેન્સનું પૂછવું છે કે ભારત ફીફા વર્લ્ડ કપ ક્યારે રમશે? ભારતીય ફેન્સનું આ સપનું ટૂંક સમયમાં પૂરું થઇ શકે છે. કારણ કે ફીફાનાં ચેરમેન જિયાની ઇન્ફેન્ટિનોએ ભારતને લઇને મોટું એલાન કર્યું છે. ફીફાની આવતી મેચ 2026માં થવાની છે. તેવામાં ભારતીય ટીમ પણ ત્યાં દેખાઇ શકે છે.
ફીફાનાં ચેરમેને શું કહ્યું?
ફીફાનાં ચેરમેન જિયાની ઇન્ફેન્ટિનો ઇન્સ્ટાગ્રામ પર કેટલાક પ્રશ્નોનાં જવાબ આપી રહ્યાં હતાં. તે દરમિયાન ભારત ક્યારે વર્લ્ડકપમાં દેખાઇ શકે છે તે પ્રશ્નનો જવાબ આપતાં તેમણે જણાવ્યું કે 2026નાં વર્લ્ડ કપમાં ભારત પાસે ક્વોલિફાઇ કરવાનો મોકો છે. જિયાની ઇન્ફેન્ટિનોએ કહ્યું કે વર્લ્ડકપ 2026માં 32ની જગ્યાએ 48 ટીમો ભાગ લેશે. તેવામાં ભારત પાસે તે ક્વોલિફાઇ કરવાનો મોકો છે. હું ઇન્ડિયન ફેન્સને આશ્વાસન આપવા ઇચ્છું છું કે અમે ભારતમાં ઘણું ઇન્વેસ્ટમેન્ટ કરી રહ્યાં છીએ જેથી ભારતીય ફુટબોલને મોટું બનાવી શકાય. આટલા મોટા દેશમાં ધમાકેદાર ફુટબોલ મેચ થવી જોઇએ સાથે જ ભારતની એક ઉત્તમ ફુટબોલ ટીમ પણ હોવી જોઇએ.
2026નો ફીફા વર્લ્ડ કપ આ દેશો કરશે હોસ્ટ
ફીફા વર્લ્ડકપ 2026 અમેરિકા, કેનેડા અને મેક્સિકો મળીને હોસ્ટ કરશે. આ વર્લ્ડકપમાં ઘણાં ફેરફારો થવાનાં છે કારણકે અહીં 32ની જગ્યાએ 48 ટીમો ભાગ લેવાની છે. આ વર્લ્ડકપમાં 80 મેચો થશે જેમાંથી મોટાભાગની મેચ અમેરિકા જ હોસ્ટ કરશે.
ભારતની ફીફા રેકિંગ 106
ભારતની ફીફા રેકિંગ હાલમાં 106 છે પરંતુ રેન્કિંગ પરથી કોઇ પણ દેશ ક્વોલિફાઇ થઇ શકતું નથી. દરેક દેશને ક્વોલિફાઇ થવા માટે ક્વોલિફાયર પાસ કરવું પડે છે. વર્લ્ડકપમાં અલગ અલગ એસોસિએશન માટે ટીમોનો સ્લોટ નક્કી હોય છે તેવામાં 48 ટીમો હોય છે તો એશિયન ફુટબોલ એસોસિએશનનાં ભાગમાં 8.5 સ્લોટ આવશે એટલે કે એશિયાની કુલ 8 ટીમો ભાગ લઇ શકશે.
ભારત એશિયાઇ ટીમોમાં 19માં નંબર પર
ભારત એશિયાની ફુટબોલ ટીમોમાં 19માં ક્રમે આવે છે. તેવામાં તેને એશિયા ક્વોલિફાયર પાર કરવું પડશે. અહીં આગળ જવા માટે પોતાના ગ્રુપમાં ટોપ-2 પર રહેવું જરૂરી છે. ભારત માટે એશિયાઇ ટીમોને હરાવવું પણ એક મોટી ચેલેન્જ છે.